EZEKIA 16 - Mara Bible RV (BSI)

Zerusale, Abeipa myuh ngâchhih leipa

¹ Abeipa bie ei hnohta vaw tlô ta:

² “Chyhsa sawchapawpa y, Zerusale cha a pasichhihnazy pahnosa la,

³ a hnohta, ‘Abeipa Zehôvâh ta Zerusale hnohta hetana heta a tah: Na puana râh nata na pina râh cha Kâna râh châ ta, na paw cha Amawri chyhsa châ ta, na nô cha Hiti chyhsa a châ.

⁴ Na pina kyh liata, na pi noh ta na liahri âpa châ leipa ta, cha pathai awpa ta ti ta pasipa châ leipa chi ta, alôh hniapa châ hra leipa chi ta, nawh poh ta pahlypa châ hra va chi.

⁵ Tha cha pasapa ta, cha hmozy miakha chhâ na châta tao awpa ta, ahy mokhaoh ta hmahta cha ngiachhie vei. Lyurâhpa liata thypa tlao châ chi ta, na pi noh tawhta pasichhihpa na châ.

⁶ “‘Cha vaw chapiapa ta, na thisaih nâ hlaopa ei hmô nahta, na thisaih liata bie châ chhopa ta, “Hroh teh!” cha tah na ta, na thisaih liata bie châ chhopa ta, “Hroh teh!” ei cha tah.

⁷ Lyurâhpa thody hawhta cha palaiseihsa na ta. Lai lymâ chi ta, na doh seih ta, laihsa chhithai ngaitapa na vaw châ haw. Na sâhpizy pabyuh ta, na sâ seih ta, châhrasala thluahruapa nata sasaihpa ta na y thlâh ha chy.

⁸ “‘Cha vaw chapiapa ta, ei cha hmô heih nahta, moh tua, dyhchâ a vaw daih ha chi ta, chatanachata ei poh hy na ta, na thluahruana ei cha khu. Bie châ taih na ta, biehrai liata châ ngiakhei na ta, chatanachata kei eih na vaw châ haw,’” Abeipa Zehôvâh ta a tah.

⁹ “Chatawhcha ti ta cha pasi na ta, na thisaih cha cha pathaipa na ta, sathaw ei cha thu.

¹⁰ Poh chapaipa cha bu na ta, savo pheiky ei cha paky. Pala rih dipa poh ta cha pahly na ta, pu pala poh ei cha pabu.

¹¹ Lôsôhpa atobinazy ta cha tobi na ta, na ku liata lâkyuzy cha pakypa ta, pachhih ei cha paao.

¹² Na hnapasu liata hnapasu rahy cha pataoh na ta, na nah liata rahyzy cha paba na ta, na luh liata beilakho ngia ngaitapa ei cha pakho.

¹³ Cha hawhna chata ngôh nata tâkâ ta tobipa châ chi ta, na chysiazy cha pala rih dipa nata pu pala zy ta sapa châ ei ta, â chapaipa ama châ. Na pati cha viahdie dipa nata kheihti nata sathaw a châ. Chhithai ngaitapa vaw châ chi ta, abeinô châ awpa taihta a tlohpa na châ.

¹⁴ Rônahna ta cha tobi na ta, chhithai pakipa na châpa vâta, phopizy hry liata na moh thata a pathâh, Abeipa Zehôvâh ta a tah.

¹⁵ “Châhrasala na chhithaina a ngâchhâpa ta, na mohpathâhna hmâh chi ta, âzuahnô ta nâ tao haw. Châ chapiapa maih hnohta â zuah chi ta, na chhithaina cha ano eih a châ haw.

¹⁶ Na chysia thokha hmâpa ta, su sâhpa chapaicharupazy tao chi ta, cha liata nâ zuah tyh. He hawhpa he y beih leipa ta, y beih khao aw vei.

