EPHESI 4 - Mara Bible RV (BSI)

Krista pôhpa liata apôhkhana

¹ Chavâta a cha awna ei nata â phuhpa ta y awpa ta, kei Abeipa châta atâhpa heta ei châ haw ei.

² Tlokhuh apanawhna, areisina nata daotheina zy hneipa ta, kyhpachâna ta a chhyh thai raihrie u la,

³ Thlahpa apôhkhana a y lymâ thei nawpa ta, adyhna ta a chahrypa ta tei lymâ teh u.

⁴ Pôhpa miakha nata Thlahpa pakha dei y ta, cha hawhna chata, awpa nama châ nona kha, hnabeiseihna miakha hnei awpa ta awpa nama châ.

⁵ Abeipa pakha, ngiapâna miakha, bâtina miakha nata

⁶ Khazohpa pakha deita a y. Ano cha ato Paw châ ta, ato chô liata y ta, ato chahryh khai ta, ato chhôh liata a y.

⁷ Châhrasala Krista ta hmosaipiepa a rainazie lymâ hawhta, ngiachhiena cha a saipa ta pie chyupa eima châ.

⁸ Chavâta, “Chô lâ a khy nota, Seichâna cha sei ta a chhi ta, Chyhsazy hnohta Hmosaipiepazy a pie ei,” tahpa a châ.

⁹ “A kkhy,” tahpa heta, alei su a hnaipa lâ a za chô tuana a palâsapa châ vei ma?

¹⁰ A zâ chôpa tlai kha, avâ zydua chô lâ a khypa cha châ ta, lei nata vâ cha ano ta a bie khai haw.

¹¹ Chatanachata thokha lyuhchâpa châ awpa ta, thokha hrohsopa châ awpa ta, thokha biechhotuhpa châ awpa ta, thokha mietaku vaituhpa châ awpa nata thokha pachutuhpa châ awpa ta Krista ta a rao ei.

¹² Chazy cha chakaona rai hria awpa ta mopathaihpazy pachhuahpanoh ta, Krista pôhpa pipatlohsa nawpa ta piepa a châ.

¹³ Eima zydua ta ngiapâna nata Khazohpa Sawchapawpa pahnona liata pôhkha châpa ta, pitlohna hro hneipa ta, Krista pakina tlu ta pakipa ta eima y thei nawpa ta piepa a châ.

¹⁴ Chatanachata chyhsa so piehpiena nata dôthaina hmotaopa tichatlaopazy ta hao lâ he lâ a chatlaopa nata pachuna ziza to ta a phao pahaipa hawtipa châ khao aw ma pi.

¹⁵ Kyhpachâna ta biedopa reipa ta, kyh to liata ano liata eima laiseih lymâ aw. Ano cha luh châ ta, cha cha Krista a châ.

¹⁶ Ano liana chata pôhpa pachiahpa to a pazaopakhypa ta, pachiahpa to ta ama raihria chyu a phapa ta ama hria nahta, pôhpa cha kyhpachâna liata a laiseih tyh.

Khaihpa sawzy hro

¹⁷ He he Abeipa liata reih na ta, ei cha chho ei: Pachâna hraoleipa a hneipa Zenitaizy hawhta nama y khao awpa châ vei.

¹⁸ Ama palôh kuhchhapa vâta pahno leina âmo liata y ta, cha chata ama pahnona pazohsa ta, Khazohpa hrona tawhta pachhaihpa ta ama y.

¹⁹ Nozana châh chhao pahno khao leipa ei ta, parâna liata âmosasyh a hlâ ei ta, karây ngaitapa ta hmo puapa to ama tao.

²⁰ Nâmo deikua cha, cha hawhta Krista cha a chu veih ei chi!

²¹ A thâtih thei ei chi ta, Zisu liata biehmeiseihpa a ypa hawhta, ano liata pachupa nama châ.

²² Eikhano ta nama hrozie ta a hrohpa, dôveina piehpie aohraohna ta a parao tyhpa, nama chyhsa parohpa kha pahluh u la,

²³ nama palôh pachânazy pathiehpa ta,

²⁴ siana nata pathaihna hmeiseihpa liata Khazohpa lyupa ta taopa chyhsa thiehpa ta a tobi teh u.

²⁵ Chavâta haipa bâhsai u la, nama vaih hnohta biedopa reih chyu teh u. Pôhpa miakha tawhta a pachiahpa sai eima châ.

²⁶ Nama hiehâh sala, molei deikua molei khuh vy. Nama hiehâhna cha noh ta tlakhei leipa sala,

²⁷ ahripa châta su paruapa khuh vy.

²⁸ A paru tyhpa ta paru khao leipa sala, phahlapazy pie awpa a hnei thei nawpa ta, ano ku ta hmo phapa hria sala, hriapasa mawh sy.

²⁹ Bie pha leipa rai nama pakah tawhta pua khah sy. Chyhsa taopathi nawpa bie deita, a daihti nata su a hmiepa ta, nama pakah tawhta pua mawh sy. Chatanachata a theituhpazy châta ngiachhiena ama tona a châ aw.

³⁰ Khazohpa Thlahpa Pathaihpa pachâ parôh khuh vy, chatlaina noh châta ano ta ngiapa nama châ.

³¹ Ruchhôna, pathiiana, hiehâhna, paphôhna nata reipachhiena zydua nâmo tawhta thy khai teh u.

³² A ngiachhie raihriepa ta, tha a pasa raihrie u la, Khazohpa ta Krista liata a châ ngiahthaipa hawh ei ta, a ngiahthai raihrie teh u.