ESTHERI 9 - Mara Bible RV (BSI)

Zuzy ta ama khakhaipazy ama pahleipadia

¹ Chatanachata abei biepiepa nata châpapuapa hawhta taopa ta, ama chariahzy ta Zuzy chô liata kupathlapa ta pahnie amâ chhuahna noh, thla hrawh hleinona, Adar thla, noh hrawh hleithôhna noh liata, â lie lâta hmo vaw y ta. Zuzy ta âmo a haotuhpazy chô liata kupathlapa ta ama pahniena noh tlao a vaw châ haw.

² Bei Ahasuarâ râh zydua liata Zuzy cha, ama rao nawpa a tluatuhpazy chô liata kupathla awpa ta, ama khihpizy liata a hmaohpakhy ei ta. Zuzy china ta phopi zydua chô liata a tla thlu hapa vâ ei ta, Zuzy hmia liata â duah theipa y veih ei.

³ Môdekai china ta ama chô liata a tla thlupa vâ ei ta, râh to ryureihtuhpazy, beimachâzy, râhvaotuhpazy nata bei vyuhpa ta a ypa chyhsazy ta Zuzy cha bao ei ta.

⁴ Môdekai cha abei o liata chyhsa rônahpa vaw châ ha ta, bie a hnei via lymâpa vâta, râh zydua liata a moh pathâh ta.

⁵ Zuzy ta ama chariah zydua cha zaozi ta chhawhpa ta, thie ei ta, pahleipadia ei ta, âmo a haotuhpazy chô liata ama khopa hawhta ama tao haw.

⁶ Thokhy khihpi Susâ lia tlai ta chyhsa 500 thie ei ta, pahleipadia ei ta,

⁷ Pâsâdathâ, Dâphô, Aspâthâ,

⁸ Pôrathâ, Adalia, Aridathâ,

⁹ Pâmastâ, Arisai, Aridai nata Vaizathâ zy ama thie haw.

¹⁰ Âmo cha Hâmedâthâ sawchapawpa Hâmâ, Zuzy chariahpa sawchapaw pahrawhzy ama châ. Hraona sôh deikua Zuzy ta hria veih ei.

¹¹ Cha noh liata, thokhy khihpi Susâ liata chyhsa ama thiepa maluh cha abei chho ei ta.

¹² Abei ta Beinô Estheri hnohta, “Zuzy ta thokhy khihpi Susâ liata chyhsa 500 thiepa ta, pahleipadia ei ta, Hâmâ sawchapaw pahrawhzy chhao ama thie haw. Abei khinarâh bia hropazy liata kheihta rimâ ma ama tao aw tly! Tahmâ khâpa na khoh? Piepa na châ aw. Khâpa na hia khoh via? Taopa a châ aw,” tah ta.

¹³ Estheri ta, “Abei alynazie a châ khiahta cha, Susâ liata Zuzy heta tanoh ta biepiepa hawhna heta mylâ chhao tao ei sala, Hâmâ sawchapawpa pahrawhzy ri cha paaosaona tho tlâh liata pangiehpa châ mawh sy,” tah ta.

¹⁴ Cha hawhta tao awpa ta, abei ta biepie ta. Biepiepa cha Susâ liata papua ta, Hâmâ sawchapawpa pahrawhzy ri cha paaosaona thotlâh liata pangieh ei ta.

¹⁵ Susâ liata Zuzy cha, Adar thla, noh hrawh hleipalihna noh liata a hmaohpakhy heih ei ta, Susâ liata chyhsa 300 thie ei ta. Hraona sôh deikua hria veih ei.

¹⁶ Abei khinarâh bia hropazy liata a ypa Zuzy chhao ta ama hrona pabohsa awpa ta a hmaohpakhy ei ta, ama chariahpazy tawhta â bohpa ta y ei ta. Âmo a haotuhpa chyhsa 75,000 thie ei ta, hraona sôh deikua hria veih ei.

¹⁷ Cha hmo cha Adar thla, noh hrawh hleithôhna noh ta vaw tlô ta, noh hrawh hleipalihna noh cha a pahâ ei ta, cha noh cha kyhchhina nata thaphana noh ta ama hmâh.

