ESTHERI 7 - Mara Bible RV (BSI)Estheri ta Hâmâ hmochhuahpa a palâhâh 1 Abei nata Hâmâ cha Beinô Estheri kyhchhi a hlao awpa ta vawh ei ta. 2 A noh nona noh ta, pati nie khai tawhta kresawhti ama do hai nota, abei ta Estheri hnohta, “Khâpa na khoh, Beinô Estheri? Piepa na châ aw. Khâpa na hia? Ei khinarâh khophie chhao rai châ sala, piepa na châ aw,” tah heih ta. 3 Beinô Estheri ta a chhy ta, a hnohta, “Hy abei y, na modypa châ sah la, abei alynazie a châ khiahta cha, ei khopa hmo ei reipa hawhta ei hrona pahlôhpa châ sala, ei hmo hiapa hawhta ei chiheihzy hrona pahlôhpa châ mawh sy. 4 Kei nata ei chiheihzy cha pahleipadia awpa nata thie awpa nata pamua awpa ta zuapa eima châ haw. Seichanô ta tlyma, seichapaw ta tlyma, zuapa rakhapa eima châ khiahta cha, ei chalih thlâh ha aw. Keimo pasa taona cha abei ta a pahlei awpa nata pakho khi châ vei,” tah ta. 5 Bei Ahasuarâ ta Beinô Estheri hnohta, “Cha hawhpa hmo a tao ngâhpa cha ahy ma a châ? Khataih liata a y?” tah ta. 6 Estheri ta, “Khakhaipa nata chariahpa a châ! He moleipa Hâmâ he a châ,” tah ta. Hâmâ cha abei nata beinô hmiakô liata thata a chalyu ta. Hâmâ paaosaopa a châ 7 Abei cha pathi ia ngaitapa ta kresawhti dona tawhta thyu ta, abei sadô lâ vawh ta. Hâmâ deikua cha, abei ta a chô liata kupathla khâchâ â chhuah haw tahpa a pahnopa vâta, a hrona pahlôh awpa ta Beinô Estheri hiah awpa ta y patlua ta. 8 Abei cha abei sadô tawhta kresawhti ama dona su lâ a vaw lie ta, Estheri atyuna dyuchhai liata Hâmâ paopa cha hmô ta. Abei ta, “Ei mohmô nata ei o lia taihta beinô patupakhi â chhuah bâ he zaw,” tah ta. Cha bie cha abei pakah tawhta a puapa nahta, Hâmâ hmia cha khu ei ta. 9 Bei chakaotuhpa hrilyupa Habônâ ta abei hnohta, “Pachâ teh, Môdekai, ano bie pahnopa vâta abei hrona a pachhatuhpa paaosao nawpa ta, Hâmâ ta dy sypangawh a sâhpa paaosaona a tao chiehpa a o liata a y thlâh haw,” tah ta. Abei ta, “Cha liata kei paaosao teh u,” tah ta. 10 Chatanachata Hâmâ cha Môdekai paaosao nawpa ta a taopa liata paaosao ei ta. Cha khai tawhta abei pathiiana cha dia ha ta. |