ESTHERI 2 - Mara Bible RV (BSI)

Estheri beinô a vaw châ

¹ Cha hmozy hnôhlâ ta, Bei Ahasuarâ cha a hiehâhpa a dia nahta, Vâsti a thei ta. Vâsti hmotaopa nata ano kyh liata biepapuapa chhao a thei ta.

² Bei chakaotuhpazy ta a hnohta, “Abei châta laihsa kôpa hmiphapa tluapa châ mawh sy.

³ Abei ta â beina râh zydua liata hyutuhpazy rao sala, âmo chata laihsa dawpa nata kôpa hmiphapa zydua thokhy khihpi Susâ liata chanôzy yna liata amâ vaw chhipakhy aw. Chanôzy mohôhtuhpa hrilyupa Hekai ta âmo cha mohôh aw ta, chhithai nawpa ta mohôhnazy ta a phapa ta mohôhpa ama châ aw.

⁴ Bei a palysa chaipa laihsa cha Vâsti vyuhpa ta beinô a châ aw,” tah ei ta. Cha pahruana chata abei cha palysa kaw ta, cha hawhna chata tao ta.

⁵ Cha daihti liata, thokhy khihpi Susâ liata Zu chyhsa pakha, a moh Môdekai ama tahpa y ta. Môdekai cha Zairâ sawchapawpa châ ta, Zairâ cha Simei sawchapawpa châ ta, Simei cha Benzami chyhsa Kisâ sawchapawpa a châ.

⁶ Babylaw bei Nebukaneza ta Zudâh bei Zekôniah sei ta â chhi nota, Môdekai cha Zerusale tawhta Babylaw lâ sei ta a siepa a châ hra.

⁷ Môdekai cha a paw unawhpa sawchanô Hadâsâ chhytuhpa châ ta, Hadâsâ cha Estheri tahpa ta awpa a châ. Estheri cha nôpaw a hnei khao leipa vâta Môdekai ta a chhy. Cha laihsa cha pizie pha kawpa nata mo ngia kawpa châ ta, a nô nata a paw ama thi tawhta, Môdekai ta a sawchanô ta â lapa a châ.

⁸ Bei biepiepa nata châpapuapa cha phuahpa a châ nahta, thokhy khihpi Susâ liata Hekai mohôhna ry liata laihsa hluhpi pahmaoh ei ta. Estheri chhao abei o lâ a chhipa châ hra ta, chanôzy mohôhtuhpa Hekai mohôhna ry liata sopa a châ hra.

⁹ Estheri ta Hekai cha palysa kaw ta, chavâta a khokheina to ta. Chhithai thei nawpa ta a hnia awpa nata a thu awpa nata niedo phapazy thlai pie ta. Ano chakao awpa ta, abei o tawhta laihsa pasari raopa châ ta, Estheri nata a chakaotuhpa pasarizy cha chanôzy yna su pha chaipa liata paysa ta.

¹⁰ Môdekai ta phuah lei awpa ta bie a pie hapa vâta, Estheri ta kheihawhpa chipho ma a châ tahpa nata ahyzy ma a heinawhzy a châ ei tahpa phuah vei.

¹¹ Estheri cha a tlâh ma, kheihta ma a y tahpa zy pahno khopa ta, Môdekai cha noh chareih ta chanôzy yna tlyhmia liata â hlaihlâ tyh.

¹² Chanôzy tao awpa ryhpa ry liata thla hrawh hleino ama y khai tawhta, laihsazy cha Bei Ahasuarâ lâ amâ ngiana daihti vaw tlô ta. Chanôzy châta chhithaina mohôhna daihti cha thla hrawh hleino châ ta, thla charu chhôh myrâ thaw ta mohôhpa châ ei ta, thla charu chhôh ropahâhpa nata sathaw ta mohôhpa ama châ.

¹³ Abei lâ â ngia daihti a tlô nahta, laihsazy cha ama khopa maih chanôzy yna tawhta abei o lâ a chei awpa pasaipa ama châ.

¹⁴ Zâlâ ta a ngia ei ta, a mylâ my ta chanôzy yna mianona lâ amâ lie tyh. Chanôzy yna mianona mohôhtuhpa cha bei chakaotuhpa hrilyupa Sâsakâ châ ta, ano cha abei nôthozy mohôhtuhpa a châ. Abei ta a chô liata a ly ta, a moh ta a aw heihpa laihsa tah leipa cha, laihsa hropazy cha abei lâ amâ ngia awpa châ khao vei.

¹⁵ Môdekai ta sawchanô ta â lapa Estheri, Môdekai unawhpa Abihai sawchanô cha, abei lâ â ngiana daihti a tlô nahta, chanôzy mohôhtuhpa hrilyupa Hekai ta ano châta â tlyhpazy tah leipa cha, khâpa hmah a chei leipa ta. Estheri cha a hmôpa maih mody kawpa châ ta.

¹⁶ Bei Ahasuarâ â beina kô sarina, thla hrawhna, Tebe thla liata, Estheri cha Bei Ahasuarâ yna abei o chhôh lâ a ngiakheipa châ ta.

¹⁷ Abei ta chanô hropa zydua hlâta Estheri cha khoh chai ta, laihsa kôpa hropa zydua hlâta abei ngiachhiena nata khokheina to via ta, chatanachata beilakho pakho ta, Vâsti vyuhpa ta beinô ta a tao haw.

¹⁸ Chatawhcha abei ta a beimachâ nata nôpawpa zydua châta Estheri moh ta kyhchhi rônahpa tao ta. A râh zydua liata chhiezy paei ta, abei riaphana palâsapa ta hmosaipazy a rai ei.

Môdekai ta abei hrona a pabohsa

¹⁹ Laihsa kôpazy a einona ta amâ hmaoh nota, Môdekai cha abei chhikao thaby liata a tyuh ta.

²⁰ Môdekai biepiepa vâta, Estheri ta ahy­zy ma a heinawhzy a châ ei tahpa nata kheihawhpa chipho ma a châ tahpa a pahnosa leipa ta. A vaw mohôh nota a bie a zyh tyhpa hawhta, Estheri ta Môdekai bie zyh lymâ ta.

²¹ Cha nohzy liata, abei tlyhmia liata Môdekai â tyu thlâh ha nota, bei chakaotuhpa pano, ochhi vaituhpa Bikathâ nata Tere zy cha abei chô liata ama hiehâh ta. Chavâta Bei Ahasuarâ chô liata kupathla a chhuah ei ta.

²² Cha thâtih cha Môdekai ta pahno ta, Beinô Estheri chho ta. Estheri ta Môdekai moh ta abei chho pachhuah ta.

²³ A thâtih cha pasia ei ta, biedopa tlai a châ tahpa ama pahno papua nahta, ama pano ta ama paaosao haw. Cha thâtih cha, abei mohmô lia tlai ta, thâtihzy rona châbu liata ropa a châ.