EPHESI 6 - Mara Bible RV (BSI)

Nôpaw nata sawzy

¹ Saw saih u, Abeipa liata nama nôpawzy rei a ngiah teh u. Cha cha hmo dopa châ tlôh ta.

² “Na nô nata na paw palyupalih teh,

³ na châta pha aw ta, alei liana heta na hro a pareih aw,” tahpa he bietai byhnâ a hneipa biepiepa hmiatuachaipa a châ.

⁴ Nâmo, pawzy saih u, nama sawzy ru pachhô leipa u la, Abeipa chhoreina nata pachuna liata tlao mohôh teh u.

Seizy nata zibeipazy

⁵ Seizy saih u, Krista rei namâ ngiapa hawhta, palôh dopa phaopa ta, chipa nata a chalyupa ta, khizaw liata nama zibeipazy rei a ngiah teh u.

⁶ Chyhsa palysa a chhuahpazy hawhta ama hmô nota dei hria leipa ta, Krista seizy hawhta palôh hmeiseihpa ta Khazohpa khopa tao teh u.

⁷ Chyhsa chakaopa châ leipa ta, Abeipa chakaopa hawhta pachâpa ta, palôh hmeiseihpa ta chakao muh vy.

⁸ Sei rai châ sala, khotalaipa rai châ sala, chyhsa to ta hmo phapa ama taopa maih cha, Abeipa tawhta ama hmô heih aw tahpa pahno teh u.

⁹ Nâmo, zibeipazy saih u, cha hawhna chata nâmo chhao nama seizy chô liata tao hra teh u. Âmo chhao, nâmo chhao, avâ liata zibeipa pakha nama hneipa pahnopa ta, ano liata cha khokhei eih viapa y veih ei tahpa pahnopa ta, nama seizy pachhipary khuh vy.

Khazohpa chaihrai kipa

¹⁰ A chhâ chaina ta cha, Abeipa nata a thatlôna liata thatlôpa ta y teh u.

¹¹ Ahripa reipasaonazy nama pahnie thei nawpa ta, Khazohpa chariah chhaichhi pakipa ta a tobi teh u.

¹² Eimâ piapazy he sapa nata thisaih châ leipa ei ta, abeinazy, biehneinazy, he khizaw zohna chô liata hmotaotheinazy nata avâ suzy liata a ypa thlahpa moleipazy tlao ama châ.

¹³ Chavâta noh pha leipa liata namâ dyuh thei nawpa nata nama tao khai tawh chhao ta namâ duah thei nawpa ta, Khazohpa chariah chhaichhi pakipa ta a tobi teh u.

¹⁴ Biehmeiseihpa ta nama chai a saih u la, siana chachôhna vyhphao a kypa ta a duah teh u.

¹⁵ Adyhna thâtihpha châta a mâ chiehpa ta ypa ta, nama phei liata adyhna pheiky a ky teh u.

¹⁶ Chazy thota, ngiapâna vyhphao a chaba u la, cha chata moleipa châtai mei zydua nama pachhai thei aw.

¹⁷ Chatawhcha pachhana lakhu a khu u la, Thlahpa zaozi a chaba teh u. Thlahpa zaozi cha Khazohpa bie a châ.

¹⁸ Thlahchhâna nata hiana to ta khatino rai ta Thlahpa ta thlahchhâ teh u. Cha châna chata a hrohrua u la, mopathaihpa zydua châta bâh leipa ta thlahchhâ teh u.

¹⁹ Pakah âpa ta thâtihpha bienyupa riahpha ngaitapa ta phuah awpa ta, bie rei awpazy piepa ei châ thei nawpa ta, kei châta na hiapa hra teh u.

²⁰ Thâtihpha ei rei awpa cha riahphapa ta ei rei thei nawpa ta, lyuhchâpa bâlia a kypa ei châ.

Anaohna nata byhnâ awna

²¹ Unawh kyhpachâpa nata Abeipa chakaotuhpa ngâchhihpa Tykiku ta hmo to cha chho aw ei ta, kheihta y na ta, khâpa ma ei tao hai tahpazy nama vaw pahno aw.

²² Eima duahmo vaw pahnopa ta, nama palôh tha a cha patlô thei nawpa ei ta, Tykiku cha nâmo lâ ei vaw tuah.

²³ Paw Khazohpa nata Abeipa Zisu Krista tawhta thlalôhna nata ngiapâna a hlaopa kyhpachâna cha, unawhzy hnohta y mawh sy.

²⁴ Kyhpachâna dia beih leipa ta eima Beipa Zisu Krista kyh pachâtuhpa zydua hnohta ngiachhiena y mawh sy.