ESTHERI 1 - Mara Bible RV (BSI)

Bei kyhchhi

¹ He hmozy he Bei Ahasuarâ â bei nota a tlôpa a châ. Ahasuarâ cha India tawhta Kusi taihta râh pachhaihpa 127 chô liata bei châ ta.

² Cha nohzy liata, Bei Ahasuarâ cha thokhy ta dôhpa Susâ khihpi liata a beidyuchhai liata a tyuh ta.

³ Â beina kô thôhna liata a beimachâ nata chakaotuhpa zydua châta kyhchhi tao ta. Persia nata Media pheisaihzy nata râh pachhaihpazy tawhta nôpawpazy nata râhvaotuhpazy a hmiakô liata y khai ei ta.

⁴ Â beina râh rônahzie nata ano mopakha rônahzie nata laiphazie zy noh hluhpi, noh 180 tlai pamosa ta.

⁵ Kyhchhi nohzy a chhâ nahta, abei ta thokhy khihpi Susâ liata a ypa molaipa nata mochyhpa zydua châta abei o sadô tlyhmia liata noh sari chhôh kyhchhi pazao heih ta.

⁶ Sadô liana cha pala rih dipa pohrai diehpa nata nohpa zy pangiehpa châ ta, chazy cha pala rih dipa chaori diehpa nata nohsaihpa hmâpa ta, awhlôteihpa tôh liata pataohpa takâ tiakizy liata pazaopa a châ. Thlalâ a lyupa alô châpazy, awhlôteihpazy, taikulô pha chaipa nata lôsôhpazy ta taopa sadô siphiah chô liata, ngôh nata tâkâ dyuchhaizy patyupa a châ.

⁷ Ngôh nyu ta kresawhti rai ei ta, nyuzy cha chi nanopa a lyu leipa sai a châ. Bei hneirôhpa a châpa hawhta, abei kresawhti chhao a hluh ngaita.

⁸ Chyhsa to ama khona zie ta doh awpa ta, abei ta abei o liata hriatuhpazy biepie ta. “Pasaipa-ipa châ khah se” tahpa biepiepa hawhta kresawhti cha ama khona zie ta doh chyu ei ta.

⁹ Beinô Vâsti chhao Ahasuarâ abei o liata chanôzy châta kyhchhi tao hra ta.

Beinô Vâsti ta abei bie a ei

¹⁰ A noh sarina noh ta, abei cha kresawhti vâta a palôh thathyu kaw ta, chatanachata bei chakaotuhpa pasarizy, Mehumâ, Bizathâ, Hôbônâ, Bithâh, Abathâ, Zethâ nata Kâkâ zy cha,

¹¹ abei hmiakô liata Beinô Vâsti a vaw chhi awpa ta biepie ta. Beinô Vâsti cha mo ai leipa a châpa vâta, a chhithaina cha phopizy nata beimachâzy pamosa awpa ta, beinô lakho a khona chôta a vaw luah awpa ta biepiepa a châ.

¹² Châhrasala Beinô Vâsti ta chakaotuhpazy ta bei biepiepa ama chhopa cha paryhsa leipa ta. Abei cha a ruchhô ngaita ta, pathi iapa ta a chhôh thata kâ ta.

¹³ Abei ta hmo pahno thaipa chyhsa sopazy a saohiah ta. Ryhpa nata pachiana kyh liata chyhsa sopazy a saohiahpa cha abei taozie tyhpa a châ.

¹⁴ Abei a pazipa beimachâzy cha Kâsenâ, Setharâ, Amâthâ, Tâsi, Mere, Mâsenâ nata Memukâ zy châ ei ta, âmo cha abei hmia a hmô tyhpa Persia nata Media beimachâ pasarizy châ ei ta, khinarâh liata hmia chai ta a tyuh tyhpazy ama châ.

¹⁵ Abei ta, “Beinô Vâsti cha chakaotuhpazy ta ama chhopa Bei Ahasuarâ biepiepa tao khoh leipa ta, ryhpa hawhta a chô liata kheihta tao awpa ma a châ?” tah ta.

¹⁶ Memukâ ta abei nata beimachâzy hmiakô liata, “Vâsti he abei chô liata dei hmo parao leipa ta, beimachâ zydua chô liata nata Bei Ahasuarâ râh zydua liata phopi zydua chô liata hmo paraopa a châ.

¹⁷ Beinô hmotaopa he chanô zydua ta pahno aw ei ta, ‘Bei Ahasuarâ ta Beinô Vâsti a hmiakô liata a vaw chhi awpa ta biepie ta, châhrasala vawh vei,’ tahpa a pathâh khiahta cha, ama vahpazy ama mohnao aw mâh tâh.

¹⁸ Tanoh tlai heta, beinô hmaotaozie a pahnopa Persia nata Media nôhrâhpazy ta, beinô hmotaozie hawh tlai ta beimachâ zydua chô liata tao hra aw ei ta, amohnaona nata pathiiana thata a pua aw.

¹⁹ Abei alynazie a châ khiahta cha, bei biepiepa pathâhsapa châ sala, Vâsti cha Bei Ahasuarâ hmiakô liata a luah beih khao lei awpa ta taopa châ sala, panano thei khao lei awpa ta, Persia nata Media ryhpazy hry liata pahlaopa châ mawh sy. Beinô a châna chhao, ano hlâta a pha viapa hnohta abei ta pie mawh sy.

²⁰ Chatanachata abei tawhta bie a puapa cha, a khinarâh zydua liata pathâhsapa a châ tita, he râh kawh ngaitapa liata chanô zydua ta ama vahpazy cha, molaipa tlyma, mochyhpa tlyma a châpa chhao ta ama za aw,” tah ta.

²¹ Cha pasopakâna bie chata bei nata beimachâzy cha palysa kaw ta, Memukâ pahruana hawh chata abei ta tao ta.

²² Chapawzy cha ama o chhôh chyu liata hyutuhpa châ aw ei ta, ama phopi reih ama cheih chyu awpa a châ, tahpa ta khinarâh pachhaihpa zydua lâta, ama châ nata reih chyu ta châ paphao ta.