EZEKIA 34 - Mara Bible RV (BSI)

Mietaku vaituhpazy nata mietakuzy kyh hrohsona bie

¹ Abeipa bie ei hnohta vaw tlô ta:

² “Chyhsa sawchapawpa y, Izarei mietaku vaituhpazy hnohta hrohsona bie phuah teh. Mietaku vaituhpazy hnohta hrohsona bie cha phuah tlai la, ama hnohta hetana heta reih teh. Abeipa Zehôvâh ta hetana heta a tah: Nâmosasyh â pasapa Izarei mietaku vaituhpazy nama hu a po kaw dia! Mietaku vaituhpazy cha mietakuzy ama pasa awpa châ vei ma?

³ A thawhpazy tlao nie ei chi ta, mietaku hmi ta namâ tobi. Mietaku thawhpazy thie ei chi ta, châhrasala mietakuzy pasa veih ei chi.

⁴ Mietaku chiehleipazy thapatlô leipa ei chi ta, a pasapazy patlâh hra leipa ei chi ta, hmahphaohpazy chhao chahry veih ei chi. Lâpi a paviapazy a vaw chhi pakhua leipa ei chi ta, aleipazy tlua hra vei ei chi. Nôchhiepa nata chahrâhpa ta ama chô liata ryu tlao nama reih tyh.

⁵ Chavâta mietakuzy pai ei ta, vaituhpazy ama y leipa vâta, sahrâhpazy nie awpa lâta amâ lie haw. Ei mietakuzy ama pai haw.

⁶ Tlâhpi to liata viavi ei ta, tlâh sâhpa to liata ama viavi. Ei mietakuzy cha alei chô zydua liata paipatlapa ta y ei ta, a tluatuhpa nata a pachâtuhpa rai y veih ei.

⁷ “Chavâta nâmo mietaku vaituhpazy saih u, Abeipa bie thei teh u:

⁸ Ei hrona reipa ta ei reih, Abeipa Zehôvâh ta a tah. Mietaku­ vaituhpazy y leipa ei ta, ei mietaku vaituhpazy ta ei mietakuzy tlua hra leipa ei ta, mietaku vaituhpazy ta âmo tlao a pasa ei ta, ei mietakuzy ama pasa leipa vâta, ei mietakuzy cha tai awpa dei châ ei ta, sahrâhpazy nie awpa lâta amâ lie haw.

⁹ Chavâta nâmo, mietaku vaituhpazy saih u, Abeipa bie thei teh u.

¹⁰ Abeipa Zehôvâh ta hetana heta a tah: Pachâ teh, mietaku vaituhpazy ei dyuh ei. Ei mietakuzy leidiana kyh liata âmo ku liata maophaohna soh aw na ta, mietakuzy ama mohôhna chhao ei pachhâsa aw. Chatanachata mietaku vaituhpazy cha âmosasyh a pasa khao aw veih ei. Mietakuzy cha ama pakah tawhta pachha aw ei na ta, âmo nie awpa châ khao aw veih ei.

Abeipa ta a mietakuzy a tlua aw

¹¹ “Abeipa Zehôvâh ta hetana heta a tah: Pachâ teh, kei, keima tlai ta ei mietakuzy cha tlua aw na ta, ei hmô aw ei.

¹² Mietaku vaituhpa ta a mietaku zaw a vai nota mietaku a paipatlapazy a tluapa hawhta, ei mietakuzy cha tlua aw ei na ta, vâ panohna nata zohmyhna noh liata, ama paipatlana su zydua tawhta ei pachha aw ei.

¹³ Phopizy tawhta a chhi papuapa ta, râh to tawhta pakhy aw ei na ta, ama râh lâ tlai ei chhi aw ei. Chatanachata Izarei tlâhpizy, chavah kiahzy nata chyhsa pahrâna su zydua liata ei pasa aw ei.

¹⁴ Sibiepa phapa suzy liata pasa aw ei na ta, Izarei tlâh sâhpazy cha ama lao bâna su a châ aw. Mietakuzy tlaihna su phapa liata a byu aw ei ta, sibiepa phana Izarei tlâhpizy liata ama lao ama bâ tyh aw.

