EZEKIA 20 - Mara Bible RV (BSI)

Izarei moleina apathopazy

¹ Kô sarina, thla pangawhna, noh hrawhna noh liata, Abeipa a saohiah awpa ta Izarei machâ thokhazy a vy ei ta, ei hmiakô liata a tyuh ei ta.

² Abeipa bie ei hnohta vaw tlô ta:

³ “Chyhsa sawchapawpa y, Izarei machâzy chho la, ama hnohta, Abeipa Zehôvâh ta hetana heta a tah: Keima nâ saohiah awpa ta a vypa ma nama châ? Ei hrona reipa ta ei reih. Nâmo a saohiah awpa ta y aw va na, Abeipa Zehôvâh ta a tah, tah mah y.

⁴ Âmo cha na pachia aw ei ma, Hy chyhsa sawchapawpa, na pachia aw ei ma? Âmo pathlatuhpazy pasichhihnazy pahnosa la,

⁵ ama hnohta, Abeipa Zehôvâh ta hetana heta a tah: Izarei ei tlyh nota, Zakaw chipathlazy hnohta ku chaluahpa ta bie a taih na ta, Izi râh liata ama y nota keimasasyh ta ei pahnosa ei. Ku chaluahpa ta, ‘Kei he Zehôvâh nama Khazohpa ei châ,’ tahpa ta bie a taih ei na ta.

⁶ Izi râh tawhta a chhi papuapa ta, âmo châta râh ei tlua papuapa, sâhpiti nata kheihti lona râh, râh zydua hry liata râh ngia chaipa lâ a ngiakhei awpa ei ta, ku chaluahpa ta, cha noh liata bie ei taih ei.

⁷ Ama hnohta, ‘Chyhsa to nama mo liata nama pasô kawpa hmo pasichhihpazy thy u la, Izi râh khazoh nothlahpazy ta a papuapalei khuh vy. Kei he Abeipa nama Khazohpa ei châ,’ tahpa ta ei chho ei.

⁸ “Châhrasala na chakhia ei ta, na nathlie khoh veih ei. Ama mo ta a pasô kawpa hmo pasichhihpazy cha thy leipa ei ta, Izi râh khazoh nothlahpazy chhao a heihsai veih ei. Chavâta Izi râh liana chata ei pathiiana lei thlupa ta, ei hiehâna âmo papai thlu awpa a chhuah na ta.

⁹ Châhrasala ama hry liata ama pahrâpa phopizy mohmô liata keimasasyh ta â pahnosapa ta, phopizy mohmô lia tlai ta Izi râh tawhta ei kaw chhi papuapa ama châpa vâta, phopizy mohmô liata ei moh papuapaleipa ta a y lei nawpa ta, âmo cha hrie lei awpa lâta hmo ei tao lilaw hapa a châ.

¹⁰ Chatanachata Izi râh tawhta a chhi papua ei na ta, râhchawhpa lâ ei siekhei ei.

¹¹ Chyhsapa ta zyh sala, a hro thei nawpa ta, ei bieraopazy pie ei na ta, ei ryhpazy ei pahnosa ei.

¹² Cha dei châ vei, kei he âmo a pathaisatuhpa Abeipa ei châ tahpa ama pahno thei nawpa ta, âmo nata keima likah liata ngiana châta ei Pahânohzy chhao ei pie ei.

¹³ “Châhrasala Izarei pathlazy cha râhchawhpa liana khata na chakhia ei ta, chyhsapa ta zyh sala a hro nawpa ta ei piepa ei bieraopazy a chhih leipa ei ta, ei ryhpazy dythapa ta, ei Pahânohzy thata ama papuapalei. Chavâta râhchawhpa liata pamua ha awpa ei ta, ei pathiiana ama chô liata lei thlu a chhuah na ta.

¹⁴ Châhrasala ama mohmô liata ei kaw chhi papuapa phopizy hmiakô liata ei moh papuapaleipa ta a y lei nawpa ta, âmo cha hrie lei awpa lâta hmo ei tao lilaw hapa a châ.

¹⁵ Cha dei châ vei, ama hnohta râh ei piepa ei, sâhpiti nata kheihti lona râh, râh zydua hry liata râh ngia chaipa lâ a chhi lei awpa ei ta, râhchawhpa liana khata chyhu sapa ei ta.

¹⁶ Ama khazoh nothlahpazy lâta ama palôh siepa ta, ei ryhpazy thy ei ta, ei bieraopazy a chhih leipa ei ta, ei Pahânohzy ama papuapaleipa vâta, chyhu ei sa thlupa ei a châ.

