ESTHERI 3 - Mara Bible RV (BSI)

Hâmâ ta Zuzy pahleipadia awpa ta a tei

¹ Cha hmozy hnôhlâ ta, Bei Ahasuarâ ta Akaki chyhsa Hâmedâthâ sawchapawpa Hâmâ cha a rai pakiasâhsa ta, a beimachâ hropa zydua hlâta dyuchhai a sâh viapa liata patyusa ta.

² Ano kyh liata abei ta bie a piepa hawhta, abei tlyhmia liata a tyuhpa bei chakaotuhpa zydua ta Hâmâ hmiakô liata a bôhpa ta amâ naoh tyh. Môdekai deikua cha Hâmâ hmiakô liata a bôh khoh leipa ta, a naoh khoh vei.

³ Abei tlyhmia liata a ypa bei chakaotuhpazy ta Môdekai hnohta, “Khazia bei biepiepa na parao?” tah ei ta.

⁴ Noh chareih ta chho ei ta, châhrasala Môdekai ta nathlie khoh leipa ta, Zu chyhsa a châpa vâta ama reipa hawhta a tao thei leizie a chho tyh ei. Môdekai aduana cha a pyh theipa a châ ma tahpa pahno awpa ta, a biereipa cha Hâmâ ama chho.

⁵ Môdekai ta a hmiakô liata â bôh leipa nata â naoh leipa Hâmâ ta a hmô nahta, Hâmâ cha hiehâhna ta bie ta.

⁶ Châhrasala Môdekai chô lia dei ta kupathla awpa cha â daih tah leipa ta. Môdekai cha kheihawhpa phopi ma a châ tahpa ama chho hapa vâta, Ahasuarâ khinarâh liata a ypa Môdekai phopi Zu chyhsa zydua pahleipadia khai awpa a chhuah ta.

⁷ Bei Ahasuarâ abeina kô hrawh hleinona, thla khana, Nisan thla liata, Hâmâ hmiakô liata noh chareih Puri pachao ei ta. Puri pachaopa cha nuby a daopa a châ. Nuby cha thla chareih ta a dao ei ta, thla hrawh hleinona Adar thla taihta amâ dao.

⁸ Hâmâ ta Bei Ahasuarâ hnohta, “Nâ beinarâh bia to liata phopizy hry liata a hiepatlapa nata a paipatlapa phopi miakha y ta. Ama ryhpazy cha phopi hropazy ryhpa nata anano ta, abei ryhpazy zyh leipa ei ta, chavâta cha hawhpa chyhsazy chhyhthaipa cha abei châta athôhna y vei.

⁹ Chavâta abei alynazie a châ khiahta cha, âmo cha pahleipadia khai awpa ta bie papuapa châ sala, abei sôh o liata so awpa ta abei sôh mohôhtuhpazy ku liata tâkâ talent 10,000 ei pie aw,” tah ta.

¹⁰ Abei ta a kusadi pahluh ta, Zuzy khakhaipa Akaki chyhsa Hâmedâthâ sawcha­pawpa Hâmâ cha pie ta.

¹¹ Abei ta Hâmâ hnohta, “Pha na tahnazie hawhta tao awpa ta, sôh chhao, a phopi chhao, piepa na châ,” tah ta.

¹² Chatanachata thla khana, noh hrawh hleithôhna noh ta, abei chârohtuhpazy aw ei ta, Hâmâ biepiepa hawhta bia zydua liata beimachâzy, râhvaotuhpazy nata phopizy chhituhpazy lâta châ papua ei ta. Âmo châ nata âmo reih chyu ta bia to liata châ papuapa a châ. Châ cha Bei Ahasuarâ moh ta ropa châ ta, abei kusadi ta chahnao pa-ipa a châ.

¹³ Chyhsazy tuah ei ta, châ cha abei râh pachhaihpa zydua lâta ama paphao. Râh liata Zu chyhsa a ypa thyutlia nata machâ, chanô nata hawti zydua noh kha chhôh ta, Adar thla, thla hrawh hleinona, noh hrawh hleithôhna noh ta pahleipadia khai ta, thie khai ta, pamua khai awpa nata ama hmo zydua hrao khai awpa ta, châ liata ropa a châ.

¹⁴ Cha noh ta phuah awpa ta a mâ chiehpa ta a y thei nawpa ta, châ cha bia to liata phopi zydua hnohta biepiepa ta papuapa a châ.

¹⁵ Biepiepa cha thokhy khihpi Susâ liata papuapa châ ta, bei biepiepa hawhta châraituhpazy ta a chatliepa ta sie ei ta. Abei nata Hâmâ cha sahma do awpa ta a tyuh ei ta. Cha nota Susâ khihpi deikua cha thata â tymâ.