ESTHERI 5 - Mara Bible RV (BSI)

Estheri abei lâ â ngia

¹ A noh thôna noh ta, Estheri cha beinô chysia a tobi ta, abei o dôhpachhôh tlyhmia liata abei chhôhpadâhpa dady liata a kei duah ta. Abei cha abei o angiana dady liata beidyuchhai chhôhpadâhpa chhôh liata a beidyuchhai liata a tyuh ta.

² Abei tlyhmia dôhpachhôh liata Beinô Estheri â duapa abei ta a hmô nahta, Estheri a hmôpa cha a ly kaw ta, ngôh chôchahrei â chabapa cha Estheri lâ kei chaluah ta. Estheri cha a kei hnia ta, abei chôchahrei pawhmao kei hria ta.

³ Abei ta a hnohta, “Khâpa bie rimâ maw, Beinô Estheri? Khâpa na hia khoh? Na hiapa cha piepa na châ aw, ei khinarâh khophie chhao ei cha pie aw,” tah ta.

⁴ Estheri ta, “Abei alynazie a châ khiahta cha, tanoh abei châta kyhchhi ei chhuanohpa liata, abei nata Hâmâ a vy awpa ta ei châ haw ei,” tah ta.

⁵ Abei ta, “Estheri ahawna hawhta tao awpa ta, Hâmâ cha thlai a vaw chhi teh u,” tah ta. Chatanachata abei nata Hâmâ cha Estheri a chhuanohpa kyhchhi lâ cha a vy ei ta.

⁶ Pati nie khai tawhta kresawhti ama do hai nota, abei ta Estheri hnohta, “Khâpa na khoh? Piepa na châ aw. Khâpa na hia? Ei khinarâh khophie chhao châ sala, piepa na châ aw,” tah ta.

⁷ Estheri ta, “Ei khopa nata ei hiapa cha he he a châ:

⁸ Abei modypa châ sah la, ei khopa nata ei hiapa na pie awpa cha abei alynazie a châ khiahta cha, mylâ abei nata Hâmâ châta kyhchhi a chhuanoh aw na ta, kyhchhina lâ cha a vy ei sala, abei reipa hawhta, ei khopa cha abei ei chho aw,” tah ta.

Hâmâ ta Môdekai paaosao â chhuah

⁹ Cha noh ta, Hâmâ cha thaphapa nata a ly ngaitapa ta pua ta. Châhrasala abei tlyhmia liata Môdekai hmô ta, a duah leipa ta, a hmiakô liata â chalyu leipa a hmô nahta, Hâmâ cha Môdekai chô liata thata a hiehâh ta.

¹⁰ Châhrasala Hâmâ cha a sohsi lyliapa ta o lâ a di ta. A viasazy nata a lapinô Zeresi paawsa ta.

¹¹ Hâmâ ta sôh nata piah a hnei hluhzie zy, sawchapaw a hneipa zie zy, abei ta a pakiasâhsana, a palyupalihna nata beimachâ nata chakaotuhpa hropazy hlâta chônô viapa ta a sona thâtihzy âmo cha chho ta.

¹² Ama hnohta, “Beinô Estheri chhao ta, a kyhchhina liata abei hnohta a hlao hra awpa ta, mohropazy hrua tlâ leipa ta, kei deita eina hrua. Mylâ chhao abei nata miah a hrua heih.

¹³ Châhrasala abei tlyhmia liata Zu chyhsa Môdekai â tyupa ei hmô chhôh zydua ta la, cha zydua cha ei châta khâpa hmah phahnai vei,” tah ta.

¹⁴ A lapinô Zeresi nata a viasa zydua ta a hnohta, “Dy sypangawh a sâhpa paaosaona taopa châ sala, cha liata Môdekai cha paaosao awpa ta, mydi ta abei chho aw chi ta, chatanachata kyhchhina lâ cha abei hnohta a lypa ta vawh mah y,” tah ei ta. Cha bie chata Hâmâ cha palysa kaw ta, paaosaona cha pataosa ta.