EZEKIA 30 - Mara Bible RV (BSI)

Izi roryhrana

¹ Abeipa bie ei hnohta vaw tlô ta:

² “Chyhsa sawchapawpa y, hrohsona bie phuah teh, Abeipa Zehôvâh ta hetana heta a tah: “‘Cha noh rarôh y rimâ awpa cha!’ Tah u la, sâh teh u.

³ Noh a hnia ha tlôh ta, Abeipa noh â hnia haw; Meihdo zohna noh châ aw ta, Phopizy châta raona noh a châ aw.

⁴ Izi chô liata zaozi vaw tlô aw ta, Kusi liata nôpona a y aw. Izi liata ama thiepazy pao aw ei ta, A hneirôna siekheipa châ aw ta, Â bônazy paraopa a châ aw.”

⁵ “Kusi mo, Puti mo, Ludi mo, Arabia mo zydua, Libia nata Izi mo nata a paraohpa râh chyhsazy chhao, Izi mo paona liata zaozi ta ama pao hra aw.

⁶ “Abeipa ta hetana heta a tah: Izi a baotuhpazy pao aw ei ta, A thatlôna a palaikheipa chhao a nawh aw. Mikadô tawhta Syne taihta, Zaozi ta ama pao khai aw,” Abeipa Zehôvâh ta a tah.

⁷ “Roryhrapa râhzy hry liata Roryhrapa ta y hra aw ei ta, A khihpizy chhao khihpi rypazy hry liata Khih rypa ta a y hra aw.

⁸ Izi râh mei ta rao aw na ta, A baotuhpa zydua ei pahleipadia khai tita, Abeipa ei châ tahpa ama pahno aw.”

⁹ “Cha noh liata, chhôhmohpa ta a ypa Kusi mo pachisa awpa ta, balyh ta lyuhchâpazy tuah aw ei na ta, Izi raona noh liata, ama chô liata nôpona ta a tlô thlu aw ei. Moh teh, cha noh cha a vaw tlô hai!

¹⁰ “Abeipa Zehôvâh ta hetana heta a tah: ‘Babylaw bei Nebukaneza ku ta Izi hneirôna cha ei pachhâsa aw.

¹¹ Babylaw bei nata a phopi, Phopizy hry liata nôchhie chaipa phopi cha, Râh parao awpa ta ama châ aw; Izi chô liata ama zaozi hy aw ei ta, Râh cha chyhsa ri ta ama pabie aw.

¹² Nile chavah pakua aw na ta, Râh chhao moleipazy hnohta ei zuah aw; Chihropazy ku hmâpa ta, Râh nata a chhôh liata a ypa zydua chô liata Roryhrana ei patlôsa aw; Kei Abeipa ta ei reih haw.’

¹³ “Abeipa Zehôvâh ta hetana heta a tah: ‘Khazoh nothlahpazy parao aw na ta, Mephi liata nothlahpazy ei pahleipadia aw; Izi liata abeisaw y khao leipa aw ei ta, Izi râh liata china ei paysa aw.

¹⁴ Pâtharô cha roryhrapa ta taopa ta, Zônâ mei ta rao aw na ta, Thebe liata bie ei pachia aw.

¹⁵ Izi thokhy khihpi Pelusia chô liata Ei hiehâhna lei thlu aw na ta, Thebe zawpizy ei chhawh pathlah khai aw ei.

¹⁶ Izi cha mei ta rao aw na ta, Pelusia cha thata pasataopa ta a y aw; Thebe thokhy cho aw ta, Mephi cha nohchhô ta chariah â tyh aw.

¹⁷ Ôni nata Pibese satliazy zaozi ta pao aw ei ta, A khihpi duata seichâna lâ ama sie aw.

¹⁸ Tehâphanehe liata Izi raopaky thlie aw na ta, Â palaikhei kaw tyhpa a thatlôna ei pachhâsa tita, Tehâphanehe liata noh a zoh aw; Khihpi cha meihdo ta khu aw ta, A sawchanôzy seichâna lâ ama sie aw.

¹⁹ Cha hawhna chata Izi cha pachia aw na ta, Kei he Abeipa ei châ tahpa ama pahno aw.’”

Babylaw ku liata Izi a pao aw

²⁰ Kô hrawh hleikhana, thla khana, noh sarina noh liata, Abeipa bie ei hnohta vaw tlô ta:

²¹ “Chyhsa sawchapawpa y, Izi bei Phiraoh bâh thlie ha na ta, moh teh, zaozi pahieh awpa ta thatlôna a hnei khao lei nawpa ta, chahrypa châ leipa ta, thohna hniapa chhao châ vei.

²² Chavâta Abeipa Zehôvâh ta hetana heta a tah: Pachâ teh, Izi bei Phiraoh cha a dyuh na ta, a bâh phapa nata thlie chiehpa a miano ta thlie aw na ta, a ku tawhta zaozi ei patlasa aw.

²³ Izi mo cha phopizy hry liata hiepatla aw ei na ta, râh to liata ei papai aw ei.

²⁴ Babylaw bei bâh tha patlô aw na ta, a ku liata zaozi chabasapa ta, Phiraoh bâhzy thlie aw na ta, chatanachata Phiraoh cha Babylaw bei hmiakô liata hmah thata a phaohpa hawhta â hrô aw.

²⁵ Babylaw bei bâhzy tha patlô aw na ta, Phiraoh bâhzy deikua cha â pathliah aw. Babylaw bei ku liata ei zaozi chabasa aw na ta, Izi râh chô liata zaozi a hy tita, kei he Abeipa ei châ tahpa ama pahno aw.

²⁶ Izi mo cha phopizy hry liata hiepatla aw ei na ta, râh to liata ei papai aw ei. Chatanachata Abeipa ei châ tahpa ama pahno aw.”