¹⁸ Susâ liata Zuzy deikua cha, noh hrawh hleithôhna nata noh hrawh hleipalihna nohzy liata a hmaohpakhy ei ta, noh hrawh hleipangawhna noh ta a pahâ ei ta, cha noh cha kyhchhina nata tha­phana noh ta ama hmâh.

¹⁹ Chavâta thokhy a hnei leipa khitawzy liata a pahrâpa Zuzy cha, Adar thla, noh hrawh hleipalihna noh cha thaphana nata kyhchhina noh ta hmâh ei ta, noh phapa, niedo kuhriazy amâ paphao raihriena noh ta ama hmâh tyh.

Puri kyhchhi

²⁰ Môdekai ta cha thâtihzy cha roh ta, Bei Ahasuarâ râh zydua liata Zu chyhsa, lâhnia nata lâhla liata a ypa zydua hnohta paphao ta.

²¹ Adar thla, noh hrawh hleipalihna noh nata noh hrawh hleipangawhna nohzy cha kô chareih ta chay awpa ta bie a pie.

²² Cha nohzy cha Zuzy ta ama chariahzy tawhta amâ bohna noh, pachârôhna alyna lâta â liena noh nata mâchhiesana noh phapa lâta â liena noh ta ama chay tyh awpa a châ. Kyhchhina nata thaphana nohzy ta hmâh aw ei ta, niedo kuhriazy a paphao raihriena nohzy ta hmâh hra aw ei ta, dyhchhiepazy hmosaipa piena noh ta ama hmâh awpa a châ.

²³ Chatanachata ama vaw tao pathao hapa hawhta nata Môdekai ta âmo lâ châ a ropa hawhta tao lymâ awpa ta, Zuzy ta â ryh tah ei ta.

²⁴ Hâmedâthâ sawchapawpa Akaki chyhsa, Zuzy chariahpa Hâmâ ta Zuzy pahleipadia awpa ta tei ta, Puri pachao ta. Cha cha Zuzy thiepa ta, pahleipadia khai awpa ta nuby a daopa ta pachaopa a châ.

²⁵ Châhrasala cha thâtih cha abei kô a vaw tlô nahta, Zuzy tei nawpa ta hmo chhiepa tao â chhuahpa cha, ano luh chô liata a lie thlupa ta, ano nata a sawchapawzy cha, paaosaona tho tlâh liata paaosao awpa ta ropa ta tlao bie a pie haw.

²⁶ Chavâta cha nohzy cha, Puri moh pachyuhpa ta Puri tahpa a châ. Chatanachata châ liata ropa bie zydua vâta zy, cha kyh liata hmo amâ tyhpa vâta zy, ama chô liata hmo a vaw tlôpa vâta zy ta

²⁷ Zuzy ta âmo chhâ nata ama pathlazy chhâ liata nata âmo a baipa phopi zydua ta, cha noh nozy cha, châ liata ropa hawhta kô chareih daihti raopa liata hmâh lymâ awpa ta â ipa ta bie a taih ei ta.

²⁸ Cha nohzy cha chhâ zydua ta a theipa ta chay tyh awpa châ ta, pho to, râh to nata khihpi to liata Zuzy hry liata, Puri nohzy cha hmâh leipa ta a y awpa châ vei. Ama pathlazy lia chhao ta, cha nohzy atheithlâhna cha pachhâsa beih lei awpa ta bie amâ taih.

²⁹ Chatanachata Abihai sawchanô Beinô Estheri nata Zu chyhsa Môdekai ta ama biehneina zydua hmâpa ta Puri kyh liata châpaphaopa mianona cha pa-i ei ta.

³⁰ Ahasuarâ abeina râh 127 liata a ypa Zu chyhsa zydua hnohta, thlalôhna bie nata biehmeiseihpa hmâpa ta châ ama paphao.

³¹ Puri nohzy kyh liata, Zu chyhsa Môdekai nata Beinô Estheri ta Zuzy cha bie pataihsa ei ta, bie amâ taihpa hawhta, âmo nata ama pathlazy ta a daihti raopazy liata kâhvileipa nata chaphôhtupa ta Puri nohzy cha chay tyh awpa ta, châpaphaopa liata ropa a châ.

³² Puri hmâna kyh cha Estheri biepiepa ta pa-ipa châ ta, cha cha châbu liata ropa a châ.