EZEKIA 21 - Mara Bible RV (BSI)

Abeipa zaozi

¹ Abeipa bie ei hnohta vaw tlô ta:

² “Chyhsa sawchapawpa y, Zerusale lâ hmiachhypa ta, supathaihpazy hnohta bie chho la, Izarei râh chô liata hrohsona bie phuah mah y.

³ Izarei râh hnohta, ‘Abeipa ta hetana heta a tah: Moh teh, ei châ dyuh hih. Ei zaozi a paih tawhta phia aw na ta, mosiapa chhao moleipa chhao, nâma tawhta ei chhawh pathlah khai ha aw ei.

⁴ Mosiapa chhao moleipa chhao nâma tawhta ei chhawh pathlah khai ha awpa vâ ei ta, ei zaozi a paih tawhta phia aw na ta, chho lâ tawhta maw lâ taihta chyhsa zydua ei chhawh pathlah khai aw ei.

⁵ Chatanachata chyhsa zydua ta kei Abeipa heta ei zaozi a paih tawhta phia ha na ta, a paih liata khô heihpa châ khao aw vei, tahpa ama pahno aw.

⁶ “Chavâta chyhsa sawchapawpa y, palôh keichheihpa nata pachâchhie ngaitapa ta a hrô la, ama mohmô lia tlai ta a hrô mah y.

⁷ ‘Khazia nâ hrô?’ ama cha tah khiahta cha, ‘Thâtih a vaw tlô haipa vâta a châ. Cha tita cha palôh to dua aw ta, ku zydua thazeipa ta a y aw. Hro to panao aw ta, pakhu zydua ti hawhta a nai aw. Moh teh, cha daihti cha vaw tlô hai ta, cha hmo cha patlôpa a châ aw, Abeipa Zehôvâh ta a tah,’ tahpa ta reih mah y,” tah ta.

⁸ Abeipa bie ei hnohta vaw tlô heih ta:

⁹ “Chyhsa sawchapawpa y, hrohsona bie phuah la, Abeipa ta hetana heta a tah tah mah y: “‘Zaozi, zaozi cha a tiahpa ta chatapa châ ta, Padiehsapa a châ haw;

¹⁰ Chyhsa chhawh nawpa ta chatapa châ ta, Dôhla hawhta pathliesapa châ ta, Padiehsapa a châ haw! Eima tha a pha aw ma? Ei sawchapawpa y, chôchahrei mohnao chi ta, tho ta taopa zydua na mohnao.

¹¹ Chavâta zaozi cha padiehsapa châ ta, a chaba awpa ta piepa a châ haw. Thietuhpa ku liata pie awpa ta, zaozi cha a tiahpa ta chatapa châ ta, padiehsapa a châ haw.

¹² Cha hmo cha ei phopi chô liata a tlô awpa a châpa vâta, Hy chyhsa sawchapawpa y, awh la, thata sâh mah y. Izarei beimachâzy chô liata chhao tlô aw ta, ei phopi chhaota hmaohkha ta zaozi liata hlâpa ama châ aw. Chavâta na chakhai a chabaih teh.

¹³ Pasiana y tlôh aw ta, zaozi mohnaopa chôchahrei cha y khao leipa sala, kheihta a châ aw?’ Abeipa Zehôvâh ta a tah,” tah ta.

¹⁴ “Chavâta chyhsa sawchapawpa y, hrohsona bie phuah mah y. Na ku chabaih la, zaozi ta ei no chhawh sala, a châ na, ei thôh chhawh mawh sy. Cha zaozi cha thie nawpa zaozi châ ta, âmo dôhpa ta, thiena rarôh ypa ta a thie awpa zaozi a châ.

¹⁵ Chatanachata ama palôh dua aw ta, chyhsa hluhpi ama pao aw. Ama thokhy chhikao zydua zaozi patliepa hnohta ei hlâ haw. Cha cha dôhla hawhta taopa zaozi châ ta, thie nawpa ta taopa zaozi a châ.

¹⁶ Hy zaozi y, na chachâh lâ chhawh la, na chavei lâ chhao chhawh la, nâ heina lâ maih chhawh lymâ mah y.

