EZEKIA 1 - Mara Bible RV (BSI)

Ezekia Babylaw lâ a sie

¹ Kô sythôhna, thla palihna, noh pangawhna noh liata, seichâna lâ a siepazy hry liata Khebâ chavah kiah liata ei y thlâh ha nota, avâ a vaw pahy ta, Khazohpa aluahnazy hmô na ta.

² Cha thla noh pangawhna liata, cha cha Bei Zehôki seichâna lâ a sie tawhta a kô pangawhna châ ta,

³ Kaldia râh Khebâ chavah kiah liata a ypa Buzi sawchapawpa theihthaipa Ezekia hnohta Abeipa bie vaw tlô ta, Abeipa ku a chô liata y ta.

Abeipa rônahna

⁴ Moh na ta, maw lâ tawhta thlihpipa a vaw pathlipa nata meihdo chhakaluhpa hmô na ta. Meihdo tawhta dôhla mei â zaopa ta vaw pua ta, meihdo cha khaihna ta chadô ta. Mei liah liata thua patliepa a lyupa y ta.

⁵ Mei hry tawhna chata hmohrohneipa a lyupa miapalih vaw pua ei ta. Amâ lânazie cha he hawhta a châ: Chyhsapa lyu ei ta,

⁶ châhrasala hmia palih chyu hnei ei ta, mathlaw miapalih chyu ama hnei.

⁷ Ama pheizy patlâ ta, ama pheipazah ry cha viahchaotaw pheipazah lyu ta, dawh patliepa hawhta a pathlie.

⁸ Ama kâ miapalihzy liata ama mathlaw ry liata chyhsapa ku ama hnei. Cha papalihpazy chata he hawhpa hmia nata mathlawzy ama hnei:

⁹ Ama mathlawzy cha â hria thei ei ta, ama sie nota a pahieh leipa ta, âmo dady ta ama sie chyu.

¹⁰ Ama papalih ta ama hmia lâ cha chyhsapa hmia phaoh ei ta, ama chachâh lâta chakeibarôhneipa hmia phaoh ei ta, ama chavei lâta viahchao tôhpa hmia phaoh ei ta, ama hnôhky lâta pahmôhpi hmia ama phaoh.

¹¹ Cha hawhpa hmiazy cha ama hnei. Ama mathlawzy cha avâ lâ pakai ei ta, hmohrohneipa pakha mathlaw mianopazy cha hmohrohneipa hropa mathlawzy hria ta, mathlaw mianopazy ta ama pôhpa a khu.

¹² Ama hmia lâ sie chyu ei ta, thlahpa ta sie awpa a tahna lâ maih sie ei ta, a pahieh leipa ta ama sie lymâ.

¹³ Amâ lânazie kyh liata, hmohrohneipazy cha lôiatheipa a kâ ngâpa tlyma, meirei tlyma ama lyu. Mei cha hmohrohneipazy hry liata vawh heih a vy heih tahpa ta y ta, mei cha khaih ngaita ta, mei tawhna chata dôhla a pathlie lymâ.

¹⁴ Dôhla pathliepa hawhna chata, hmohrohneipazy cha vawh heih a vy heih tahpa ta amâ râhreih lymâ.

¹⁵ Hmohrohneipazy cha ei mo thlâh ha nota, hmia palih hneipa hmohrohneipazy kiapâh chyu liata tiaki miakha chyu hmô na ta.

¹⁶ Tiakizy alânazie nata taonazie cha hetana heta a châ: Beri lôsôhpa hawhta patlie ei ta, tiaki miapalihpazy cha amâ lânazie a lyu khai ta, amâ lânazie nata taonazie cha, tiaki miakha chhôh liata tiaki hropa a ypa hawhta a châ.

¹⁷ Ama sie tita, hmohrohneipa hmia palihpazy aheina lâ maih sie ei ta, a palie byuh leipa ta ama sie lymâ.

¹⁸ Tiaki tlâhzy cha a sâh ngaitapa nata chichhih ngaitapa châ ei ta, tiaki miapalih tlâhzy cha mokhaohzy ta a padô.

¹⁹ Hmohrohneipazy ama sie nahta, tiakizy chhao ama kiapâh liata sie lymâ hra ei ta; hmohrohneipazy alei tawhta ama thyu nahta, tiakizy ama thyu lymâ hra.

²⁰ Thlahpa ta sie awpa a tahna lâ maih sie lymâ ei ta, hmohrohneipazy thlahpa cha tiakizy liata a ypa vâta, tiakizy chhao ama hnohta ama thyu lymâ tyh.

²¹ Hmohrohneipazy thlahpa cha tiakizy liata a ypa vâta, hmohrohneipazy ama sie nahta, tiakizy sie hra ei ta; hmohrohneipazy amâ dua nahta, tiakizy a duah hra ei ta; hmohrohneipazy alei tawhta ama thyu nahta, tiakizy chhao ama hnohta ama thyu lymâ hra.

²² Hmohrohneipazy luh chô liata vâphuh ahlôpa a lyupa y ta. Cha cha lôsôhpa pasohpa hawhta noâhchhihpa ta patliepa ta, hmohrohneipazy luh chô liata a parai ta.

²³ Vâphuh ahlôpa ry liana chata hmohrohneipazy ta ama mathlawzy pakai ei ta, mathlaw miano ta hmohrohneipa hropa mathlaw miano hria ta, mathlaw miano ta a pôhpa khu ta.

²⁴ Ama sie nahta, ama mathlaw pyu cha ti hluhpi pyu hawhta thei na ta, Atotaotheipa ao hawhta theipa ta, pheisaih hluhpi awhsâhpa pyu hawhta ei thei. Amâ dua nahta deikua cha, ama mathlawzy ama pazih tyh.

²⁵ Ama luh chô vâphuh ahlôpa chô lâ tawhta chhao ao vaw pua ta, amâ dua nahta deikua cha, ama mathlawzy ama pazih tyh.

²⁶ Ama luh chô vâphuh ahlôpa chô liata beidyuchhai a lyupa y ta, â lânazie cha saphai lôsôhpa hawhta a châ. Beidyuchhai a lyupa chô liana chata chyhsapa alânazie a lyupa a tyuh ta.

²⁷ A chai hawhta â lâpa tawhta a chô lâ liata, thua patliepa a lyupa hmô na ta, a chhôh liata mei a lyupa y ta. A chai hawhta â lâpa tawhta a ry lâ liata, mei a lyupa hmô na ta, a chheipâh liata khaihna y ta.

²⁸ A chheipâh zydua liata khaihna alânazie cha, vâsua noh ta meihdo liata meisaku alânazie hawhta a châ. Abeipa rônahna lyuna alânazie cha, cha hawhna chata a châ. Ei hmô nahta, â khu lâta pao na ta, bie a reihtuhpa ao cha thei na ta.