EZEKIA 13 - Mara Bible RV (BSI)

Hrohso pakheipazy thailei pachâsana

¹ Abeipa bie ei hnohta vaw tlô ta:

² “Chyhsa sawchapawpa y, Izarei hrohsopazy hnohta hrohsona bie phuah teh. Âmo palôh liata a ypa hmo tlai cha hrohsona bie hawhta phuah ei ta, ‘Abeipa bie thei teh u,’ a tah tyhpazy ama châ.

³ Abeipa Zehôvâh ta hetana heta a tah: Ama hmôpa y tlôh leipa ta, âmo palôh liata a ypa bie a phuah tyhpa hrohsopa hrupazy cha, ama hu a po kaw dia!

⁴ Hy Izarei, na hrohsopazy cha khih rypa liata changiezy ama lyu.

⁵ Abeipa noh adyuhna liata Izarei pathlazy amâ dua thei nawpa ta, thokhy pyuna suzy liata vaih leipa ei chi ta, thokhy a rao hapa taopathi hra veih ei chi.

⁶ Aluahna doleipa hmô ei ta, haipa ta ama pachaopadâh tyh. Abeipa ta a tuah leipa ei tlai ta, ‘Abeipa ta a phuah,’ tah ei ta, ama bie cha Abeipa ta a vaw patlôsa awpa ama hnabeiseih.

⁷ Kei ta bie ei reih leipa tlai ta, ‘Abeipa ta a phuah,’ nama tahna maih liata, aluahna phichhyhpa hmô ei chi ta, haipa ta pachaopadâhpa bie na rei tyhpa châ vei ma?”

⁸ Chavâta Abeipa Zehôvâh ta hetana heta a tah: “Biedoleipa reih ei chi ta, aluahna phichhyhpa nama hmôpa vâta, moh teh u, ei châ dyuh ei, Abeipa Zehôvâh ta a tah.

⁹ Aluahna phichhyhpa a hmôpa nata haipa ta a pachaopadâhpa hrohsopazy chô liata ei ku ei hy aw. Ei phopi pakhypi liata a hlao leipa aw ei ta, Izarei pathlazy moh rona liata ropa châ hra leipa aw ei ta, Izarei râh a ngia aw veih ei. Chatanachata Abeipa Zehôvâh ei châ tahpa nama pahno aw.

¹⁰ Thlalôhna a y leipa tlai ta, ‘Thlalôh â chhih na,’ tahpa ta, hrohsopazy ta ei phopi a chhi chhei ei ta, râhsawzy ta thokhy dadiehpa ama taopa cha hlyu râhpa hnia ei ta ama chhiehruh.

¹¹ Chavâta hlyu râhpa ta thokhy dadiehpa a chhiehruhpazy hnohta thokhy a cho awpa kyh chho mah y. Thokhy pacho awpa ta, avâ katlâ suah aw ta, pareih laipazy tla aw ta, thlihpipa ru ngaitapa a pathli aw.

¹² Thokhy a cho tita, ‘Hlyu râhpa nama hnia thlupa thokhy kha khataih liata a y haw?’ ama cha tah aw.

¹³ “Chavâta Abeipa Zehôvâh ta hetana heta a tah: Thokhy cha tlokhuh parao khai awpa ta, ei pathi iapa ta thlihpipa ru ngaitapa vaw pathlisa aw na ta, ei hiehâhpa ta avâ katlâ pasuasapa ta, ei pathi iapa ta pareih lai ngaitapa ei patlasa aw.

¹⁴ Chatanachata hlyu râhpa nama hniapa thokhy cha pacho aw na ta, a lei taihta cho aw ta, â bôna chhao taih â lâ khai aw. Thokhy a cho tita, nâmo chhao khihpi chhôh liata pahleipadiapa châ aw ei chi ta, Abeipa ei châ tahpa nama pahno aw.

¹⁵ Cha hawhna chata thokhy chô liata nata hlyu râhpa a hniatuhpazy chô liata ei pathiiana patlôsa na ta, nama hnohta, ‘Thokhy y khao leipa ta, hlyu râhpa a hniatuhpazy chhao y khao hra leipa ei ta,

¹⁶ Zerusale kyh hrohsona bie phuahpa ta, khihpi thlalôhna kyh aluahna a hmôpa Izarei hrohsopazy y khao veih ei,’ ei tah aw, Abeipa Zehôvâh ta a tah.

¹⁷ “Nâ deikua cha, chyhsa sawchapawpa y, âmo palôh liata a ypa hmo hrohsona bie hawhta a phuahtuhpa na phopi sawchanôzy cha a heihnao la, âmo cha hrohsona bie phuah thlu mah y.

¹⁸ Ama hnohta, ‘Abeipa Zehôvâh ta hetana heta a tah: Chyhsa zydua ku liata pachaopadâhna lâkyu a pakysatuhpa nata chyhsazy pa-ao nawpa ta chyhsa to châta luhkhunazy a taotuhpa chanôzy cha nôpopa ta y mawh ei sy. Ei phopi chyhsa hronazy pahlei aw ei chi ta ma, nâmo hrona deikua cha nama pabohsa aw?

¹⁹ Haipa bie a nathliepa ei phopi hnohta haipa bie reih ei chi ta, bâli sâh pazah kha nata viahchhâ tlâ chyhta hmô nawpa ta, ei phopi hry liata na reipachhie ei chi ta, a thi tlâh a châ leipa chyhsazy thiepa ta, a hroh tlâh a châ leipazy tlao nama pahro.’

²⁰ “Chavâta Abeipa Zehôvâh ta hetana heta a tah: Moh teh u, pavaw paaopa hawhta chyhsa hrona pa-ao awpa ta, pachaopadâhna lâkyu bâh liata nama pakysapazy he ei dyuh. Nama bâhzy tawhta chhie pachhô aw na ta, chyhsa nama paaopazy pathlie aw ei na ta, pavaw hawhta ei pazawsa syulyu ha aw ei.

²¹ Ei phopi luh nama khunazy hrie aw na ta, ei phopi cha nama ku tawhta pachha aw ei na ta, patupa hawhta nama ku liata y khao aw veih ei. Chatanachata Abeipa ei châ tahpa nama pahno aw.

²² Chyhsa siapa cha, kei ta a pachâ ei parôhsa leipa chhao ta, haipa bie ta a palôh pasasa ei chi ta, moleipa ku thapatlôpa ta, a hrona pachha nawpa ta lâpi pha leipa â heihsai awpa a byuh leizie nama chhopa vâta,

²³ aluahna phichhyhpazy hmô khao leipa aw ei chi ta, pachaopadâhpa chhao tao khao aw veih ei chi. Nama ku tawhta ei phopi pachha aw ei na ta, Abeipa ei châ tahpa nama pahno aw.”