DÂNIAH 9 - Mara Bible RV (BSI)

Izarei châta Dâniah thlahchhâna

¹ Ahasuarâ sawchapawpa Dâria, Media chipathla, Kaldia mo râh chô liata abei ta taopa, a kô khana liata,

² a ryureina kô khana liata, kei, Dâniah heta, Zerusale cha kô sysari chhôh roryhrapa ta a y awpazie, hrohsopa Zeremiah hnohta Abeipa bie a vaw tlôpa cha châbuzy tawhta vaw pahno na ta.

³ Chavâta Zehôvâh Khazohpa lâ a heih na ta, kâhvileipa ta, latho poh a bupa ta buchâhzy a miapa ta, thlahchhâna nata hiana zy ta ano cha tlua na ta.

⁴ Abeipa ei Khazohpa lâ thlahchhâ na ta, a phuah na ta, a hnohta, “Hy Abeipa, Khazoh rônahpa nata noâhchhihpa, ano kyhpachâ ta, a biepiepazy a zyhtuhpa hnohta a bietai patlôsa ta phana a palâsa tyhpa y,

⁵ molei ha pi ta, hmoparao ha pi ta, molei ngaitapa ta hroh pi ta, châ dyuh pi ta, na biepiepazy nata bieraopazy eima vaw tleisai haw.

⁶ Eima beizy, eima hyutuhpazy, miah pathlatuhzy nata râh liata chyhsa zydua hnohta na moh ta bie a reihpa, châ chakaotuhpa hrohsopazy bie nathlie hra ma pi.

⁷ Hy Abeipa, siana cha nâma eih châ ta, keimo tovyuh deikua cha nozana deita a châ, tanoh ta hmo a ypa hawhna tlai heta. Zudâh chyhsazy, Zerusale liata a pahrâpazy, Izarei zydua nata sei ta nâ chhina râh zydua liata lâhnia nata lâhla liata a ypazy ta haiphiahpa ta na chô liata hmo ama taopa vâta, tanoh nozapa ta eima y ha hih.

⁸ Hy Abeipa, na chô liata eima molei hapa vâta, keimo nata eima beizy, eima hyutuhpazy nata miah pathlatuhzy tovyuh cha nozana dei a châ bâ he zaw!

⁹ Zawngiahna nata ngiahthaina cha Abeipa eima Khazohpa eih mâh a châ tâh; ano cha a chariah ha hra sih la,

¹⁰ a ryhpa eimâ chhih thei nawpa ta, ano a chakaotuhpa hrohsopazy hmâpa ta a bie reipa Abeipa eima Khazohpa ao nathlie vei hra sih la.

¹¹ Izarei zydua ta na ryhpa parao ei ta, tleisai ei ta, na ao nathlie khoh veih ei. Chavâta châ chakaotuhpa Mawsi Ryhpa liata chhiesana nata bietai zy kha eima chô liata patlai thlupa ta eima y ha hih. Abeipa chô liata na eima vaw molei haw tlai.

¹² Chavâta chhiena ru ngaitapa eima chô liata patlôsapa ta, keimo chô liata nata miah a pachiatuhpa eima ryureituhpazy chô liata a bie reipazy a paki lymâ. Zerusale chô liata a taopa hawhpa he avâ ry zydua liata taopa ta y beih vei.

¹³ Mawsi Ryhpa liata ropa hawhta, he chhiena zydua he eima chô liata vaw tlô ta, châhrasala eima moleinazy a heihsai ta, na bie hmeiseihpa pahno awpa ta, Abeipa eima Khazohpa khokheina tlua hlei ma pi.

¹⁴ Chavâta Abeipa ta chhiena cha a mâ chiehpa ta soh thlâh ha ta, eima chô liata a vaw patlôsa hapa a châ. Abeipa eima Khazohpa cha asiapa châ ta, a hmotaopa zydua liata chhao sia ta, chatana chôta a bie zyh ma pi.

¹⁵ Hy Abeipa eima Khazohpa, ku thatlôpa ta na chyhsazy Izi râh tawhta a chhi papuatuhpa nata nâma sasyh ta tanoh taihta na moh â parônahsa lymâpa y, molei ha pi ta, hmo thata eima vaw parao haw.

