EZEKIA 23 - Mara Bible RV (BSI)

Narô pano

¹ Abeipa bie ei hnohta vaw tlô ta:

² “Chyhsa sawchapawpa y, chanô pano, nô kha sawchanôzy y ei ta.

³ Izi râh liata sihryh ei ta, ama laihsa no tawhta a sihryhpa ama châ. Ama sâhpizy hmiepa ei ta, ama laihsa kôna sâhpizy ama hriapa.

⁴ A uhtheinô moh cha Ôhôlâ châ ta, a nawhtanô moh cha Ôhôlibâ a châ. Kei eih vaw châ ei ta, sawchapawzy nata sawchanôzy sa ei ta. Ama moh kyh liata, Ôhôlâ cha Samâri châ ta, Ôhôlibâ cha Zerusale a châ.

⁵ “Ôhôlâ cha kei eih a châ thlâh ha nota, â zuah ha heih ta, a Asuria mo a khopawzy chô liata a aohraoh ha heih.

⁶ Chysia saihlawpa a tobipa pasaiphazy, râhvaotuhpazy nata pheisaih hyutuhpazy chô liata aohraoh ta, cha chyhsazy cha ama zydua ta satlia khochhih ngaitapa sai châ ei ta, arâ pheisaihzy ama châ.

⁷ Asuria molaipa zydua liata â zuah ta, a sihryhkheipa chyhsazy khazoh nothlahpa zydua ta â papuapalei.

⁸ Izi râh liata a y no tawhta a pathao hapa a sihryhna kha bâhsai vei. A laihsa no tawhta chapawzy ta a ziakhei ei ta, a laihsa kôna sâhpizy hria ei ta, ama aohraohna sihryhna a chô liata ama lei thlu tyh.

⁹ “Chavâta a khopawzy liata hlâ na ta, aohraohpa ta a tlaichhaipa Asuria mo ku liata ei hlâ haw.

¹⁰ Âmo chata thluahruapa ta soh ei ta, a sawchapawzy nata a sawchanôzy lapa ei ta, ano chhao zaozi ta ama thie haw. Chatanachata a thâtih pachiapa a châ tita, chanôzy hry liata pakhona bie ta hmâpa a vaw châ haw.

¹¹ “A narônô Ôhôlibâ ta cha cha hmô ta, a uhtanô hlâta paru via ha ta, a sihryhna nata â zuana kyh liata a uhtanô hlâta a paru via syulyu haw.

¹² Ano chhao Asuria mo râhvaotuhpazy nata pheisaih hyutuhpazy chô liata aohraoh ta, chariah chhaichhi zydua a tobipa ta arâ a kiahpa arâ pheisaihzy chô liata chhao aohraohpa ta a tlaichhai kaw ei. Cha chyhsazy cha ama zydua ta satlia khochhih ngaitapa sai ama châ.

¹³ Papuapaleipa ta a ypa cha hmô na ta, ama narô ta lâpi miakha a chhihpa ama châ.

¹⁴ “Ôhôlibâ chhochhi cha â zuana kyh liata a ngia pathu via ta, pâhchhô liata tawpa chapaw nothlahpa, Kaldia mo nothlahpa saih padihpazy taihta a moh tyh.

¹⁵ Cha nothlahpazy cha ama chai liata chaisaih a saihpa ta, khutho a ngia ngaitapa a khu ei ta, ama zydua ta beimachâ hmia phaoh ei ta, Kaldia râh liata a pahrâpa Babylaw mo ama lyu.

¹⁶ Âmo cha a hmô nahta, ama chô liata aohraohpa ta âmo cha tlaichhai kaw ta, Kaldia liata a ypa âmo hnohta lyuhchâpazy tuah ta.

¹⁷ Chatanachata Babylaw mo cha kyhpachâna rakhô liata ano lâ a vy ei ta, ama aohraohna ta ano cha sihryhkhei ei ta, ama papuapalei haw. Babylaw mo ta ama papuapalei khai tawhta, âmo cha thata a hao ta, â heihsai ha ei.

