EZEKIA 27 - Mara Bible RV (BSI)

Tyre châta chaphôhtuna

¹ Abeipa bie ei hnohta vaw tlô ta:

² “Tahmâ nâ, chyhsa sawchapawpa y, Tyre châta chaphôh tu la,

³ tilaipi hawkazy liata pahrâpa ta, tilaipi kiah râh hluhpi châta sôhpalietuhpa ta a ypa Tyre hnohta, Abeipa Zehôvâh ta hetana heta a tah, tah mah y: “Hy Tyre y, ‘Chhithai pakipa ei châ’ tah chi ta.

⁴ Na râh cha tilaipizy châ ta, Châ paduatuhpazy ta chhithai pakipa ta Ama cha paduapa na vaw châ tlai he!

⁵ Na thophia zydua cha Seni meisah thozy hmâh ei ta, Na balyh tôh châta Lebanaw sidy tho ama la.

⁶ Bâsanâ ôkâ thozy hmâpa ta na balyh hiana tao ei ta, Na balyh siphiah chhao, Kiti liahpahlô meisah tho châpa hmâpa ta phawpa châ ta, Sianaoh ta tobipa a châ.

⁷ Na balyh pohraipa cha, Izi pala rih dipa ta a chei zeipa châ ta, Cha cha nâma ngiana pohraipa châta hmâpa a châ. Nohdi châta na chô khuna poh chhao, Elisâ liahpahlôzy tawhta poh nohpa nata nohsaihpazy a châ.

⁸ Sidaw nata Avadâ liata a pahrâpazy cha, Na balyh hiatuhpazy châ ei ta, Hy Tyre, na balyh haotuhpazy chhao, Na chyhsa zôthaipazy ama châ.

⁹ Na balyh a taotuhpazy cha, Kebâli machâzy nata chyhsa zôthaipazy châ ei ta, Tilaipi balyh zydua nata balyh liata hriatuhpazy chhao, Na chhôh liata y ei ta, Na sôhzy ama palie tyh.

¹⁰ “Chariah a dyuh awpa ta na pheisaihzy cha, Persia nata Ludi nata Puti mozy ama châ. Ama vyhphao nata ama thua lakhu zy nâ liata baih ei ta, nâma châ parônahsatuhpa ama châ.

¹¹ Na thokhyzy chô liata Avadâ nata Hele pheisaihzy y ei ta, Kâmâ pheisaihzy chhao, na o sâhpazy liata ama y. Na thokhyzy liata ama vyhphaozy baih ei ta, na chhithaina ama pakisa.

¹² “Hmo to liata na hneirôh ngaitapa vâta, Tâsi ta châ daoh ta, na hmobaohzy cha tâkâ, thua, râhvâ nata ky zy ta a cha ri tyh.

¹³ Zavâ mo, Tubâ mo nata Mese mozy chhao ta châ daoh ei ta, chyhsapa nata dawh chhaichhizy ta na hmobaohzy ama cha ri tyh.

¹⁴ Betôkamâ tawhta arâzy, adyuhna arâzy nata sabaituzy vaw phaoh ei ta, na hmobaohzy nata ama cha ri tyh.

¹⁵ Dedâ mo chhao ta châ daoh ei ta, tilaipi kiah râh hluhpizy chhao, na hmo zuana râhzy ama châ. Na hmozy ama chaleina mâ châta sianaohzy nata tho vyhpazy ama cha pie.

¹⁶ Hmo hluhpi na hneipa vâta, Aramia chhao ta châ daoh ta, lôsôhpa nohpa, poh nohsaihpa, poh kiky zeipa, pala rih dipa, taikuh lô nata rubi lôsôhpazy vaw phaoh ei ta, na hmozy nata ama cha ri tyh.

¹⁷ Zudâh nata Izarei râh chhao ta châ daoh ei ta, Mini khih âtâ sâh, hmo thlôhpazy, kheihti, sathaw nata thohnazy ta na hmozy ama cha ri tyh.

¹⁸ Hmo hluhpi papua chi ta, hmo to liata na hneirôh ngaitapa vâta, Dâmaskâ chhao ta Helbô kresawhti nata Sâhâ mietaku hmi zy ta a châ daoh.