¹⁷ Chatahrasala ei mo ta âmo cha ngiachhie ta, chavâta pahlôh ei na ta, râhchawhpa liana khata pahleipadia leipa ei na ta, pamua khai hra veih ei na.

¹⁸ “Chatawhcha râhchawhpa liata ama y nona chata ama pathlazy hnohta, ‘Châ pathlatuhpazy bieraopazy a chhih leipa u la, ama ryhpazy zyh hra leipa u la, ama khazoh nothlahpazy ta a papuapalei hra khuh vy.

¹⁹ Kei he Abeipa nama Khazohpa châ na ta, ei bieraopazy a chhih u la, ei ryhpazy a phapa ta zyh muh vy.

²⁰ Kei he Abeipa nama Khazohpa ei châ tahpa nama pahno thei nawpa ta, keima nata nâmo likah liata ngiana châta ei Pahânohzy pathaihsa muh vy tah na ta.’

²¹ Châhrasala ama pathlazy ta nâ dyuh ei ta, chyhsapa ta zyh sala a hro nawpa ta ei piepa ei bieraopazy a chhih leipa ei ta, ei ryhpazy zyh hra leipa ei ta, ei Pahânohzy ama papuapalei. Chavâta râhchawhpa liana khata ei pathiiana lei thlupa ta, ei hiehâhna cha âmo chô liata papai thlu awpa a chhuah na ta.

²² Châhrasala ama mohmô ta Izarei sawzy ei kaw chhi papuapa phopizy hmiakô liata ei moh papuapaleipa ta a y lei nawpa ta, ei ku pako na ta, hrie lei awpa lâta hmo ei tao hapa a châ.

²³ Cha dei châ vei, phopizy hry liata hiepatla awpa nata râhzy lâta papai awpa ta, râhchawhpa liana khata chyhu sapa ei na ta.

²⁴ Ei ryhpazy zyh leipa ei ta, ei bieraopazy thypa ta, ei Pahânohzy papuapalei ei ta, âmo pathlatuhpazy khazoh nothlahpazy lâ ama mo ama padeipa vâta, chyhu ei sa thlupa ei a châ.

²⁵ Cha dei châ vei, bieraopa pha leipazy nata hrona ama hnei lei nawpa ryhpazy lâta âmo cha hlâ ei na ta,

²⁶ ama sawchapaw uhtheipazy atheihna ta pahlâsapa ta papuapalei ei na ta, roryhrapa ta ei paysa ei. Abeipa ei châ tahpa ama pahno thei nawpa ta, cha hmozy cha ei tao.

²⁷ “Chavâta chyhsa sawchapawpa y, Izarei pathlazy chho la, ama hnohta, Abeipa Zehôvâh ta hetana heta a tah: Châ pathlatuhpazy chhao khata, ei chô liata ama ngâchhih leina hro ta ei moh eina pachhiepa ei.

²⁸ Âmo pie awpa ei ta ku chaluahpa bie ei taihpa râh lâ cha a chhi ei na ta, châhrasala tlâh sâhpa nata thokô buh rôhpa ama hmôna su maih liata atheihnazy hlâ ei ta, hmohlâpazy hlâpa ta ei hie eina pahâh ei. Chazy liana chata ropahâhpazy rao ei ta, dopa hlânazy ama hlâ tyh.

²⁹ ‘Su sâhpa nama pangai tyhpa he a moh khâpa nama tah?’ tahpa ta hiahri ei na ta. Chatanachata su sâhpa moh cha tanoh taihta Bâmâ tahpa a châ.

³⁰ “Chavâta Izarei pathlazy chho la, ama hnohta hetana heta tah mah y. Abeipa Zehôvâh ta hetana heta a tah: Châ pathlatuhpazy taozie hawhta nâmosasyh ta a papuapaleipa ta, ama hmo pasichhihpazy liana khata nâmo chhao namâ phei hra aw ma?

³¹ Nama hmohlâpazy hlâ ei chi ta, nama sawzy mei liata raopa ta atheihna ta nama hlâpa liata, tanoh taihta nama khazoh nothlahpa zydua liata namâ papuapaleipa a châ. Hy Izarei pathlazy saih u, nâmo a saohiah awpa chi ei châ ma? Ei hrona reipa ta ei reih, nâmo a saohiah awpa chi châ va na,” Abeipa Zehôvâh ta a tah.

³² “Nama palôh liata, ‘Phopizy hawhta y sih la, râhzy liata chiphozy hawhta y hrapa ta, tho nata lô zy a chhy ei suh u,’ nama tah. Nama pachâpa hawhta vaw y beih aw vei.

