EZEKIA 14 - Mara Bible RV (BSI)

Nothlah achhypa machâzy thailei pachâsana

¹ Chatawhcha Izarei machâ thokhazy kei lâ a vypa ta, ei hmiakô liata a vaw tyuh ei ta.

² Abeipa bie ei hnohta vaw tlô ta:

³ “Chyhsa sawchapawpa y, he chyhsazy he ama khazoh nothlahpazy ama palôh liata soh ei ta, ama paraona ahluana lô ama hmia liata a sohpa ama châ hih. Einâ saohiah awpa ei ta ei paryhsa awpa a châ rai ma?

⁴ Chavâta âmo chho la, ama hnohta hetana heta tah mah y: ‘Abeipa Zehôvâh ta hetana heta a tah: Izarei pathla ahy rai ta, a khazoh nothlahpazy a palôh liata soh ta, a paraona ahluana lô a hmia liata sona chôta hrohsopa lâ a pangaipa maih cha, kei Abeipa heta a khazoh nothlahpa hluhzie lymâ hawhta ei chhy aw.

⁵ Chatanachata ama khazoh nothlahpazy vâta lôh hro nâ phaosai hapa Izarei pathlazy pathipalôh cha ei patu heih thei ngyu aw.’

⁶ “Chavâta Izarei pathlazy hnohta, ‘Abeipa Zehôvâh ta hetana heta a tah: Ro u la, nama khazoh nothlahpazy a heihsaipa ta vaw kua u la, nama pasichhihna zydua a heihsaipa ta vaw kua ha muh vy,’ tahpa ta chho teh u.

⁷ Izarei pathla tlyma, Izarei râh liata chihropa a pahrâpa tlyma, kei tawhta a pananopa ta, a khazoh nothlahpazy a palôh liata soh ta, a paraona ahluana lô a hmia liata sona chôta, kei nâ saohiah awpa ta hrohsopa lâ a pangaipa maih cha, kei Abeipa tlai heta ei chhy aw.

⁸ Cha chyhsa cha a heihnao aw na ta, ngiana nata pakhona bie ta tao aw na ta, ei phopi tawhta ei chhawh pathlah ha aw. Chatanachata Abeipa ei châ tahpa nama pahno aw.

⁹ “Hrohsopa cha dôveipa ta ypa ta, bie a reih khiahta cha, kei Abeipa ta hrohsopa cha ei dôveipa châ ta, a chô liata ei ku hy aw na ta, ei phopi Izarei hry tawhta ei pahleipadia ha aw.

¹⁰ Ama paraona vâta hriena phaoh aw ei ta, hrohsopa nata ano a saohiahtuhpa cha â lyupa ta hriepa ama châ aw.

¹¹ Chatanachata Izarei pathlazy cha kei tawhta pavia khao leipa aw ei ta, ama paraona zydua vâta a papua khao hra leipa aw ei ta, ei phopi tlao châ aw ei ta, kei ama Khazohpa ei châ aw, Abeipa Zehôvâh ta a tah.”

Zerusale hriena

¹² Abeipa bie ei hnohta vaw tlô ta:

¹³ “Chyhsa sawchapawpa y, râh cha ngâchhih leipa ta ypa ta ei chô liata hmo a paraopa vâta, a chô liata ei ku hy aw na ta, niedo lana hnawh chhiepa ta, râh liata chakâhna patlôsa aw na ta, chyhsapa nata sazy râh tawhta ei chhawh pathlah khai ha tita cha,

¹⁴ chyhsa pathôh, Nôah, Dâniah nata Zawbâ zy hmahta râh chhôh liata y hra ei sala, ama siana vâta âmo hrona deita ama pachha thei aw, Abeipa Zehôvâh ta a tah.

¹⁵ “Sahrâhpazy râh chahryhsapa ta, râh cha paraopa ta roryhrapa ta paysa ha ei sala, sahrâhpazy vâta râh cha ahy hmah chahryh ngâh lei awpa ta ei tao khiahta cha,

¹⁶ ei hrona reipa ta ei reih, he chyhsa pathôhpazy he hmahta, he râh liata y hra ei sala, ama sawchapawzy nata sawchanôzy pachha thei pyly aw veih ei, Abeipa Zehôvâh ta a tah. Âmo deita pachhapa châ aw ei ta, râh deikua cha roryhrapa ta a y thlyu aw.

¹⁷ “Râh chô liata zaozi patlôsapa ta, ‘Zaozi ta râh chahryh sala, chyhsapa nata sazy râh tawhta chhawh pathlah khai ha mawh sy,’ ei tah khiahta cha,

¹⁸ ei hrona reipa ta ei reih, he chyhsa pathôh he hmahta râh liata y hra ei sala, ama sawchapawzy nata sawchanôzy pachha thei hlei aw veih ei. Âmo deita pachhapa ama châ aw, Abeipa Zehôvâh ta a tah.

¹⁹ “Râh liata potlana patlôsapa ta, chyhsapa nata sazy râh tawhta chhawh pathlah khai awpa ta, ei pathiiana thisaih râh chô liata ei leih thlu khiahta cha,

²⁰ ei hrona reipa ta ei reih, Nôah, Dâniah nata Zawbâ zy hmahta râh liata y hra ei sala, ama sawchapaw tlyma, ama sawchanô tlyma pachha thei aw veih ei. Ama siana vâta âmo hrona deita ama pachha aw, Abeipa Zehôvâh ta a tah.

²¹ “Abeipa Zehôvâh ta hetana heta a tah: Ei pachiana pasa ngaitapa miapalih, zaozi, chakâhna, sahrâhpa nata potlana zy Zerusale chô liata patlôsapa ta, khihpi tawhta chyhsapa nata sa ei chhawh pathlah khai tita cha, a rarôh y ngaita kaw aw dia!

²² Chatahrasala pachâ teh u, sawchapaw nata sawchanô laibâhpa thokhazy cha khihpi chhôh liata pahlôhpa châ aw ei ta, khihpi tawhta a chhi papuapa ama châ aw. Nâmo lâ ama vaw pua tita, ama hroziezy nata ama hmotaopazy hmô aw ei chi ta, Zerusale chô liata chhiena ei patlôsapa kyh liata thlahpalôhpa châ aw ei chi ta, khihpi chô liata ei patlôsapa zydua kyh liata thlahpalôhpa nama châ aw.

²³ Ama hroziezy nata ama hmotaopazy nama hmôpa ta nama thlalôh aw ta, ei taopa zydua cha a chhâpa hnei leipa ta ei taopa y vei tahpa nama pahno aw, Abeipa Zehôvâh ta a tah.”