ESTHERI 4 - Mara Bible RV (BSI)

Estheri ta a phopi a bao

¹ Ama hmotaopa zydua cha Môdekai ta a pahno nahta, a chysiazy hrie ta, latho poh a bupa ta buchâh a mia ta, khih liah chahryh ta, ao paro ngaitapa nata palôh chhie ngaitapa ta cha laih ta.

² Ahy hmahta latho poh a bupa ta abei tlyhmia dôhpachhôh lâ a ngia pasaipa a châ leipa vâta, Môdekai cha abei tlyhmia dôhpachhôh lâ angiana chhikao taih vawh ta.

³ Bei biepiepa nata châpapuapa a tlôna bia to liata a ypa Zuzy cha thata mâchhiesapa ta, kâhvileipa nata chapa nata chaphôhtupa ta y ei ta. Chyhsa hluhpi cha latho poh a bupa ta buchâh liata a zia ei ta.

⁴ Môdekai hmotaopa cha, Estheri laihsazy nata a chakaotuhpa hrilyupazy ta Estheri chho ei ta. Beinô cha a pachârôh ngaita ta. Môdekai cha a latho poh hlaipa ta chysia a tao awpa ta, chysiazy paphao ta. Châhrasala Môdekai ta a hlâh khoh leipa ta.

⁵ Estheri ta ano chakao awpa ta raopa bei chakaotuhpa hrilyupa Hâthâh aw ta. Môdekai lâ tuah ta, a hmotaopa yzie nata khâpa vâta a taopa ma a châ tahpa kei pahiahrisa ta.

⁶ Hâthâh cha abei tlyhmia hmia lâta khihpi tlyliah liata a ypa Môdekai lâ vawh ta.

⁷ Môdekai ta a chô liata hmo a tlôpa zydua nata Hâmâ ta Zuzy pahleipadia nawpa ta abei sôh châta pie awpa bie â taihpa sôh ziepa chhao Hâthâh cha chho ta.

⁸ Zuzy pahleipadia nawpa ta Susâ liata châpapuapa chhao Estheri pahmô ta chhopasia awpa Hâthâh cha pie ta. Abei lâ a ngia sala, a khokheina hiapa ta, a chiheihzy châta ahawna tao awpa ta, Môdekai ta Estheri cha bie a pie.

⁹ Hâthâh ta Môdekai bietapazy cha Estheri chho ta.

¹⁰ Estheri ta Hâthâh cha Môdekai lâ tuah heih ta, a hnohta hetana heta chho awpa ta bie a pie:

¹¹ “Bei chakaotuhpa zydua nata abei râhzy liata chyhsa zydua ta, ahy rai, chanô chhao, chapaw chhao, aw leipa ta abei chhôhpadâhpa chhôh chaipa lâ a ngiapa cha, ryhpa miakha deita y ta, thie awpa a châ. Abei ta ano lâta ngôh chôchahrei a chaluahpa deita a hroh tyh tahpa ama pahno khai. Kei he abei ta noh sythôh chhôh na aw khao vei,” tahpa ta.

¹² Estheri biereipa cha Môdekai chho ei ta.

¹³ Môdekai ta hetana heta Estheri cha a chhy awpa ta a chho ei: “Zu chyhsa zydua ta ama khôkhâh lei awpa cha, nâ chhao abei o liata y hra la, a khôkhâh awpa a pangiasa khah y.

¹⁴ He hawhpa daihti liata nâ chalih thlâh ha khiahta cha, Zuzy châta abohna nata pachhana su hro lâ tawhta vaw tlô aw ta, nâ nata na paw chhôhkhazy deikua cha nama leidia aw. Beinô na châpa he, he hawhpa daihti châta châ vei tahpa ahy a reih thei aw?” tahpa ta.

¹⁵ Estheri ta hetana heta Môdekai kei pachhosa heih ta:

¹⁶ “Vawh la, Susâ liata a ypa Zu chyhsa zydua pakhy khai la, ei châta kâhvileipa ta y u la, noh thôh chhôh, chhô nah zâ ta khâpa hmah nie leipa u la, khâpa hmah doh hra khuh vy. Kei nata ei laihsazy chhao, nâmo taopa hawhta kâhvileipa ta y hra aw pi ta, cha khai tawhta abei lâ cha ei ngia aw. Ryhpa chakhiapa a châ awpa vâta, ei thi hapa chhao ta, thi lah vâ na,” tah ta.

¹⁷ Chatanachata Môdekai cha vawh ta, Estheri ta bie a piepa zydua hawhta tao ta.