EPHESI 3 - Mara Bible RV (BSI)

Thâtihpha bienyupa

¹ Cha vâna chata kei, Pawla, nâmo Zenitaizy châta Krista Zisu vâta atâhpa heta ei cha chho ei.

² Khazohpa ta nâmo châta ngiachhie chakaona raihria eina piepa kyh nama vaw pahno ha aw.

³ Aluahna ta bienyupa pahnosapa ei châpa kyh a chyuta ei vaw roh ha khawh.

⁴ Kha châpaphaopa kha nama reih khiahta cha, Krista bienyupa ei pahnozie nama pahno thei aw.

⁵ Cha thâtihpha bienyupa cha, tahmâ nota a lyuhchâpa pathaihpazy nata a hrohsopa pathaihpazy hnohta Thlahpa ta a pahnosapa hawhna heta, kha hlâta chyhsa sawzy hnohta pahnosapa châ beih vei.

⁶ Bienyupa cha he he a châ: Thâtihpha vâta Zenitaizy cha, Krista Zisu liata Izarei sawzy nata ryuto lâhpazy châ ei ta, pôhpa miakha pachiahpa a châ khohpazy nata bietai a hlypazy ama châ.

⁷ Khazohpa ngiachhiena hmosaipiepa vâta, cha thâtihpha chakaotuhpa ta taopa châ na ta, cha chakaona rai cha a hmotaotheina hmâpa ta ei hnohta eina pie.

⁸ Mopathaihpa chyh chaipa hlâta chyh viapa châ hraw sah la, pahno khai thei leipa Krista hneirôna cha, Zenitaizy hnohta chho awpa ta, cha ngiachhiena cha piepa ei châ.

⁹ Khazohpa ato taotuhpa hnohta nyu kôzawpa bienyupa achhuahna cha palâsa awpa ta, cha ngiachhiena cha piepa ei châ hra.

¹⁰ Chatanachata Khazohpa sona hnei hluhzie cha, avâ suzy liata ryureihtuhpazy nata biehneituhpazy hnohta, Awnanopa hmâpa ta pahnosapa ta a y thei aw.

¹¹ Cha cha Khazohpa chhâzaw hmochhuahpa châ ta, eima Beipa Krista Zisu liata a vaw patlôsa.

¹² Krista eimâ ngiapâpa vâta, riahphapa nata ngâhna chôta Khazohpa eima hnia thei haw.

¹³ Chavâta nama châta pasa ei taopa vâta hnabeidy lei awpa ta ei châ haw ei. Nama rônah nawpa ta pasa ei taopa a châ.

Ephesi mo châta thlahchhâna

¹⁴ Cha vâna chata Paw hmiakô liata pakhu paneihpa ta ei bôh tyh.

¹⁵ Ano cha lei nah vâ liata chhôhkha to moh bi hnâpa a châ.

¹⁶ A rônahna hneirôh ngaitazie hawhta, Khazohpa ta a Thlahpa zawhzi ta nama chhôh lâ hro tha a cha patlô thei nawpa ei ta, thlah ei cha chhâpa ei.

¹⁷ Chatanachata Krista cha ngiapâna vâta nama palôhzy liata pahrâ aw ta, a kyhpachâna liata thari thlapa nata abôna hneipa ta y thei aw ei chi ta,

¹⁸ mopathaihpa zydua chhaota Khazohpa kyhpachâna kawhzie, seihzie, asâhzie nata athuzie zy nama pahno thei aw.

¹⁹ Novâhna hlâta a sâh viapa Krista kyhpachâna pahno aw ei chi ta, Khazohpa pakina ta pabiepa nama châ aw.

²⁰ Tahmâ keimo liata a hria tyhpa hmotaotheina lymâ hawhta, eima hiapa nata pachâpa zydua hlâta tha via syulyu ta a tao theituhpa Khazohpa hnohta,

²¹ Awnanopa liata nata Krista Zisu liata rônahna cha, chhâ zydua hnohta chhâzaw nata tlyzaw ta y mawh sy. Amen.