EZEKIA 22 - Mara Bible RV (BSI)

Thisaih lona khihpi

¹ Abeipa bie ei hnohta vaw tlô ta:

² “Nâ, chyhsa sawchapawpa y, thisaih lona khihpi cha na pachia aw ma, na pachia aw ma? Na pachia awpa khiahta cha, a pasichhihna zydua phuah thlu mah y.

³ A hnohta reih la, Abeipa Zehôvâh ta hetana heta a tah: Hy khihpi, khazoh nothlahpazy taopa ta, nâmasasyh ta a papuapalei chi ta, khihpi chhôh liata thisaih na palopa vâta, na daihti a vaw tlô hai.

⁴ Thisaih na palona liata thailei châ ha chi ta, khazoh nothlahpa na taopazy ta a papuapaleipa ta, na nohzy pahniasa chi ta, na kôzy a vaw tlô haw. Chavâta phopizy ta ama reipachhie awpa ta cha tao na ta, râh zydua ta ama pahneisao awpa ta ei cha tao haw.

⁵ Lâhnia lâhla ta a ypazy ta cha pahneisao aw ei ta, na moh papuapaleipa châ aw ta, tymâna ta na bie aw.

⁶ “Moh teh, nâma liata a ypa Izarei beimachâzy cha, ama zydua ta ama hmotaotheina lymâ hawhta, thisaih palo a hmâhpa sai ama châ.

⁷ Nôpaw za leina khihpi chhôh liata y ta, chihropa mapaihpa tlybaipa ta a hmo chhu ei ta, paw hnei leipa nata nôhmei chô liata â doleipa ta ama tao tyh.

⁸ Ei hmo pathaihpazy saw ta reih leipa chi ta, ei Pahânohzy na papuapalei.

⁹ Thisaih palo awpa ta chyhsa leih a hmâhpazy khihpi chhôh liata y ei ta, tlâhpizy liata pati a niepa chyhsazy chhao y ei ta, sihryhna hmo a taopazy chhao ama y.

¹⁰ Ama paw lapinô a ziakheipazy khihpi chhôh liata y ei ta, chanôzy ama thaitlyh lei nota a ziakheipazy chhao ama y.

¹¹ Chyhsa ta a vaih lapinô chô liata hmo pasichhihpa tao ta, mohropa ta sihryh ngaitapa ta a myuhnô papuapalei ta, mohropa ta a sietanô, a paw sawchanô tlai cha khihpi chhôh liata a ykhei.

¹² Thisaih palo nawpa ta, panaopapana khihpi chhôh liata la ei ta, a pôhna nata â thôhna la chi ta, na vaihzy tlybaipa ta athôhna hmô chi ta, kei deikua cha eina my ha chi,” Abeipa Zehôvâh ta a tah.

¹³ “Chavâta pachâ teh, avyuhna ta nâ thôhna nata khihpi chhôh liata thisaih na palona zy vâta na chô liata ei ku ei pathla aw.

¹⁴ Na chô liata hmo ei taona nohzy liata, na riahphana pachyu theipa ta, ku thatlôpa ta na y thei aw ma? Kei Abeipa ta reih ha na ta, ei tao aw.

¹⁵ Phopizy hry liata cha hiezâhpa ta, râh to liata cha papai aw na ta, na pathaih leinazy ei pachhâsa aw.

¹⁶ Na hmotaopa cheingei ta phopizy mohmô liata cha papuapalei aw ta, chatanachata Abeipa ei châ tahpa na pahno aw, tah mah y,” tah ta.

¹⁷ Abeipa bie ei hnohta vaw tlô ta:

¹⁸ “Chyhsa sawchapawpa y, Izarei pathlazy cha kei châta syu ie châ ha ei ta, ama zydua ta patina mei liata dawh, râhvâ, thua nata ky zy châ ei ta, tâkâ syuiepa ama châ haw.

¹⁹ Chavâta Abeipa Zehôvâh ta hetana heta a tah: Syu ie nama châ khai hapa vâta, moh teh u, Zerusale liah liata ei cha pahmaoh aw ei.

²⁰ Chyhsa ta tâkâ, dawh, thua nata ky zy patina mei liata pahmaoh ta, patisa awpa ta mei a hmô thlupa hawhta, ei hiehâhna nata ei pathiiana ta cha pahmaoh aw ei na ta, patina mei liata cha soh aw ei na ta, ei cha pati aw ei.

²¹ Zerusale liata cha pahmaoh aw ei na ta, ei hiehâhna mei cha hmô thlu aw ei na ta, cha liata ei cha pati aw ei.

²² Patina mei liata tâkâ patipa hawhta, nâmo chhao cha lia liata patipa châ aw ei chi ta, kei Abeipa heta ei pathiiana nama chô liata ei cha leih thlu ei tahpa nama pahno aw,” tah ta.

²³ Abeipa bie ei hnohta vaw tlô ta:

²⁴ “Chyhsa sawchapawpa y, râh hnohta hetana heta reih teh. Râh pasipathai leipa châ chi ta, ruchhôna noh liata vâsua ti a to leipa na châ.

²⁵ Râh beizy cha chakeibarôhneipa a rôh ta, sa tai ta, a hriechheihpa lyu ei ta, arulâta chyhsa teipa ta, chyhsa hronazy la ei ta, chyhsa ryubyhzy nata hmo sôhpazy lapa ei ta, râh liata nôhmei hluhpi ama paysa.

²⁶ Râh theihthaipazy ta ei ryhpa thata parao ei ta, ei hmo pathaihpazy ama papuapalei. Hmo pathaihpa nata hmo zawrâpa pahrua leipa ei ta, hmo pathaih leipa nata hmo pathaihpa likah ananona pachu hra veih ei. Ei Pahâ­nohzy chhao a papeisa veih ei. Chavâta ama hry liata papuapaleipa ta ei y.

²⁷ Râh beimachâzy cha changie zohpa ta sa tai ta, a hriechheihpa lyu ei ta, â doleipa ta athôhna ama hmô thei nawpa ta, thisaih palo ei ta, chyhsa hronazy ama pahleipadia.

²⁸ Râh liata hrohsopazy hra ta, râh chhituhpazy hmotao pha leipazy cha hlyu râhpa hniapa ei ta, âmo châta aluahna phichhyhpazy hmôpa ei ta, haipa ta pachaopa ei ta, Abeipa ta a rei leipa tlai ta, ‘Abeipa Zehôvâh ta hetana heta a tah,’ ama tah tyh.

²⁹ Râhsawzy chhao ta, chyhsa hmozy chhu ei ta, chyhsazy hrao ei ta, dyhchhiepa nata phahlapazy tlybaipa ta, chihropa mapaihpazy chô liata nôchhiepa ta y ei ta, amâ dona nata tovyuhzy ama pakhâ tyh.

³⁰ “Râh cha ei parao lei nawpa ta, a dôhna thokhy a tao awpa nata ei hmiakô liata râh châta apyupa liata a duah awpa chyhsa ama hry liata tlua na ta, châhrasala pakha hmah hmô veih ei na.

³¹ Chavâta ei ruchhôna ama chô liata lei thlu ei na ta, ei hiehâhna mei ta âmo cha pakâpa ta, ama hrozie hawh tlai ta ama luh chô liata ei lie thlu ha ei,” Abeipa Zehôvâh ta a tah.