¹⁹ Uzalâ kresawhti ta na hmozy cha ri ei ta, thua, lôiasoh nata basuhzy ta na sôhdaoh hmozy ama cha ri tyh.

²⁰ Dedâ mo chhao ta arâ ky padiana pohzy ta na hmozy ama cha ri tyh hra.

²¹ Arabia mo nata Kedâ beimachâ zydua cha mietakutawzy, mietaku tôhpazy nata miezy ta sôh na palielâh khoh kawpazy châ ei ta, hezy heta na hmozy ama cha ri tyh.

²² Sebâ nata Râmâ sôhpalietuhpazy ta châ daoh ei ta, ia-ô pahâh chaipa chi to, lôsôhpa chi to nata ngôh zy ta na hmozy ama cha ri tyh.

²³ Harânâ, Kâne nata Idâh mozy ta châ daoh ei ta, Sebâ, Asuria nata Khimâ sôhpaliepazy ta ama châ daoh.

²⁴ Âmo heta pohthâ phapazy, chysia nohpa nata chysia kiky zeipazy, siphiah poh rôh ngiapa, chaori ta â i ngaitapa ta phiehpazy ta na sôhdaohzy liata ama châ daoh.

²⁵ Tâsi balyhzy ta na hmozy phaohpa ta ama sie tyh. “Hmozy ta pabiepa ta y chi ta, Tilaipizy liah liata Hmo a hri ngaitapa na phaoh tyh.

²⁶ Na balyh hiatuhpazy ta cha puakhei ei ta, Tilaipi chatlaopa ru ngaitapa lâ ama cha puakhei. Nochhi thlih ta cha chanaoh ta, Tilaipizy liah liata a cha chanaoh.

²⁷ Na paona noh liata cha, Na hneirônazy nata na hmobaohzy nata na sôhdaohnazy, Na balyh pheisaihzy nata na balyh haohtuhpazy, Na balyh taotuhpazy nata na sôdaohpazy, Nâ liata a ypa na pheisaih zydua, Na balyh liata hriatuhpa zydua nata na chhôh liata a ypa zydua cha, Tilaipi chhôh liata pamôhpa ama châ aw.

²⁸ Na balyh haohtuhpazy awhpa pyu ta, Tilaipi kiah râhzy chalyusa ta,

²⁹ Balyh hiana sôh a patutuhpa zydua cha, Balyh tawhta ama vaw chô khai aw. Balyh pheisaihzy, Tilaipi chô liata balyh haohtuhpa zydua chhao, Ngiahkâ liata amâ duah aw.

³⁰ Nâma kyh vâta thata awh aw ei ta, Palôh pasapa ta ama cha aw. Ama luh liata buchâh mia aw ei ta, Dohlei liata amâ taikalô aw.

³¹ Nâma vâta ama luh papôlô aw ei ta, Ama chai liata latho poh amâ sai aw; Palôh pasapa ta cha chakhei aw ei ta, Pachârôhpa ta mâchhie ama cha sapa aw.

³² Chaphôhtuna hla cha phi aw ei ta, Chaphôh ama cha tupa aw. Tyre hawhpa he ahy ma a y tly? Tilaipi liah liata pahleipadiapa ahy ma a y tly?

³³ Na hmozy tilaipi tawhta a vaw tlô tita, Phopi hluhpi lôhrâ na patlô tyh; Na hneirôna nata na sôdaohna hluh ngaitapazy hmâpa ta, Lei beizy na pahneirôhsa ei.

³⁴ Tahmâ deikua cha, Tilaipi liata paraopa châ chi ta, Ti athupazy liata na rao haw; Na hmozy nata na balyh liata hriatuhpa zydua chhao, Na hnohta ti ry lâ amâ ngua khai haw.

³⁵ Tilaipi kiah râhzy liata a pahrâpa zydua ta Noâhpa ta ama cha moh; Ama beizy cha chipa ta ama pôhmi a loh ta, Ama hmia a hlâh khai haw.

³⁶ Phopizy hry liata sôdaohpazy ta Ama hmao ama cha tô chie, Rarôh ypa ta chhâ ha chi ta, Khatita hmahta y heih khao aw va chi.”