EZEKIA 11 - Mara Bible RV (BSI)

Izarei chhituhpazy pachiana

¹ Chatawhcha Thlahpa ta na chalo ta, nochhi lâ a heihpa Abeipa o chhikao lâ nâ chhi ta. Chhikao angiana kiapâh liata chyhsa pakih nata papangawh hmô ei na ta, ama hry liata phopi beimachâzy, Azu sawchapawpa Zazeniah nata Benai sawchapawpa Pelatiah zy chhao hmô ei na ta.

² Abeipa ta ei hnohta, “Chyhsa sawchapawpa y, kha chyhsazy kha hmo pha leipa tao a chhuahpazy châ ei ta, he khihpi châta ryhraona pha leipa a pietuhpazy ama châ.

³ ‘O sa daihti châ vei. He khihpi he sa pasyuna beih châ ta, keimo he sa eima châ hih,’ ama tah.

⁴ Chavâta ama hnohta hrohsona bie phuah la, Hy chyhsa sawchapawpa y, phuah mah y,” tah ta.

⁵ Abeipa Thlahpa cha ei chô liata vaw tlô ta, ei hnoh ta, “Reih mah y, Abeipa ta hetana heta a tah: Hy Izarei pathlazy saih u, cha hawhpa hmozy a pachâpa nama châ. Nama palôh liata hmo a ypazy ei pahno khai.

⁶ He khihpi liana heta chyhsa thie hluh via rili ei chi ta, sawvawhpa rizy ta khiliahzy nama pabie haw.

⁷ Chavâta Abeipa Zehôvâh ta hetana heta a tah: Khihpi chhôh liata sawvawhpa ri nama pazawhpazy kha sa cha châ ei ta, khihpi he sa pasyuna beih cha a châ. Châhrasala khihpi tawhta papuapa nama châ aw.

⁸ Zaozi chi kaw ei chi ta, zaozi cha nama chô liata ei vaw patlôsa aw, Abeipa Zehôvâh ta a tah.

⁹ Khihpi tawhta cha papuapa ta, chihropazy ku liata cha hlâ aw ei na ta, nama thâtih ei pachia aw.

¹⁰ Zaozi ta nama pao aw. Izarei râhri liata nama thâtih pachia aw na ta, Abeipa ei châ tahpa nama pahno aw.

¹¹ He khihpi he nama sa pasyuna beih châ leipa aw ta, nâmo chhao a chhôh liata sa châ aw veih ei chi. Izarei râhri liata nama thâtih pachia aw na ta,

¹² Abeipa ei châ tahpa nama pahno aw. Ei bieraopazy a chhih leipa ei chi ta, ei ryhpazy a chhi hra veih ei chi. Nama chheipâh liata phopizy ryhpa hawhta tlao nama y haw,” tah ta.

¹³ Hrohsona bie ei phuah hai nota, Benai sawchapawpa Pelatiah cha thi ha ta. Â khu lâta paopa ta, ao paro ngaitapa ta awh na ta, “Âh, Abeipa Zehôvah! Izarei laibâhpa cha na pamua dâhdei aw ma?” tah na ta.

Izarei kua heihna bietai

¹⁴ Abeipa bie ei hnohta vaw tlô heih ta,

¹⁵ “Chyhsa sawchapawpa y, na unawhzy, na unawhzy cheingei nata na chiheih Izarei pathla zydua kha, Zerusale khihsawzy ta, ‘Abeipa tawhta lâhla lâ sie syulyu ha teh u, he râh he eima ryuto châta Abeipa ta miah a piepa a châ,’ ama tahpazy kha ama châ.

¹⁶ Chavâta ama hnohta, ‘Abeipa Zehôvâh ta hetana heta a tah: Lâhlapi phopizy lâta papaipa ta, râhzy liata ei hiepatla hapa chhao ei ta, ama siena râhzy liata bohpi leipa ama y chhôh ta, âmo châta supathaihpa ei châpa pyly aw ei,’ tahpa ta reih mah y.

¹⁷ Chavâta ama hnohta, ‘Abeipa Zehôvâh ta hetana heta a tah: Phopizy hry tawhta cha pakhypa ta, hiepatlapa ta nama yna râhzy tawhta cha pahmaoh aw ei na ta, Izarei râh ei cha pie aw ei,’ tahpa ta reih mah y.

¹⁸ Chatanachata ama râh lâ ama kua heih tita, hmo puapa nata pasichhihpa zydua râh tawhta ama thy khai ha aw.

¹⁹ Palôh miakha phaoh awpa ta tao aw ei na ta, pachâna thiehpa ei pahneisa aw ei. Ama sapa tawhta alô palôh lapa aw ei na ta, sapa palôh ei pie aw ei.

²⁰ Chatanachata ei bieraopazy a chhih aw ei ta, ei ryhpazy a vaopa ta ama zyh aw. Ei phopi châ aw ei ta, kei ama Khazohpa ei châ aw.

²¹ Hmo puapazy nata pasichhihpazy lâta ama palôh a siepazy deikua cha, ama hmotaopazy cha âmo luh chô liata ei patlôsa aw, Abeipa Zehôvâh ta a tah.”

²² Chatawhcha cherubizy ama mathlaw pakai ei ta, tiakizy ama kiapâh liata y ei ta, Izarei Khazohpa rônahna cha ama chô liata y ta.

²³ Abeipa rônahna cha khihpi tawhta kiah ta, khihpi nochhi lâta tlâhpi liata a duah ta.

²⁴ Kei cha Thlahpa ta na chalo ta, Kha­zohpa Thlahpa ta aluahna ta Kaldia râh seichâna liata a ypazy lâ nâ chhi ta. Chatawhcha aluahna ei hmôpa cha na kiasai ha ta.

²⁵ Abeipa ta eina pahmôsapa zydua cha, seichâna liata a ypazy chho ei na ta.