EZEKIA 2 - Mara Bible RV (BSI)

Ezekia awna

¹ Chatawhcha Abeipa ta ei hnohta, “Chyhsa sawchapawpa y, na phei ta a duah teh, na hnohta bie ei reih aw,” tah ta.

² Ei hnohta bie a rei hai nota, Thlahpa ei chhôh liata a ngia ta, ei phei ta na paduasa ta, ei hnohta bie a reipazy cha ei thei.

³ Abeipa ta ei hnohta hetana heta a tah: “Chyhsa sawchapawpa y, Izarei sawzy lâta ei cha tuah. Chhorupa phopi, keima nâ dyuhtuhpa phopi lâta ei cha tuah. Âmo pathlatuhpazy nata âmo cheingei ta tanoh taihta ei chô liata hmo ama parao ngâ thlâh haw.

⁴ Chhâ sâlâpa nata chhorupazy ama châ. Âmo lâ cha tuah na ta, ama hnohta, ‘Abeipa Zehôvâh ta hetana heta a tah,’ na tah aw.

⁵ Saw chhorupazy châ ei ta, ama nathlie tlyma, nathlie vei tlyma, ama hry liata hrohsopa a y tahpa chhâ cha ama pahno aw.

⁶ “Nâ deikua cha, chyhsa sawchapawpa y, ahloh nata diahsaizy ta cha chadôpa ta, râh cha-iazy hry liata pahrâ hra la, âmo cha chi leipa la, ama biezy chi hra khah y. Saw chhorupazy châ ei ta, chavâta ama biezy chi leipa la, ama hmiaphaozy vâta thlazohpa ta y khah y.

⁷ Saw chhorupazy châ ei ta, ama nathlie tlyma, nathlie vei tlyma, ei biezy he ama hnohta na rei awpa a châ.

⁸ “Nâ deikua cha, chyhsa sawchapawpa y, na hnohta bie ei reipa he nathlie mah y. Kha saw chhorupazy hawhna khata na chhoru hra khah sy. Na pakah â la, ei cha piepa maih nie mah y.”

⁹ Chatawhcha moh na ta, châbu chatypa a chabapa ku ta eina vaw pazapa hmô na ta.

¹⁰ Châbu chatypa cha ei hmiakô liata vaw pakai ta. A hmia a hnôh ta châropa y ta, chaphôhtuna nata mâchhiesana nata hupona zy ropa a châ.