¹⁷ Ei ngôh nata ei tâkâ atobina a ngia ngaitapa ei cha piepazy chhao la chi ta, chapaw khazoh nothlahpazy tao chi ta, âmo liata nâ zuah tyh.

¹⁸ Na chysia chapaipazy lapa ta, âmo cha bu chi ta, ei sathaw nata ei ropahâhpa zy ama hmiakô liata na sopa tyh ei.

¹⁹ Niedo cha pie na ta, ei cha paniesa tyhpa viahdie dipa nata sathaw nata kheihti zy chhao la chi ta, ropahâhpa châta ama hmiakô liata na sopa tyh ei. Cha hawhna chata na tao tyh, Abeipa Zehôvâh ta a tah.

²⁰ “Nâma nâ zuapa bao hmahta â daih tah leipa chi ta, keima liata na sapa na sawchapawzy nata na sawchanôzy a chhi chi ta, atheihna ta hlâ awpa nata ama nie awpa ta, khazoh nothlahpazy lâ na hlâ ei.

²¹ Ei sawzy thie chi ta, mei ta raopa hlâna ta na hlâ ei.

²² Na pasichhihna nata nâ zuana zydua liata, thluahruapa nata sasaihpa ta ypa ta, na thisaih liata nâ hlaona, na thyudyu daihti kha a thei khao va chi.

²³ “Na paraona zydua vâta, Abeipa ta, ‘Na hu a po na, na hu a po na,’ a cha tah khai tawh chhao ta,

²⁴ su a lâluahpazy a tao chi ta, tlyliah to liata su sâhpa nâ tao pyly thlâh ha chy.

²⁵ Lâtlei to liata su sâhpa a sa chi ta, na chhithaina cha pasichhihna ta taopa ta, châ chapiapa maih châta na keih pakai chi ta, na sihryhna na papôh via rili.

²⁶ Na opapa Izi chyhsa aohraohpazy liata sihryh chi ta, ei hie na pahâh awpa ta, na sihryhna na papôh via rili.

²⁷ Chavâta pachâ teh, na chô liata ei ku hypa ta, na tovyuh pachyh na ta, na chariahpazy khohlei khona lâ ei cha hlâ haw. Na sihryhna hro a zakhei kaw tyhpa Philistinâ sawchanôzy ku lia tlai ta ei cha hlâ haw.

²⁸ Na lôhrâ a tlô leipa vâta, Asuria mo liata chhao â zuah chi ta, â do, âmo liata â zuah chi ta, na lôhrâ tlô pyly vei.

²⁹ Sôhpalietuhpazy râh, Kaldia râh liata chhao â zuahpa ta na sihryhna papôh chi ta, chatanachôta na lôhrâ tlô pyly vei.

³⁰ “Na palôh a pualei rimâ cha! Chanô chhorupa âzuahnô hmotaopa hawhpa zydua na vaw tao thlâh ha hra! Abeipa Zehôvâh ta a tah.

³¹ Lâtlei to liata abyhna su achhuapa a sa chi ta, tlyliah to liata su sâhpa nâ tao. Chatanachôta hlao na tlaichhai hlei leipa vâta, âzuahnô chhao lyu va chi.

³² “Lapinô â pheipa, a vahpa a y thlâh hapa ta mohropazy a pheikheipa na châ.

³³ Âzuahnô zydua hnohta lymâ pie tyhpa châ ta, nâ deikua cha na khopaw zydua lymâ tlao pie chi ta, su to tawhta nâ lâ a vy ei sala, nâ pheikhei thei nawpa ei ta, na panaopapa tyh ei.

³⁴ Chavâta nâ zuana kyh liata chanô hropazy nata a lyu va chi. Âmo liata â zuah awpa ta ahy hmahta châ haw veih ei. Hlao cha pie leipa ei ta, nâ ta hlao tlao na pie ei. Cha cha nâ nanona cha a châ.

