EPHESI 2 - Mara Bible RV (BSI)

Ngiapâna vâta ngiachhiena

¹ Nâmo chhao paraona nata moleinazy vâta athipa nama châ.

² He khizaw ryhpa hawhta y ei chi ta, avâ ruapa liata ryureituhpa bei, reingiah leipazy chô liata tahmâ chhao a hria haipa thlahpa cha pazipa ta, paraona nata moleinazy liata nama vaw tlaih tyh.

³ Keimo chhao eikhano cha, reingiah leipazy hry liata eima vaw y hra. Eima sapa aohraohnazy papitlohsapa ta, sapa nata palôh khopazy vaw tao tyh pi ta, chyhsa hropazy hawhta hiehâhna saw ta a vaw pihpa eima châ.

⁴ Châhrasala ngiachhiena a hnei hluhpa Khazohpa ta kyhpachâna rônahpa ta kyh miah pachâ ta,

⁵ eima paraonazy vâta athipa eima châ no tlai chhao ta, Krista hnohta miah a pahro haw. Ngiachhiena ta pachhapa nama châ.

⁶ Krista Zisu hnohta miah pathyu ta, avâ suzy liata ano hnohta miah a patyusa haw.

⁷ Chatanachata daihti vaw tlô awpazy liata, Krista liana chata Khazohpa ta eima chô liata a phana palâsa aw ta, panua tiah leipa a ngiachhiena hluhpi eima chô lia a palâsa aw.

⁸ Ngiachhiena vâta ngiapâna ta pachhapa nama châ. Cha chhao cha nâmo tawhta a puapa châ leipa ta, Khazohpa hmosaipiepa a châ.

⁹ Hmotaopa vâta châ vei, chataleipatala chyhsa ta â palaikhei pathlei aw na.

¹⁰ Hmo pha tao awpa ta, Khazohpa ta Krista Zisu liata miah a tao. Cha hmo pha tao awpa cha, eima chânazie awpa ta Khazohpa ta â vaw chhuanoh chhieliepa a châ.

Krista liata apôhkhana

¹¹ Chavâta he he a thei thlâh ha teh u. Hlâno ta cha, nâmo, sapa liata Zenitaizy cha chopawtaipazy ta, “Chopawtaileipa” ama cha tah tyh. Chopawtaipa cha pôhpa liata ku ta taopa a châ.

¹² Kha nona kha, Krista a hlao leipa ta y ei chi ta, Izarei râh nata a maniahpa ta, bietai biehraizy liata khichhaipa châpa ta, hnabeiseihna hnei leipa nata Khazohpa hnei leipa ta khizaw liata nama y.

¹³ Tahmâ Krista Zisu liata deikua cha, nâmo, eikhano ta lâhlapi ta a y tyhpazy kha, Krista thisaih ta pahniasapa ta nama y haw.

¹⁴ Ano cha eimâ ryhna châ ta, py nozy cha pôhkha ta miah taopa ta, akhakhaina nata apachhaihna pâhchhô cha a sapa ta parao ta,

¹⁵ ryhpa biepiepa nata bieraopazy pahlei ta, panozy cha ano liata chyhsa thiehpa pôhkha pachâsapa ta, aryhna a tao haw.

¹⁶ Kraws zawhzi ta panozy cha pôhpa miakha châpa ta, Khazohpa nata miah paryhsa ta, chatanachata akhakhaina cha a thie haw.

¹⁷ Krista â vy nona khata, nâmo, lâhlapi ta a ypazy hnohta aryhna bie cha chho ei ta, lâhnia liata a ypazy hnohta chhao a cha chho hra ei.

¹⁸ Ano siepahliepa ta Thlahpa miakha ta Paw a hnia theina eima py no ta eima hnei.

¹⁹ Chavâta tahmâ la khichhaipa nata khitlyhpa dei châ khao veih ei chi. Mopathaihpazy nata hmaohkha ta khinarâh sawzy châ ha ei chi ta, Khazohpa chhôhkhazy tlao nama châ haw.

²⁰ Krista Zisu cha a ki liata alô peimawh chaipa châ ta, lyuhchâpazy nata hrohsopazy lôbôpa chô liata sapa nama châ.

²¹ Ano liana chata o sana lôzy paryhpa châ ta, Abeipa liata Achhyna o pathaihpa a vaw châ tyh.

²² Ano liana chata nâmo chhao Khazohpa pahrâ nawpa ta paryh pakhypa châ ei chi ta, cha liata Khazohpa cha Thlahpa ta a pahrâ.