EZEKIA 3 - Mara Bible RV (BSI)

¹ Abeipa ta ei hnohta, “Chyhsa sawchapawpa y, he liata na hmôpa maih nie teh. Châbu chatypa he nie la, Izarei pathlazy hnohta bie kei reih teh,” tah ta.

² Chatanachata ei pakah â na ta, châbu chatypa cha nie awpa ta na pie ta.

³ Ei hnohta, “Chyhsa sawchapawpa y, châbu chatypa ei cha piepa heta na py pasa la, na rih pabie mah y,” na tah ta. Nie na ta, kheihti hawhta ei pakah liata thlôh ta.

⁴ Chatawhcha Abeipa ta ei hnohta, “Chyhsa sawchapawpa y, Izarei pathlazy lâ sie la, ama hnohta ei biezy he kei reih teh.

⁵ Reih hropa nata reih rupa a cheihpa phopi lâta tuapa châ leipa chi ta, Izarei pathlazy lâta tuapa tlao na châ.

⁶ Ama biereipazy na pahno leipa, reih hropa nata reih rupa phopi hluhpi lâta tuapa châ va chi. Chazy lâta cha tuah aw sah la cha, âmo la na bie ama nathlie cheingei aw.

⁷ Izarei pathlazy deikua cha, khi châpa nata palôh kuhchhapa ama châpa vâta, ei bie nathlie khoh leipa ei ta, nâma bie chhao nathlie khoh aw veih ei.

⁸ Moh teh, na hmia cha âmo hmia châpa tlu ta châ awpa ta tao ha na ta, na khi chhao âmo khi châpa tlu ta châ awpa ta ei tao haw.

⁹ Na khi cha pachielô hlâta a châ viapa alô châ chaipa hawhta ei tao aw. Saw chhorupazy châ hra ei sala, âmo cha chi leipa la, ama hmiaphaozie vâta na thlazoh khah sy,” tah ta.

¹⁰ Abeipa ta ei hnohta reih heih ta, “Chyhsa sawchapawpa y, na hnohta bie ei rei awpa zydua he, na nah ta thei la, na palôh liata khô ha mah y.

¹¹ Seichâna liata a ypa na phopi sawzy lâ sie la, ama nathlie tlyma, nathlie vei tlyma, ama hnohta, ‘Abeipa Zehôvâh ta hetana heta a tah,’ tahpa ta âmo cha kei chho mah y,” tah ta.

¹² Chatawhcha Thlahpa ta na chalo ta, ei hnôh lâ tawhta losihpa ru ngaitapa pyu thei na ta, “Abeipa rônahna cha a pahrâna su tawhta reithaipa ta y mawh sy!” tahpa ta ao vaw pua ta.

¹³ Chazy cha hmohrohneipazy mathlaw â tyhpa pyu, ama kiapâh liata tiakizy pyu nata losihpa ru ngaitapa pyu zy a châ.

¹⁴ Thlahpa ta na chalo ta, na siekhei ha ta. Abeipa ku thatlôpa ei chô liata a y thlâh hana chôta, palôh pasa ngaitapa nata hiehâh ngaitapa ta sie na ta.

¹⁵ Seichâna liata a ypazy pahrâna Khebâ chavah kiah liata Telâbi kei tlô na ta. Ama pahrâna su liata noh sari a tyuh na ta. Cha liata hmo ei hmôpazy ta thata na pahlaw ta.

Izarei riahvaituhpa

¹⁶ Noh sari a chhâ nahta, Abeipa bie ei hnohta vaw tlô ta:

¹⁷ “Chyhsa sawchapawpa y, Izarei pathlazy vaituhpa ta ei cha tao. Ei pakah tawhta bie na theina maihta, kei tawhta zikyurâna bie na chho lymâ aw ei.

¹⁸ Moleipa hnohta, ‘Na thi tlai awpa a châ,’ ei tah tita, cha moleipa cha a hrona pabohsa awpa ta zikyu a râ leipa la, a moleina lâpi siesai awpa ta chho hra leipa la, a paraona vâta a thi khiahta cha, a thisaih maoh na phaoh aw.

¹⁹ Moleipa cha zikyu a râ ha la, a moleina siesai leipa sala, a moleina lâpi â heihsai leipa khiahta deikua cha, a paraona vâta thi aw ta, nâ deikua cha na hro na pabohsa aw.

²⁰ “Cha hawh pyly ta, chyhsa siapa cha a siana a heihsai ta, hmo doleipa a taopa vâta, a hmiakô liata achapiana ei so khiahta cha, a thi aw. Zikyu nâ râ leipa vâta, a moleina vâta thi aw ta, hmo pha a taopazy a theipa châ khao aw vei. A thisaih maoh deikua cha na ku liata a y aw.

²¹ Chyhsa siapa cha molei lei awpa ta zikyu a râ ha la, a molei leipa khiahta cha, zikyurâna â papeisapa vâta hroh aw ta, nâ chhao na hro na pabohsa aw,” tah ta.

Hrohsopa bie reih thei vei

²² Cha su liata Abeipa ku cha ei chô liata y ta, “Thyu la, saikao by lâ sie teh. Cha liata bie ei châ chho aw,” na tah ta.

²³ Chatanachata thyu na ta, saikao by lâ cha sie na ta. Cha liata Abeipa rônahna a vaw duah thlâh hapa hmô na ta. Khebâ chavah kiah liata rônahna ei hmôpa hawhpa kha a châ. Chatawhcha â khu lâta pao na ta.

²⁴ Châhrasala Thlahpa ei chhôh liata a vaw ngia ta, ei phei ta na paduasa ta, ei hnohta, “Sie la, na o liata a kei khawhlôh teh.

²⁵ Hy chyhsa sawchapawpa y, pachâ teh, ama hry liata na pua ei thei lei nawpa ta, chaorizy ta cha buh aw ei ta, ama cha chahry aw.

²⁶ Na reih pathlie thei leipa ta, âmo na chhorei thei lei nawpa ei ta, na paleih na dâh liata ei pabaisa ha aw. Saw chhorupazy ama châ.

²⁷ Na hnohta bie ei rei tita deikua cha, na pakah pahy aw na ta, ama hnohta, ‘Abeipa Zehôvâh ta hetana heta a tah,’ na tah aw. A thei khohpa ta thei aw ta, a thei khoh leipa cha thei leipa ta a y aw. Saw chhorupazy ama châ.