³⁵ “Chavâta Hy âzuahnô y, Abeipa bie he nathlie teh:

³⁶ Abeipa Zehôvâh ta hetana heta a tah: Na aohraohna pipatlohsa chi ta, na khopawzy nata na khazoh nothlahpa pasichhihpazy nâ patlana liata na thluahruana palâsapa ta, khazoh nothlahpazy hnohta na hlâpa na sawzy thisaih vâta,

³⁷ moh teh, nâ lyna na khopaw zydua pakhy aw ei na ta, na khopa zydua nata nâ haopa zydua ei pahmaoh aw ei. Âmo cha su to tawhta cha vaw pahmaoh thlu aw na ta, ama hmia liata thluahruapa ta cha soh aw na ta, na thluahruana zydua ama hmô khai aw.

³⁸ Chanô â pheipa pachiapa hawhta cha pachia aw na ta, thisaih a palopa pachiapa hawhta ei cha pachia aw. Chatanachata hiehâhna nata hiatliana thisaih maoh cha na chô liata ei patlôsa aw.

³⁹ Ama ku liata cha hlâ aw na ta, na yna su achhuapa cha phie aw ei ta, na su sâhpazy ama pacho aw. Na chysiazy hlaipa ta, na lôsôhpa atobina a ngiapazy cha lapa aw ei ta, thluahruapa nata sasaihpa ta ama cha siesai aw.

⁴⁰ Châ dyuh awpa ta zawpi a vaw chhi aw ei ta, alô ta cha vawh aw ei ta, zaozi ta na chhitlyuna taihta ama cha vieh aw.

⁴¹ Na ozy mei ta rao aw ei ta, chanô hluhpi mohmô liata na thâtih ama pachia aw. Â zuah khao lei awpa ta cha tao aw na ta, nâ zuahnaopazy hnohta hlao pie khao aw va chi.

⁴² Cha hawhna chata na chô liata ei pathiiana cha papai aw na ta, ei hiatliana ta a cha puasai ha aw. A chalih ha bâ aw na ta, ei hie hâh khao aw vei.

⁴³ “Na thyudyu daihti a thei khao leipa chi ta, cha hmozy ta ei ru eina pachhôpa vâ chi ta, moh teh, na hmotaopazy tlai cha na luh chô liata ei vaw patlôsapa a châ, Abeipa Zehôvâh ta a tah. Na pasichhihna hropa zydua liata na sihryhna na baichha heihpa châ vei ma?

⁴⁴ “Pachâ teh, bieso a hmâhpa maihta, ‘Sawchanô cha a nô a lyu,’ tahpa bieso he nâma kyh reina châta ama hmâh tyh bâ aw.

⁴⁵ Na nô lyu chi ta, a vahpa nata a sawzy a dythapa sawchanô na châ. Na narôzy narô châ chi ta, ama vahpa nata ama sawzy a dythapazy narô na châ. Na nô cha Hiti chyhsa châ ta, na paw cha Amawri chyhsa a châ.

⁴⁶ Na narô uhtheinô cha Samâri châ ta, nâ tawhta nochhi lâ liata a sawchanôzy chhao ta ama pahrâ. Na narô seihnainô cha Sawdawmâ châ ta, nâ tawhta chho lâ liata a sawchanôzy chhao ta a pahrâ.

⁴⁷ Ama hroziezy a chhih chi ta, pasichhihpa hmo ama taopazy na tao hrapa dei châ leipa ta, daihti chyuta chhôh ta, na moleina nata na hrozie zydua liata âmo hlâta na paru via haw.

⁴⁸ Ei hrona reipa ta ei reih, nâ nata na sawchanôzy ta nama taopa hawhpa he, na narônô Sawdawmâ nata a sawchanôzy hmahta tao veih ei, Abeipa Zehôvâh ta a tah.

⁴⁹ “Pachâ teh, na narônô Sawdawmâ paraona cha he he a châ: Ano nata a sawchanôzy amâ palai ngaita. A laikhôna taihta niedo hnei ei ta, phasapa ta ama y. Châhrasala dyhchhiepa nata phahlapazy bao veih ei.

