EZEKIA 12 - Mara Bible RV (BSI)

Seichâna duahmo pamosana

¹ Abeipa bie ei hnohta vaw tlô heih ta:

² “Chyhsa sawchapawpa y, saw chhorupazy hry liata a pahrâpa na châ. Hmô nawpa mokhaoh hnei ei ta, châhrasala hmô leipa ei ta; thei nawpa nakhaoh hnei ei ta, châhrasala thei veih ei. Saw chhorupazy ama châ.

³ Nâ deikua cha, chyhsa sawchapawpa y, seichâna lâ a sie awpa hawhta na hmo a chhuah la, ama mohmô lia tlai ta, nohchhô sawhvaw ta seichâna lâ sie mah y. Seichâna lâ a sie awpa hawhta, ama mohmô lia tlai ta, na yna su tawhta su hro lâ na sie aw. Saw chhorupazy châ hra ei sala, cha dâhdei chhâ cha ama pahno thai ngyu aw lah.

⁴ Seichâna lâ a sie awpa hmo hawh tlai ta, na hmo cha nohchhô sawhvaw ta ama mohmô ta puakhei aw chi ta, nâma pôhpa chhao, seichâna lâ sie awpa hawhta, ama mohmô ta zâlâ ta na pua aw.

⁵ Ama mohmô lia tlai ta thokhy khiepa ta papyu la, cha lâ tawhna chata na hmozy cha puakhei mah y.

⁶ Ama mohmô lia tlai ta, na ngiatlâh liata na hmo khaih aw chi ta, a zoh chhyhma ta na puakhei aw. Râh na hmô lei nawpa ta, na hmia na khu ha aw. Izarei pathlazy châta ngiana ta ei cha tao,” tah ta.

⁷ Bie eina piepa hawhta tao na ta. Ei hmo cha seichâna lâ a sie awpa hmo hawhta, nohchhô sawhvaw ta puakhei na ta, zâlâ ta keima ku tlai ta thokhy khaoh khie na ta, ei hmo cha ei ngiatlâh liata khaipa ta, ama mohmô lia tlai ta a zoh chhyhma ta ei puakhei.

⁸ My ta Abeipa bie ei hnohta vaw tlô ta:

⁹ “Chyhsa sawchapawpa y, Izarei pathla saw chhorupazy ta na hnohta, ‘Khâpa ma na tao?’ ama cha tah vei ma?

¹⁰ Ama hnohta, ‘Abeipa Zehôvâh ta hetana heta a tah: He aluahna he Zerusale beimachâzy nata cha liata a pahrâpa Izarei pathla zydua kyh a châ,’ tah mah y.

¹¹ Ama hnohta, ‘Kei he nâmo châta ngiana ei châ. Ei taopa hawhna heta, nama chô liata taopa châ hra aw ta, hiepatlapa ta y aw ei chi ta, seichâna lâ nama sie aw,’ tah mah y.

¹² Chatawhcha ama hry liata abei ta a zoh chhyhma ta a hmo a ngiatlâh liata khaih aw ta, a vaw pua aw. Ama puakhei nawpa ta thokhy khaoh khie aw ei ta, a mokhaoh ta râh a hmô lei nawpa ta, a hmia â khu ha awpa a châ.

¹³ Ei sao ta khu aw na ta, ei khoheih liata paaopa a châ aw. Kaldia mo râh Babylaw lâ a chhi aw na ta, châhrasala râh cha hmô aw vei. Cha liata a thi aw.

¹⁴ A kiapâh liata a ypa ano baotuhpazy nata a pheisaihzy cha, thlih pathlina lâ maihta hiepatla aw ei na ta, ei zaozi a paih tawhta phia aw na ta, ei chadai aw ei.

¹⁵ Phopizy hry liata papaipa ta, râhzy liata ei hiepatla ti ei ta, Abeipa ei châ tahpa ama pahno aw.

¹⁶ Châhrasala ama hry tawhta a chyhta zaozi pakhôkhâhsa aw ei na ta, chakâhna nata potlana ei pakhôkhâhsa aw ei. Chatanachata ama siena phopizy hry liata ama y nota, hmo pasichhihpa ama taopazy a thei aw ei ta, Abeipa ei châ tahpa ama pahno aw,” tah ta.

¹⁷ Abeipa bie ei hnohta vaw tlô ta:

¹⁸ “Chyhsa sawchapawpa y, a chathona chôta na pati nie la, nôpopa ta achalyuna chôta na ti doh mah y.

¹⁹ Chatawhcha râhsawzy hnohta, ‘Abeipa Zehôvâh ta Izarei râh Zerusale khihsawzy kyh liata hetana heta a tah: Zerusale liata a pahrâpazy nôchhiena vâta, Izarei râh cha a chhôh liata hmo a ypa zydua tawhta roryhrapa ta paysapa châ aw ta, nôpopa ta ama pati nie aw ei ta, pachârôhpa ta ama ti ama doh aw.

²⁰ Chyhsa pahrâna khihpizy cha, khih rypa lâta taopa châ aw ei ta, râh cha roryhrapa ta y aw. Chatanachata Abeipa ei châ tahpa nama pahno aw,’ tahpa ta reih mah y,” tah ta.

²¹ Abeipa bie ei hnohta vaw tlô ta:

²² “Chyhsa sawchapawpa y, Izarei râh kyh liata he bieso nama hneipa, ‘Noh khih a vaw pasi nahta cha, aluahna to chhao hraoleipa ama châ heih tyh,’ nama tahpa he, a yzie khâpa ma a châ tly?

²³ Chavâta ama hnohta chho la, ‘Abeipa Zehôvâh ta hetana heta a tah: He bieso he pachhâsa aw na ta, Izarei râh liata bieso ta hmâh khao aw veih ei.’ Châhrasala ama hnohta reih la, ‘Aluahna bie to â dopa ta a tlôpaki nawpa noh â hnia haw,’ tah mah y.

²⁴ Izarei pathlazy hry liata aluahna phichhyhpazy y khao leipa aw ta, dôveipa ta pachaona bie reipazy y khao aw vei.

²⁵ Kei he Abeipa châ na ta, ei bie rei awpa cha reih aw na ta, taopa a châ aw. Hy saw chhorupazy saih u, hawh khao leipa aw na ta, nama hro chhôh tlai ta bie reih aw na ta, ei tao aw, Abeipa Zehôvâh ta a tah,” tah ta.

²⁶ Abeipa bie ei hnohta vaw tlô ta:

²⁷ “Chyhsa sawchapawpa y, Izarei pathlazy ta, ‘Aluahna a hmôpazy cha, noh hluhpi khai tawhta a vaw tlô awpazy châ ei ta, hmialâ daihti pasipi liata a y awpa kyh a châ,’ ama tah.

²⁸ Chavâta âmo hnohta reih la, ‘Abeipa Zehôvâh ta hetana heta a tah: Ei bie kheihawhpa hmah pahawhsapa châ leipa aw ta, ei bie reipa cha taopa a châ aw, Abeipa Zehôvâh ta a tah,’ tah mah y,” tah ta.