ESTHERI 6 - Mara Bible RV (BSI)

Abei ta Môdekai a palyupalih

¹ Cha zâ liata abei cha a mô thei leipa ta. Hmo ngia tlâhpazy rona, thâtihzy rona châbu vaw cheih awpa ta biepie ta. Châbu cha abei hmiakô liata reih ei ta.

² Abei ochhi vaituhpa hrilyupa pano, Bikathâ nata Tere ta Abei Ahasuarâ chô liata kupathla amâ chhuahpa kyh Môdekai ta a phuahpa thâtih ropa hmôpa châ ta.

³ Abei ta, “Cha kyh vâta Môdekai hnohta khâpa palyupalihna nata rônahna ma piepa a châ tly?” tah ta. Abei chakaotuhpa thyutliazy ta, “Ano châta khâpa hmah taopa y vei,” tah ei ta.

⁴ Abei ta, “Dôhpachhôh tlyhmia liata chyhsa ama y ma?” tah ta. Cha nota Hâmâ cha ano ta paaosaona a taopa liata Môdekai paaosao awpa kyh abei reikhei awpa ta, abei o dôhpachhôh tlyhmia tytuapa liata a vaw ngia ta.

⁵ Bei chakaotuhpazy ta abei hnohta, “Moh tua, dôhpachhôh tlyhmia liata Hâmâ â duah thlâh ha huh,” tah ei ta. Abei ta, “Vaw pangiasa teh u,” tah ta.

⁶ Hâmâ cha a ngia ta, abei ta a hnohta, “Abei ta a palyupalih khohpa chyhsa châta khâpa taopa châ sala a pha aw?” tah ta. Hâmâ cha a palôh liata, “Abei ta kei hlâta a palyupalih khoh viapa ahy a y hlei aw,” tahpa pachâ ta.

⁷ Hâmâ ta abei hnohta, “Abei ta palyupalih a khohpa chyhsa châta

⁸ abei a tobi tyhpa abei chysiazy vaw cheipa châ sala, abei kia tyhpa arâ chhao a vaw chhipa châ sala, abei â kho tyhpa beilakho chhao vaw cheipa châ mawh sy.

⁹ Abei chysiazy nata arâ cha beimachâ nôpaw chaipazy ku liata hlâpa châ sala, abei ta a palyupalih khohpa cha âmo ta tobi ei sala, arâ pakiasa ei sala, khiliah chahryh khei mawh ei sy. A hmia lâta sie aw ei ta, a hmiakô liata, ‘Abei ta a palyupalih khohpa chyhsa cha, hetana heta taopa a cha aw,’ tahpa ta ama phuah laih lymâ aw,” tah ta.

¹⁰ Abei ta Hâmâ hnohta, “Na reipa hawhna chata abei chysiazy nata arâ cha kei la para la, abei tlyhmia liata a tyuh tyhpa Môdekai chô liata kei tao teh. Na reipa zydua kha, mypa y cheita khah sy,” tah ta.

¹¹ Chatanachata Hâmâ ta abei chysia nata arâ cha la ta, Môdekai cha tobi ta, khiliah chahryhkhei ta, “Abei ta a palyupalih khohpa chyhsa cha, hetana heta taopa châ mawh sy,” tahpa ta awh laih ta.

¹² Cha khai tawhta Môdekai cha abei tlyh­mia lâ a vaw lie ta. Hâmâ deikua cha, a luh poh a khu ta, mâchhiesapa ta a o lâ a di ta.

¹³ Hâmâ ta a chô liata hmo tlôpa zydua cha a lapinô Zeresi nata a viasa zydua chho ta. A chyhsa sopazy nata a lapinô Zeresi ta a hnohta, “A hmiakô liata na pao pathaopa Môdekai cha Zu chyhsa a châ khiahta cha, pahnie aw va chi, a hmiakô liata na pao thlyu aw,” tah ei ta.

¹⁴ Cha hawhta ama rei hai nota, bei chakaotuhpa hrilyupazy vaw tlô ei ta, Hâmâ cha Estheri kyhchhi a hlao awpa ta a para ngaitapa ta a chhi ha ei ta.