⁵⁰ A pasâhsa ei ta, ei hmiakô liata hmo pasichhihpa ama tao. Chavâta na hmôpa hawh ei ta, âmo cha su hro lâ ei pasie ha ei.

⁵¹ Samâri cha na moleina khophie chhao tao vei. Âmo hlâta hmo pasichhihpazy tao hluh via syulyu chi ta, hmo pasichhihpa na taopa zydua vâta, na narôzy hmâchhâh ta chyhsa siapa lâta tlao amâ lâ haw.

⁵² Na narôzy thai ama châ thei nawpa ta a duakheituhpa lâta na pua hapa vâta, maophyuhna cha na phaoh tlai awpa a châ. Âmo moleina hlâta pasichhih viapa moleinazy na taopa vâta, âmo cha nâma hlâta a do viapa ta na papua ha ei. Chavâta nâ chhao nozapa ta y la, na nohzaona phaoh teh. Na narôzy chyhsa siapa hawhta na tao ha ei hih.

⁵³ “Ama pano ta vânoh ei patosa heih aw ei. Sawdawmâ nata a sawchanôzy vânoh patosa heih aw ei na ta, Samâri nata a sawchanôzy vânoh ei patosa heih aw ei. Nâ chhao ama hry liata vânoh ei cha patosa heih hra aw.

⁵⁴ Chatanachata na nohzaona phaoh aw chi ta, na hmotaopa zydua vâta nozapa ta y aw chi ta, âmo châta hnangâhna na châpa aw ei.

⁵⁵ Na narôzy kyh cha hetana heta a châ aw. Sawdawmâ nata a sawchanôzy cha ama duahmo tyhpa lâ kua heih aw ei ta, Samâri nata a sawchanôzy chhao ama duahmo tyhpa lâ ama kua heih aw. Nâ nata na sawchanôzy chhao nama duahmo tyhpa lâ nama kua heih aw.

⁵⁶ Nâ palai kaw tyhna nohzy liana khata cha, na narônô Sawdawmâ cha na pakah my papaina châta hmâh tyh chi ta,

⁵⁷ na moleina hmôpa a châ hlâta cha, cha hawhta na tao tyhpa châ vei ma? Tahmâ deikua cha, Aramia sawchanôzy nata a chheipâh liata a ypa zydua ta ama reipachhie awpa châ ha bâ chi ta, su to tawhta châ pasipasawh tyhpa Philistinâ sawchanôzy ta ama reipachhie awpa na châ ha hih.

⁵⁸ Na sihryhna nata na pasichhihna vâta hriena nâ tyhpa a châ,” Abeipa ta a tah.

Abeipa chhâzaw biehrai

⁵⁹ “Abeipa Zehôvâh ta hetana heta a tah: Bietai a papeisa leipa chi ta, biehrai na paraopa vâta, na hmotaopa hawhta na chô liata ei tao hra aw.

⁶⁰ Chatahrasala na thyutlia daihti liata na hnohta biehrai ei taopa kha a thei aw na ta, na hnohta chhâzaw biehrai ei tao aw.

⁶¹ Chatanachata na narôzy, na uhta nata na nawhta zy na hmô ti ei ta, na hrozie parohpazy a kaw thei heih aw chi ta, nâmasasyh ta nâ zakhei kaw aw. Âmo cha na sawchanôzy châ awpa ta cha pie na ta, na hnohta biehrai ei taopa chhôh liata deikua a hlao aw veih ei.

⁶² Na hnohta ei biehrai pa-i aw na ta, Abeipa ei châ tahpa na pahno aw.

⁶³ Na hmotaopa zydua vâta chatlaina ei cha taopa tita, na moleinazy a thei heihpa ta nozaohpa ta y aw chi ta, na nozapa vâta na pakah â khao aw va chi,” Abeipa Zehôvâh ta a tah.