EZEKIA 24 - Mara Bible RV (BSI)Bei a tlao haipa pakhona 1 Kô chakina, thla hrawhna, noh hrawhna noh ta Abeipa bie ei hnohta vaw tlô heih ta: 2 “Chyhsa sawchapawpa y, he noh, tanoh tlai he khâpa noh ma a châ tahpa roh teh. He noh he Babylaw bei ta Zerusale a vaw siehnaona noh a châ. 3 Saw chhorupazy hnohta pakhona bie reih la, ama hnohta, Abeipa Zehôvâh ta hetana heta a tah: “Beih khaih u la, Khaih tlai u la, A chhôh liata ti chhoh teh u. 4 Sa tlozy thla u la, A sa phapa zydua nata a phei nata a palaihzy thla u la, A rupa phapazy ta pabie teh u. 5 Sahroh zawzy hry liata a pha chaipa la u la, A ry liata tho hluhpi ti u la, Patlao teh u. A rupazy chhao pachaopa châ mawh sy. 6 “Chavâta Abeipa Zehôvâh ta hetana heta a tah: Thisaih palo hmâhpa, beih upa khihpi, a upa pathai leipa khihpi cha a hu a po kaw dia! A tlyh hlei leipa ta, sa tlozy cha miakha miakha ta thaoh lymâ muh vy. 7 Thisaih a palopa cha a khihpi chhôh liata y ta, dohlei ta a khu ha awpa ta alei liata patlai leipa ta, lôpanô ruapa chô liata tlao a patlai. 8 Hiehâhna pathyupa ta phuh lana a y thei nawpa ta, thisaih a palopa cha khupa ta a y lei nawpa ta, lôpanô ruapa chô liata ei patlaipa a châ. 9 Chavâta Abeipa Zehôvâh ta hetana heta a tah: Thisaih lona khihpi cha a hu a po kaw dia! Keima tlai ta mei châta thoiah ei chahy thlu aw. 10 Tho thata ti u la, mei patih teh u. Sazy cha a phapa ta pasyuh u la, ia-ôzy thlapa ta, a rupazy u khai ha mawh sy. 11 A pathaih leina zao sala, a upa a kâ khai ha nawpa ta, beih cha a ruapa ta meihei iapa chô liata khaih la, sah sala saih khai ha mawh sy. 12 Cha hawhta taopa chhao ta, a upa cha sia hlei leipa ta, mei chhao ta pasia thei vei. 13 Na pathaih leina cha aohraohna a châ. Cha pathaisa na ta, châhrasala na puana tawhta na pathaih hlei leipa vâta, na chô liata ei hiehâhna a pai hlâlei cha, na pathaih leina tawhta pathaih heih khao aw va chi. 14 Kei Abeipa ta reih ha na ta, a vaw tlô tlai aw. Ei tao tlai aw. A sy leipa aw na ta, pahlôh hra leipa aw na ta, pathleih hra aw va na. Na hroziezy nata na hmotaopazy hawhta pachiapa na châ aw, Abeipa Zehôvâh ta a tah.” Ezekia lapinô thina 15 Abeipa bie ei hnohta vaw tlô heih ta: 16 “Chyhsa sawchapawpa y, moh teh, na mo lôhrâtlôna kha eikhapi ta ei cha lapa ha aw. Mâchhie na sa awpa châ leipa ta, na cha awpa châ hra leipa ta, na mothlih a tla awpa châ hra vei. 17 Arulâta a hrô la, athipa châta mâchhie sa khah y. Na khutho a khu la, na pheikyzy a ky la, pohluh a khu leipa la, rihâ pati chhao nie khah y,” tah ta. 18 My ta zawpi hnohta bie reih na ta, zâlâ ta ei lapinô cha thi ha ta. A mylâ my ta biepiepa ei châpa hawhta tao na ta. 19 Zawpizy ta ei hnohta, “Kha hawhta hmo na taopazy kha, eima châta khâpa yzie ma a hnei tahpa miah chho aw va chi ma?” tah ei ta. 20 Kei ta ama hnohta, “Abeipa bie ei hnohta vaw tlô ta: 21 ‘Izarei pathlazy hnohta, Abeipa Zehôvâh ta hetana heta a tah: Moh teh u, nâma palaikheipa nama thatlôna, nama mo lôhrâtlôna nata nama hro ta a vâ kaw tyhpa ei supathaihpa papuapalei aw na ta, nama siesaipa nama sawchapawzy nata nama sawchanôzy zaozi ta ama pao aw. 22 Ei taopa hawhna tlai heta tao aw ei chi ta, pohluh a khu leipa aw ei chi ta, rihâ sa chhao nie aw veih ei chi. 23 Nama khuthozy a khu aw ei chi ta, nama pheikyzy namâ ky aw. Mâchhie sa leipa aw ei chi ta, cha hra aw veih ei chi. Nama paraonazy liata leilô aw ei chi ta, namâ chakhei raihrie aw. 24 Cha hawhna chata Ezekia cha nama châta ngiana châ aw ta, a taozie lymâ hawhta nama tao awpa a châ. Cha hmo cha a vaw tlô tita, Abeipa Zehôvâh ei châ tahpa nama pahno aw,’ tahpa ta reih mah y, a tah,” tah na ta. 25 “Nâ deikua cha, chyhsa sawchapawpa y, ama thatlôna, amâ lyna nata ama rônahna, ama mo lôhrâtlôna, ama hro ta a tlaichhaipa nata ama sawchapawzy nata ama sawchanôzy âmo tawhta ei lana noh liata, 26 cha noh liana tlai ta arâpa nâ lâ a vy aw ta, thâtih a cha vaw tlôkhei aw. 27 Cha noh liata, a râpa hnohna chata na pakah â aw chi ta, a hnohta bie reih aw chi ta, a chalih thlâh ha khao aw va chi. Chatanachata âmo châta ngiana châ aw chi ta, Abeipa ei châ tahpa ama pahno aw,” tah ta. |