EZEKIA 17 - Mara Bible RV (BSI)

Pahmôpi nata kre zôh pakhona

¹ Abeipa bie ei hnohta vaw tlô ta:

² “Chyhsa sawchapawpa y, Izarei pathlazy hnohta phôhzuapa nata pakhona bie hmâpa ta bie reih la, ama hnohta hetana heta reih teh.

³ Abeipa Zehôvâh ta hetana heta a tah: Pahmôhpi lai ngaitapa, mathlaw phiapa, mathlaw ki seihpa, hmi phi kaluhpa nata chapaipa cha Lebanaw lâ a zaw ta, sidy tho pawthlyu kei thlie ta.

⁴ A kih chiah panyu chaipazy thliepa ta, sôh paliena râh lâ a zawkhei ta, sôdaohpazy khihpi liata loh ta.

⁵ Izarei râh tawhta chi chhao la ta, râbuh hawhta, lei phapa nata ti hluhna kiah liata tu ta.

⁶ Kaw pyuh ta, â hnaita ta a zawh laihpa kre zôh vaw châ ta. A chiahzy pahmôpi yna lâ a zawh ta, a tharizy deikua cha a ry liata y thlâh ha ta. Chatanachata kre zôh vaw châ ta, a chiahzy pachiahpa ta, a chiah dipazy a pachiah pachhuah lymâ.

⁷ “Pahmôhpi hropa y heih ta. Cha chhao cha pahmôhpi lai ngaitapa, mathlaw phiapa nata hmi phi kaluhpa a hneipa a châ hra. Chatawhcha moh teh u, kre zôh cha, ti a hmô hluh via thei nawpa ta, a pyuna su tawhta pahmôhpi hropa lâ cha a thari kei pazawhpa ta, a chiahzy kei paka ta.

⁸ A chiahzy pachiahpa ta, a theizy pathei sala, kre zôh phapa a châ thei nawpa ta, ti hluhpi kiapâh alei phapa liata lopa a châ.

⁹ “Ama hnohta, ‘Abeipa Zehôvâh ta hetana heta a tah: Kre zôh cha a pha aw ma? Kre zôh cha uah sala, a hna panyupa a thaopa zydua a uah khai ha nawpa ta, pahmôhpi hmiatuapa khata a tharizy phiapa ta, a thei a chakhyh aw ma? A tharizy phia awpa ta, bâh thatlôpa tlyma, chyhsa hluhpi tlyma, byuh hlei aw vei.

¹⁰ Moh teh u, lopa châ ha ta, châhrasala a pha aw ma? Nochhi thlih ta a vaw chanaoh tita, uah khai thlâh ha aw vei ma? A pyuna su lia tlai ta uah thlâh ha aw vei ma?’ tahpa ta reih teh,” tah ta.

¹¹ Abeipa bie ei hnohta vaw tlô heih ta:

¹² “Saw chhorupazy hnohta, ‘Cha hmozy cha a yzie pahno veih ei chi ma?’ tah la, ama hnohta hetana heta reih teh: ‘Pachâ teh u, Babylaw bei Zerusale lâ a vy ta, Zerusale bei nata beimachâzy patu ta, a hnohta Babylaw lâ a siekhei ha ei.

¹³ Chatawhcha abei chipathla pakha bei ta tao ta, a hnohta biehrai tao ta, bie a pataihsa. Râh chhituh viapazy deikua cha a siekhei khai ha ei.

¹⁴ Khinarâh â duah lymâ thei nawpa ta, anosasyh ta a cheihchalo leipa sala, a panawh lymâpa ta, a biehrai zyh lymâ awpa ta, abei cha bie a pataihsa.

¹⁵ Châhrasala Babylaw bei cha a dyuh ta, Izi râh lâ a lyuhchâpazy tuah ta, arâzy nata pheisaih hluhpi ama vaw tuapa awpa ta â haw ei. A hlao a tloh aw ma? Cha hawhpa hmo a taopa chyhsa cha, â boh thei aw ma? Biehrai a paraopa chyhsa cha â boh thei aw ma?

¹⁶ “‘Ei hrona reipa ta ei reih. Bei a pachâsapa abei pahrâna su Babylaw lâ sie aw ta, a bietai a papeisa leipa nata a biehrai a paraopa bei yna Babylaw râh liata a thi aw, Abeipa Zehôvâh ta a tah.

¹⁷ Chyhsa hluhpi chhawhsao awpa ta, Zerusale thokhy cha alei pathlu thlupa ta, diahsuazy ta khihpi ama dôh khai hapa adyuhna liata, Phiraoh nata a pheisaih thatlôpa nata hluh ngaitapazy ta Izarei bei cha pachha thei aw veih ei.

¹⁸ Bietai a papeisa leipa vâta, Biehrai cha a paraopa a châ. Bietaina ku a hlâ ha tawhta, cha hmo zydua cha a taopa vâta, a boh cheita aw vei.

¹⁹ “‘Chavâta Abeipa Zehôvâh ta hetana heta a tah: Ei hrona reipa ta ei reih. Bietai a papeisa leipa he keima bietai châ ta, biehrai a paraopa he keima biehrai a châ. Chavâta ei bietai nata ei biehrai hawhta a luh chô liata ei patlôsa aw.

²⁰ Ei sao ta khu aw na ta, ei khoheih liata a ao aw ta, Babylaw lâ ei chhi aw. Cha liata, ei chô liata a paraonazy vâta a thâtih ei pachia aw.

²¹ A pheisaih pha chaipa zydua zaozi ta pao aw ei ta, a laibâhpazy cha thlih pathlina lâ maihta amâ râpai aw. Chatanachata kei, Abeipa ta ei reih haw tahpa nama pahno aw.

²² “‘Zibeipa Abeipa ta hetana heta a tah: Keima tlai ta sidy tho kithlao liata a chiah thlâ aw na ta, ei loh aw. A kih chhâna liata a chhy panyupazy thlie aw na ta, keima tlai ta tlâh sâhpa laki liata ei loh aw.

²³ Izarei tlâhpi laki liata loh aw na ta, a chiahzy pachiahpa ta, a theizy pathei aw ta, sidy tho phapa a vaw châ aw. A buh ry liata mathlaw a hneipa pavaw chi to pahrâ aw ei ta, a chiah nohpahlipa liata pavaw chi to ama pahrâ aw.

²⁴ Chatanachata lyurâh tho zydua ta kei, Abeipa he, thokô a sâhpa pahnaipa ta, thokô a hnaipa pasâh na ta; tho hrohpa paraohpa ta, tho raohpa a pahrotuhpa ei châ tahpa ama pahno aw. Kei, Abeipa ta reih ha na ta, ei tao aw.’”