¹⁸ A lâhâhpa ta sihryh ta, a thluahruana a palâsapa vâta, a narônô a hao na ta, ei heihsai hapa hawhna khata, ano chhao a hao na ta ei heihsai ha hra.

¹⁹ Chatanachôta a laihsa nota Izi râh liata â zuapa kha vâpa ta, â zuah via rili ta,

²⁰ alâ tôhpa chhaichhi a lyupa nata arâ baoti a lyupa Kaldia liata a khopawzy chô liata aohraohpa ta a sihryh lymâ.

²¹ Cha hawhna chata na thyutlia nota na aohraohna kha vâ heih chi ta, Izi mo ta na thyutlia sâhpi cha hriapa ei ta ama hmiepa kha na vâ kaw tyh.”

²² Chavâta Hy Ôhôlibâ y, Abeipa Zehôvâh ta hetana heta a tah: “Moh teh, a hao kawpa ta nâ heihsai hapa na khopawzy kha pathyu aw ei na ta, su to tawhta ei cha vaw pasiehnaosa aw ei:

²³ Babylaw mo nata Kaldia mo zydua, Pekô nata Sôâ nata Kôâ mozy nata ama hnohta a ypa Asuria mo zydua, satlia khochhih ngaitapazy, râhvaotuhpazy nata pheisaih hyutuhpa zydua, beimachâzy nata chyhsa moh pathâhpazy, ama zydua ta arâ a kiahpazy châ ei ta, chazy chata ama cha vaw siehnao aw.

²⁴ Chariah chhaichhizy, talailihzy, talailih tiaki miapalihpazy nata phopizy tawhta pheisaih hluhpi hmâpa ta ama cha siehnao aw. Vyhphao laipa nata vyhphao chyhpazy a chabapa ta nata lakhuzy a khupa ta su to tawhta cha vaw siehnao aw ei ta, pachia theina ama hnohta pie aw ei na ta, âmo pachiazie hawhta ama cha pachia aw.

²⁵ Ei hiatliana na chô liata patlôsa aw na ta, hiehâh ngaitapa ta na chô liata hmo ama tao aw. Na hnapasuzy nata na nakhaohzy chhawh pathlah aw ei ta, a laibâhpazy zaozi ta ama pao aw. Na sawchapawzy nata na sawchanôzy cha lapa aw ei ta, a laibâhpazy cha mei ta a kâsao aw ei.

²⁶ Na chysiazy cha pahluhpa aw ei ta, na lôhsôhpa atobina a ngia ngaitapazy ama cha lapa aw.

²⁷ Na aohraohna nata Izi râh tawhta pathaopa ta nâ zuana zy kha pachhâsa aw na ta, chatanachata âmo lâ na mo khaih khao leipa aw chi ta, Izi chhao a thei khao aw va chi.

²⁸ “Abeipa Zehôvâh ta hetana heta a tah: A haopa nata ai kawpa ta nâ heihsai hapazy ku liata ei cha hlâ aw.

²⁹ Châ hao kawpa ta na chô liata hmo taopa ta, na hriapasana theilâpa zydua cha lapa aw ei ta, thluahruapa nata sasaihpa ta ama cha siesaipa ta, nâ zuana na thluahruana hmôpa na châ aw. Aohraohpa ta â zuah chi ta,

³⁰ phopizy liata â zuahpa ta, ama khazoh nothlahpazy ta nâ papuapaleipa vâta, he hmozy he na chô liata a vaw tlôpa a châ.

³¹ Nâ chhao na narônô lâpi a chhih chi ta, chavâta a nyu cha na ku liata ei cha pie aw.

³² Abeipa Zehôvâh ta hetana heta a tah: “Na narônô nyu doh aw chi ta, Nyu tôh seihpa nata nyu laipa tlai na doh aw; A hluhpi â tlôhpa nyu a châpa vâta, Pahneisaopa nata zakheipa na châ aw.

³³ Na narônô Samâri nyu cha, Chichhihna nata roryhrana nyu a châpa vâta, Parina nata pachârôhna ta na bie aw.