¹⁵ Keima tlai ta ei mietakuzy cha pasa aw na ta, ei pabyusa aw ei, Abeipa Zehôvâh ta a tah.

¹⁶ Mietaku a leipa tlua aw na ta, a viavipa a vaw chhi pakhuapa ta, hmaphaohpa chahrypa aw na ta, chiehleipa tha ei patlô aw. Athawhpa nata thatlôpazy chhao ei mohôh aw ei. Mietakuzy cha â khopa ta ei pasa aw ei.

¹⁷ “Hy ei mietaku zawzy saih u, nâmo kyh liata, Abeipa Zehôvâh ta hetana heta a tah: Pachâ teh u, mietaku nata mietaku likah pachia aw na ta, mietaku tôhpazy nata mie tôhpazy likah ei pachia aw.

¹⁸ Sibiepa su phapa liata nama lao nama bâpa â daih tah leipa ei chi ta, khazia sibiepa suzy cha tlypâpa ta nama parao khai tly? Ti pasohpa nama dopa â daih tah leipa ei chi ta, khazia ti cha nama phei ta tlypa ta nama panôsa khai tly?

¹⁹ Ei mietakuzy cha nama phei ta nama tlypâpa sibiepa bâpa ma, nama phei ta nama panôsapa ti ama doh aw?

²⁰ “Chavâta Abeipa Zehôvâh ta ama hnohta hetana heta a tah: Pachâ teh u, kei, keima tlai ta, mietaku thawhpa nata mietaku zaohpa likah ei pachia aw.

²¹ Mietaku chiehleipazy cha nama papai hlâlei nama kâ nata nama ngiatlâh ta chakho ei chi ta, nama kizy ta nama daihpa vâta,

²² ei mietaku zaw cha pachha aw ei na ta, taipa châ khao aw veih ei. Mietaku nata mietaku likah ei pachia aw.

²³ Nâ chakaotuhpa Dâvi cha âmo vaituhpa ta soh aw na ta, ano ta âmo cha a pasa aw. Âmo cha pasa aw ta, âmo vaituhpa a châ aw.

²⁴ Kei Abeipa he ama Khazohpa châ aw na ta, nâ chakaotuhpa Dâvi cha âmo bei a châ aw. Kei Abeipa ta ei reih haw.

Abeipa thlalôhna biehrai

²⁵ “Ama hnohta thlalôhna biehrai tao aw na ta, sahrâhpazy cha râh tawhta ei pahlei aw ei. Chatanachata râhchawhpa liata â bohpa ta pahrâ aw ei ta, râhmâhpa liata amâ mô thei aw.

²⁶ Âmo nata ei tlâhthlôh chaby suzy cha byhnâ pachâsa aw na ta, a daihti ta avâ pasuasa tyh aw na ta, vâ byhnâzy a vaw suah aw.

²⁷ Lyu liata thozy ta ama thei pathei aw ei ta, alei ta kôvei papua aw ta, ama râh liata â bohpa ta ama y aw. Ama raopaky thliepa ta, sei ta a taotuhpazy ku tawhta ei pachha ti ei ta, kei he Abeipa ei châ tahpa ama pahno aw.

²⁸ Phopizy ta ama hraopa châ khao leipa aw ei ta, râh sahrâhpazy ta âmo cha sie khao aw veih ei. Â bohpa ta pahrâ aw ei ta, ahy hmahta pachisa khao aw veih ei.

²⁹ Chichei bialo pha ngaitapazy pie aw ei na ta, râh liata nodipa ta thi khao leipa aw ei ta, phopizy pahneisaopa ta y khao aw veih ei.

³⁰ Chatanachata kei he ama hnohta a ypa Abeipa ama Khazohpa ei châ tahpa pahno aw ei ta, âmo, Izarei pathlazy cha ei phopi ama châ tahpa ama pahno aw, Abeipa Zehôvâh ta a tah.

³¹ Nâmo cha ei sibiepa su liata ei mietakuzy nama châ. Chyhsapazy he ei mietakuzy cha châ ei chi ta, kei he nama Khazohpa ei châ, Abeipa Zehôvâh ta a tah.”