Izarei paduapathina

³³ “Ei hrona reipa ta ei reih. Ku thatlôpa nata bâh pazawhpa nata hiehâhna patlaipa ta, nama chô liata ryu ei reih aw, Abeipa Zehôvâh ta a tah.

³⁴ Phopizy hry tawhta châ chhi papua aw ei na ta, hiepatlapa ta nama yna râhzy tawhtapa cha ku thatlôpa nata bâh pazawhpa nata hiehâhna patlaipa ta ei cha pakhy aw ei.

³⁵ Phopi hrozy râhchawhpa lâ châ chhi aw ei na ta, cha liata hmiachhypa ta ei cha pachia aw ei.

³⁶ Châ pathlatuhpazy Izi râh râhchawhpa liata ei pachiapa hawhna ei khata, nâmo chhao ei cha pachia aw ei, Abeipa Zehôvâh ta a tah.

³⁷ Chôchahrei ry liata cha pasiesa aw ei na ta, biehrai ta achahryna liata ei châ chhi aw ei.

³⁸ Chhorupazy nama hry tawhta pasipathai aw ei na ta, ei chô liata hmo a paraotuhpazy chhao ei pasipathai ha aw ei. Ama y chyna râh tawhta a chhi aw ei na ta, châhrasala Izarei râh a ngia aw veih ei. Chatanachata Abeipa ei châ tahpa nama pahno aw.

³⁹ “Nâmo deikua cha, Hy Izarei pathlazy saih u, Abeipa Zehôvâh ta hetana heta a tah: Ei bie nama nathlie lei awpa khiahta cha, tahmâ tawhna heta nama zydua ta sie u la, nama khazoh nothlahpazy cha kei chakao chyu muh vy. Ei moh pathaihpa deikua cha, nama hmohlâpazy nata nama khazoh nothlahpazy ta papuapalei khao khuh vy.

⁴⁰ “Izarei pathla zydua ta, ama zydua tlai ta, Izarei râh liata ei tlâh pathaihpa, Izarei tlâh sâhpa liata na chakao aw ei ta, cha liata âmo ei ly aw ei. Cha liata, nama thyunazy, nama hmohlâpa pha chaipazy nata nama atheihna pathaihpazy ei châ hnaw aw ei.

⁴¹ Phopizy hry tawhta châ chhi papuapa ta, hiepatlapa ta nama yna râhzy tawhta ei cha pakhy ti ei ta, ropahâhpa châta châ pyh aw ei na ta, ei pathaihna cha phopizy mohmô liata nama hry liata ei palâsa aw, Abeipa Zehôvâh ta a tah.

⁴² Châ pathlatuhpazy hnohta pie awpa ta ku chaluahpa ta bie ei taihpa râh, Izarei râh lâ ei châ chhi ti ei ta cha, Abeipa ei châ tahpa nama pahno aw.

⁴³ Cha liata nama hroziezy nata nama hmotaopazy ta namâ papuapaleipa zydua kha a thei aw ei chi ta, hmo pha leipa nama taopa zydua vâna khata nâmosasyh ta namâ pasi kaw aw.

⁴⁴ Nama hrozie chhiepazy hawhta châ leipa ta, moleina hmo nama taopazy hawhta châ hra leipa ta, ei moh vâta nama chô liata hmo ei tao tita cha, Hy Izarei pathlazy saih u, Abeipa ei châ tahpa nama pahno aw, Abeipa Zehôvâh ta a tah.”

Chho lâ râh thâtih

⁴⁵ Abeipa bie ei hnohta vaw tlô ta:

⁴⁶ “Chyhsa sawchapawpa y, chho lâ a heih la, chho lâ cha bie chho la, Neke râhmâhpa râh hnohta hrohsona bie phuah mah y.

⁴⁷ Neke râhmâhpa hnohta, ‘Abeipa bie nathlie teh, Abeipa Zehôvâh ta hetana heta a tah: Moh teh, na chhôh liata mei patih aw na ta, na chhôh liata tho hrohpa nata tho raohpa zydua a kâ khai ha aw. Meipaleih a duah ngâpa cha pachhaipa châ leipa aw ta, chho lâ tawhta maw lâ taihta râh hmia zydua a kâ khai ha aw.

⁴⁸ Kei Abeipa ta ei papuapa mei a châ tahpa chyhsa zydua ta hmô aw ei ta, pachhaipa châ aw vei,’ tahpa ta chho mah y” tah ta.

⁴⁹ Chatawhcha kei ta, “Âh, Abeipa Zehôvah! Chyhsazy ta, ‘Pakhona bie ma a rei vei,’ eina tah ei,” tah na ta.