EZEKIA 26 - Mara Bible RV (BSI)

Tyre kyh hrohsona bie

¹ Kô hrawh hleikhana, thla khana, noh khana noh ta, Abeipa bie ei hnohta vaw tlô ta:

² “Chyhsa sawchapawpa y, Tyre ta Zerusale kyh liata, ‘A pha kaw dia, phopizy chhikao rao ha ta, ei châta â pahy haw. Tahmâ cha khih rypa châ ha ta, chavâta ei dôhkhâh ha aw,’ a tahpa vâta,

³ Abeipa Zehôvâh ta hetana heta a tah: Pachâ teh, Hy Tyre, ei châ dyuh na. Tilaipi tichatlaopa hawhta, nâma a dyuh awpa ta phopi hluhpi hrâ ei vaw pasiesa aw.

⁴ Tyre thokhyzy parao aw ei ta, a o sâhpazy ama pacho aw. A chhaohlei zydua hao pathlah khai aw na ta, lôpanô chawhkaraipa hawhta ei tao aw.

⁵ Tilaipi liah liata sao zawna su châta hmâ awpa deita a châ aw. Ei reih haw, Abeipa Zehôvâh ta a tah. Tyre cha phopizy châta hraona sôh châ aw ta,

⁶ râh chhôh liata a khichapeihzy chhao zaozi ta paraopa ama châ aw. Chatanachata Abeipa ei châ tahpa ama pahno aw.

⁷ “Abeipa Zehôvâh ta hetana heta a tah: Moh teh u, Babylaw bei Nebukareza, beizy bei cha arâzy, talailihzy, arâ pheisaihzy nata pheisaih hluhpi chhaota, Tyre a dyuh awpa ta maw lâ tawhta ei vaw chhi aw.

⁸ Râh liata na sawchanôzy zaozi ta thie khai aw ta, diahsua ta a cha dôh aw. Na thokhy alei pathlu thlu aw ta, vyhphao lai ngaitapazy a cha padua khâh aw.

⁹ Na thokhyzy chhuh pathlah nawpa ta paraona chhaichhizy tao aw ta, na o sâhpazy ahrei ta a pacho aw.

¹⁰ Arâ a hneipazy a hluh ngaita awpa vâta, ama buchadoh ta a cha khu khai aw. Na thokhy chhikaozy â vaw ngia tita, khihpi thokhy parao hapa liata chyhsazy amâ ngiapa pyu hawhta, arâ pheisaihzy nata talailih tiaki miapalihpazy nata talailihzy pyu ta na thokhyzy amâ chalyu ngâ kaw aw.

¹¹ Arâ chakiezy ta na khih chhôh lâpi zydua a parao khai aw. Na chyhsazy zaozi ta thie aw ta, na otôh pachyupazy alei liata ama pao aw.

¹² Na hneirônazy cha hrao aw ei ta, na sôhpalienazy ama cha chhu khai aw. Na thokhyzy pacho aw ei ta, na o phapazy ama parao khai aw. Na tho nata lô nata lei phapa zy ti liata ama thy aw.

¹³ Na hla pyu ngiapazy chalihsa aw na ta, na totâ pyuzy a diah aw.

¹⁴ Lôpanô ruapa hawhta cha tao aw na ta, sao zawna châ deita na châ aw. Paduapathipa châ khao aw va chi, kei Abeipa ta ei reih haw, Abeipa Zehôvâh ta a tah.

¹⁵ “Abeipa Zehôvâh ta Tyre hnohta hetana heta a tah: Na chhôh liata athietuna y ta, hmahphaohpazy amâ hrô tita, na paona pyu vâna chata tilaipi kiah râhzy a chalyu aw veih ei ma?

¹⁶ Tilaipi kiah râh bei zydua cha, ama beidyuchhai tawhta chô aw ei ta, ama poh rônahpazy hlai aw ei ta, ama chysia a ngiapazy ama pahluh aw. Achalyuna ta tlao a tobi aw ei ta, a chalyupa ta alei liata a tyuh aw ei ta, cha moh aw ei ta noâh ama tah aw.

¹⁷ Chaphôh cha tupa aw ei ta, hetana heta ama cha tah aw: “‘Hy Khihpi moh pathâhpa, Tilaipi chyhsazy pahrâna khihpi, Tilaipi chô liata thatlôpa ta a ypa khihpi y, Tyre nata a khihsawzy cha, Râhsawzy ta ama chi thlâ bao na ta, Na raona cha a rarôh y kaw dia!

¹⁸ Na paona noh liata, Tilaipi kiah râhzy a chalyu ei ta, Na lei noh liata, Liahpahlôzy tymâpa ta ama y.’

¹⁹ “Abeipa Zehôvâh ta hetana heta a tah: Khih rypa ta cha taopa ta, chyhsa pahrâ leina khihpizy hawhta ei cha tao tita, ti a thu ngaitapa liata cha pamôhpa ta, ti lai ngiatapazy ta ei cha pavaosa tita,

²⁰ hlâno chyhsa khaohtlô lâ a zu hapazy hnohta cha pazusa aw na ta, alei ry liata ei cha pahrâsa aw. Khaohtlô lâ a zu hapazy hnohta, hlâno tawhta roryhrapa ta a y hapa khaohtlô liata ei cha pahrâsa aw. Chyhsa pahrâna châ khao aw va chi. Ahrohpazy râh liata deikua cha, ei chhithaina ei chareisa aw.

²¹ Na chhâna noh rarôh ypa ta patlôsa aw na ta, y khao aw va chi. Chyhsa ta cha tlua hra ei sala, cha hmô khao aw veih ei,” Abeipa Zehôvâh ta a tah.