¹⁷ Kei chhao ei ku chabaih aw na ta, ei pathiiana a pai ha aw, kei Abeipa ta ei reih haw, tahpa ta na reih aw,” tah ta.

¹⁸ Abeipa bie ei hnohta vaw tlô heih ta:

¹⁹ “Chyhsa sawchapawpa y, Babylaw bei zaozi vaw tlô nawpa ta, lâpi miano pahnona tao mah y. Cha lâpi mianopazy cha râh miakha tawhta a vaw pua awpa a châ. Lâpi pahnona tao la, khihpi angiana hawka liata tao mah y.

²⁰ Amawna mo khihpi Râbâ lâ zaozi vaw tlô nawpa lâpi pahnona tao la, Zudâh râh Zerusale thokhy khihpi lâpi pahnona chhao tao mah y.

²¹ Pachao awpa ta Babylaw bei cha lâpi miano atyhna lâtlei liata a duah ta, châtaizy chatho ta, terâfizy a saohiahpa ta, sa pathi moh ta.

²² Zerusale châta pachaona cha a chachâh lâta vaw tlô ta, thokhy paraona tao awpa zy, thie awpa ta biepie awpa zy, adyuhna hladyuh pathluah awpa zy, thokhy chhikao paraona tao awpa zy, thokhy parao nawpa ta alei pathlu thlupa ta, khihpi dôhna diahsua chhôh awpa kyh zy a vaw tlô.

²³ Châhrasala âmo châta pachaona doleipa hawhta a châ aw. Bie a taih ei ta, châhrasala patupa ama châ thei nawpa ta, ama thaileichâna apahnona a taopa deita a châ.

²⁴ “Chavâta Abeipa Zehôvâh ­ta hetana heta a tah: Nama thaileichâna a thei thlâh ha awpa ta nama tao hapa vâta, nama paraonazy a vaw lâ ta, nama hmotaopa zydua liata nama moleinazy â lâ lymâ. A thei thlâh hapa nama châpa vâta, ku ta patupa nama châ aw.

²⁵ Hy Izarei bei puapa nata moleipa y, na noh vaw tlô ha ta, nâma hrie pachie nawpa daihti a vaw tlô haw.

²⁶ Abeipa Zehôvâh ta hetana heta a tah: A khutho hlai u la, a beilakho pahluh teh u. Hmozy ama ualuapa ta y khao aw veih ei. Anawhpazy cheihchalo u la, cheihchalopazy panawh teh u.

²⁷ Raona, raona, raona ei tao aw. Châhrasala paraotuhpa a vaw tlô hlâlei cha, paraopa châ mâh aw vei. A vaw tlô tita paraotuhpa hnohta ei hlâ aw.

Amawna mo pachiana

²⁸ “Hy chyhsa sawchapawpa y, hrohsona bie phuah la, Amawna mo nata âmo reipachhiena kyh liata, ‘Abeipa Zehôvâh ta hetana heta a tah: Hy Zaozi, Hy zaozi, thie awpa ta na paih tawhta â phia la, dôhla hawhta pathlie awpa ta padiehsapa ta y mah y.

²⁹ Nâma kyh liata aluahna doleipa hmô ei ta, haipa ta ama pachao. Thie awpa ta raopa molei puapazy rao tlao na chhawh aw. Ama noh vaw tlô ha ta, âmo hrie pachie nawpa daihti a vaw tlô haw.

³⁰ “‘Zaozi cha a paih liata khô heih mah y. Paysapa na châna su, na puana râh lia tlai ta, ei cha pachia aw.

³¹ Ei ruchhôna na chô liata cha lei thlupa ta, ei hiehâhna mei na chô liata patih aw na ta, chyhsa nôchhiepa, pahleipadia a thaipazy ku liata ei cha hlâ aw.

³² Mei liata tipa châ aw chi ta, alei liata na thisaih loh aw ta, a thei thlâh hapa châ khao aw va chi, kei Abeipa ta ei reih haw,’ tah mah y,” tah ta.