³⁴ Nyu chao chhâna taihta doh aw chi ta, Nyu keina taihta pakhei aw chi ta, Cha chata na sâhpizy na hriechheih aw; Kei ta ei reih haw, Abeipa Zehôvâh ta a tah.

³⁵ “Chavâta Abeipa Zehôvâh ta hetana heta a tah: Na my ha chi ta, hnôh eina chhy hapa vâ chi ta, na aohraohna nata nâ zuana maoh cha nâma ta na phaoh awpa a châ.”

³⁶ Abeipa ta ei hnohta reih hei ta: “Chyhsa sawchapawpa y, Ôhôlâ nata Ôhôlibâ cha na pachia aw ei ma? Ama pasichhihnazy ama hnohta phuah mah y.

³⁷ A phei ha ei ta, ama ku liata thisaih a y haw. Ama khazoh nothlahpazy liata a phei ei ta, keima châta ama sapa ama sawzy taih mei liata raopa ta atheihna ta ama hlâ.

³⁸ Cha dei châ vei, he hmo chhao he ei chô liata ama tao: Ama sawzy atheihna ta ama hlâ noh lia tlai ta, ei supathaihpa papuapalei ei ta, ei Pahânohzy taih ama parao.

³⁹ Ama khazoh nothlahpazy lâta atheihna ta hlâ awpa ta ama sawzy ama thie noh ta, cha noh lia tlai ta ei supathaihpa papuapalei awpa ta amâ ngia. Pachâ teh, cha hawna chata ei o chhôh liata ama tao tyh.

⁴⁰ Lâhlapi tawhta chyhsazy a vy awpa ta, âmo lâ lyuhchâpazy tuah ei chi ta, a vy tlai ei ta. Âmo châta na ngai a si chi ta, na mozy rôh hnia chi ta, lôsôhpa thih nata sôhzy ta nâ tobi.

⁴¹ Dyuchhai rônah ngaitapa liata a tyuh chi ta, a hmiakô liata tlâhkhai patyuh chi ta, cha liata ei ropahâhpa nata ei sathaw zy na so tyh.

⁴² Zawpi âmo khotlâ ta a ypazy pyu a hnohta theipa châ ta, chyhsa zawrâpazy chhaota râhchawhpa tawhta sahma paripazy a vaw chhi ei ta, chanôzy ku liata lâkyuzy paky ei ta, ama luh liata lakho ngia ngaitapazy ama pakho.

⁴³ “Chatawhcha apheina ta a tha a pachhâ hapa chanô kyh liata hetana heta ei tah: ‘Azuahnô ta hmâh lymâ mawh ei sy, cha cha a châna dopa a châ.’

⁴⁴ Chapawzy ta âzuahnô liata amâ ngiapa hawhta, a hnohta a ngia ei ta, cha hawhna chata chanô aohraohpa Ôhôlâ nata Ôhôlibâ hnohta amâ ngia hapa a châ.

⁴⁵ Châhrasala chyh­sa siapazy ta âmo cha pachia aw ei ta, apheinô châta pachiana nata thisaih a palopa chanô châta pachianazy ta ama pachia aw. Apheinôzy ama châpa vâta, ama ku liata thisaih a ypa ama châ.”

⁴⁶ Abeipa Zehôvâh ta hetana heta a tah: “Âmo lâ zawpi a vaw chhi u la, âmo cha pachisa ei sala, hrao mawh ei sy.

⁴⁷ Zawpi ta alô ta vawh aw ei ta, ama zaozi ta ama chhawhsao aw. Ama sawchapawzy nata ama sawchanôzy thie aw ei ta, ama ozy mei ta ama rao aw.

⁴⁸ Cha hawhna chata aohraohna cha râh tawhta pahlei aw na ta, cha cha chanô zydua châta zikyurâna châ aw ta, nama aohraoh tyhpa hawhna khata aohraoh khao leipa ta nama y ha aw.

⁴⁹ Nama aohraohna cha nama chô liata cha vaw palie thlusa aw ei ta, khazoh nothlahpa namâ chhyna nama moleina ty nama phaoh aw. Chatanachata kei he Abeipa Zehôvâh ei châ tahpa nama pahno aw,” tah ta.