¹⁶ Hy Abeipa, ei châ haw na, siana ta na hmotaozie zydua hawhta, na hiehâhna nata na pathiiana cha Zerusale, na tlâh pathaihpa tawhna heta rie pakuasa ha mah y. Keimo moleinazy nata miah pathlatuhzy paraona vâta, Zerusale nata na chyhsazy he eima chheipâh chyhsazy ta ama rei tyh awpa eima vaw châ ha hih.

¹⁷ Chavâta Hy eima Khazohpa y, tahmâ châ chakaotuhpa thlahchhâna nata hianazy he nathlie la, Hy Abeipa y, nâma moh vâ tlai ta, roryhrapa ta a y hapa na supathaihpa chô liata na hmia pakhaihsa mah y.

¹⁸ Hy ei Khazohpa, na nah pachôh la, nathlie tua; na mo padeih la, keimo nata na moh a phaohpa na khihpi roryhra hapa he moh tua. Eima hiapazy he eima siana vâta na hmiakô liata a vaw tlôkheipa châ leipa pi ta, na zawngiahna rônah ngaitapa vâta tlao a châ.

¹⁹ Hy Abeipa, thei la, Hy Abeipa, a ngiahthai mah y. Hy Abeipa, nathlie la, hria mah y. Na moh vâta, na khihpi nata na moh a phaohpa na phopi vâta, Hy ei Khazohpa, hawh khah y,” tah na ta.

Dâniah thlahchhâna chyh-eina

²⁰ Keima moleina nata ei phopi Izarei sawzy moleina palâhâhpa ta, reihpha cheipa ta thlahchhâ na ta, Abeipa ei Khazohpa hmiakô liata ei Khazohpa tlâh pathaihpa châta hiana ei tlôkhei ngâ nota,

²¹ thlahchhâna bie ei rei hai no tlai ta, aluahna hmiatuapa liata ei hmôpa chyhsa, Kabriel kha ta, zâlâ atheihna hlâ daihti liata a chatliepa ta kei lâ a zâ zaw ta.

²² Hmo yzie na pahnosa ta, bie na chho ta, ei hnohta, “Hy Dâniah, pahnona nata novâhna cha pie awpa ta tahmâ ei vy.

²³ Thlahchhâ nâ thaopa nah kha ta, bie pua ha ta, cha kyh cha cha chho awpa ta ei vy, pasâhsa a chhih ngaitapa na châpa vâta. Chavâta bie he pachâ la, aluahna cha pahno mah y.

Dâniah Hâta

²⁴ “Hmoparaona paki awpa ta, moleina pachhâsa awpa ta, taopasina chatlai awpa ta, tlyzaw siana tlôkhei awpa ta, aluahna nata hrohsona paki awpa nata su pathaih chaipa sathaw thu awpa ta, na chyhsazy nata na khihpi pathaihpa châta hâta sysari raopa a châ.

²⁵ Chavâta he he pahno la, na novâh mawh sy. Zerusale padua pathi awpa nata sa pathi awpa ta bie a pua tawhta Mesia Bei â vyna taihta hâta ei sari a châ aw. Hâta ei sycharu nata ei no chhôh tlyliah nata khaohtlôzy taopathipa châ aw ta, châhrasala he chhôh he daihti rairuna a châ aw.

²⁶ Hâta ei sycharu nata ei no khai tawhta Mesia cha chhawh pathlahpa châ aw ta, khâpa hmah hnei khao aw vei. Abei a vy awpa chyhsazy ta khihpi nata su pathaihpa cha ama parao aw. A chhâ nawpa cha tisaih chhao ta vaw tlô aw ta, a chhâna taihta adyuhna a y aw. Roryhranazy cha vaw tlô awpa ta rao chhielie hapa a châ.

²⁷ Abei ta hâta ei kha chhôh chyhsa hluhpi hnohta biehrai a ipa tao aw ta, hâta khophie chhôh atheihna nata hmohlâpazy a pachhâsa aw. Chatawhcha roryhrana patlôsatuhpa chô liata chhâna daihti rao chhielie hapa patlai thlupa a châ hlâlei cha, roryhrana patlôsatuhpa cha pasichhihpa mathlaw chô liata a chohpa ta â vy aw,” tah ta.