ESTHERI 8 - Mara Bible RV (BSI)

Estheri ta a phopi a pachha

¹ Cha noh ta, Zuzy chariahpa Hâmâ o cha, Bei Ahasuarâ ta Beinô Estheri pie ta. Estheri ta Môdekai nata amâ zaona kyh abei a chho hapa vâta, Môdekai cha abei hmiakô lâ a vy ta.

² Abei ta Hâmâ tawhta a lapa a kusadi pahluh ta, Môdekai pie ta. Estheri ta Môdekai cha Hâmâ o nata lyu chô liata hyutuhpa ta rao ta.

³ Estheri cha abei hmiakô liata bie reih heih ta. Abei phei thaby liata kei pao ta, Akaki chyhsa Hâmâ ta hmo pha leipa tao â chhuahpa, Zuzy chô liata hmotao â chhuahpa cha pachhâsa awpa ta mothlih chhaota hiah ta.

⁴ Abei ta ngôh chôchahrei cha Estheri lâ chaluah ta. Estheri cha thyu ta, abei hmiakô liata a duah ta,

⁵ a hnohta, “Abei alynazie châ sala, kei chhao abei modypa châ sah la, hmo ei rei awpa he abei ta â dopa ta pahno sala, abei mo liata a palysatuhpa ei châ khiahta cha, Akaki chyhsa Hâmedâthâ sawchapawpa Hâmâ ta Zuzy pahleipadia nawpa ta abei râh zydua liata châ a papuapa phiena biepiepa papua thlupa châ mawh sy.

⁶ Ei chiheih chô liata chhiena a tlôpa hmô aw sah la, kheihta ei tao thei aw? Ei chiheihzy leidiapa hmô aw sah la, kheihta ei tao thei aw?” tah ta.

⁷ Bei Ahasuarâ ta Beinô Estheri nata Zu chyhsa Môdekai hnohta, “Pachâ teh u, Zuzy chô liata kupathla â chhuahpa vâta, Hâmâ o cha Estheri pie na ta, Hâmâ chhao ama paaosao haw.

⁸ Zuzy kyh liata, pha nama tahnazie hawhta abei moh ta roh u la, abei kusadi ta chahnao pa-i muh vy. Abei moh ta biepapuapa ropa nata abei kusadi ta chahnao pa-i hapa cha panano theipa châ khao vei,” tah ta.

⁹ Cha daihti lia tlai ta, thla thôhna, Sivan thla, noh kih nata noh thôhna noh ta, abei chârohtuhpazy aw ei ta. Zuzy kyh liata Môdekai biepiepa hawhta, châpapuapa roh ei ta. India tawhta Kusi taihta a ypa, râh 127 liata beimachâzy, râhvaotuhpazy nata ryureituhpazy lâ paphao ei ta. Râh to âmo châ chyu ta paphaopa châ ta, phopi to ama reih chyu ta paphaopa a châ. Zuzy chhao âmo châ nata reih ta paphaopa ama châ.

¹⁰ Bei Ahasuarâ moh ta châ cha roh ta, abei kusadi ta chahnao pa-i ta. Bei arâ o liata a patawpa arâ chahrapazy kiapa ta, châraituhpazy ta châ cha ama rai lymâ.

¹¹ Khihpi to liata a ypa Zu chyhsazy cha, ama hrona pabohsa awpa ta, âmo a dyuhpa pheisaihzy, phopizy nata râhzy cha, hawtizy nata chanôzy chhaota pahleipadia ta, thie ta, pamua awpa ta abei ta pasaih ta, ama hmozy hrao awpa chhao a pasaih.

¹² Bei Ahasuarâ râh zydua liata Zuzy chariahpazy cha, noh kha ta thie khaipa châ aw ei ta, cha hmo cha thla hrawh hleinona, Adar thla, noh hrawh hleithôhna noh ta taopa a châ aw.

¹³ Châpapuapa liata biepiepa cha râh zydua lâta paphaopa châ ta, phopi to pahno awpa ta phuahpa a châ. Cha noh ta ama chariahpazy chô liata phuh la awpa ta, Zuzy cha amâ pachyh awpa a châ.

¹⁴ Chatanachata châraituhpazy ta bei biepiepa hawhta, bei chakaona raihria liata hmâpa arâ chahrapazy kiapa ta, a chatliepa ta châ cha rai ei ta. Biepiepa cha thokhy khihpi Susâ liata papuapa a châ.

¹⁵ Môdekai cha abei poh nohsaihpa nata diehpa a bupa ta, ngôh beilakho rônahpa nata poh rih dipa viahkao pasipa saihdôhpa a kypa ta, abei o tawhta pua ta. Susâ khihpi cha thata awh ei ta, a ly ngaita ei ta.

¹⁶ Zuzy châta khaihna, thaphana, alyna nata palyupalihna ama tona noh châ ta.

¹⁷ Abei biepiepa nata abei châpapuapa tlôna râh to nata khihpi to liata Zuzy cha thaphana nata alyna ta ama bie. Kyhchhizy taopa ta, apahâna nohzy phuah ei ta. Cha râh liata a ypa phopizy hry tawhta chyhsa hluhpi cha, Zuzy china ta a tla thlupa vâ ei ta, Zu chyhsa lâta amâ palie hôlô.