DÂNIAH 8 - Mara Bible RV (BSI)

Dâniah aluahna einona Mietaku Tôhpa nata Mie Tôhpa

¹ Bei Belsâza ryureina kô thôhna liata, ei hnohta, kei Dâniah hnoh tlai heta, aluahna a vaw lâ heih ta; he he ei hnohta aluahna a vaw lâ tuapa khai tawhna khata a vaw lâ heihpa a châ.

² Aluahna liata hmô na ta; hetana heta vaw châ ta, aluahna ei hmô nona cha kei cha Elâmi râh liata Susâ thokhy khihpi liata vaw y thlâh ha na ta. Aluahna liata hmô na ta, Ulai chavah kiah liata vaw y na ta.

³ Ei mo kaw ua na ta, moh teh u, mietaku tôhpa pô kha chavah kiah liata â duah thlâh hapa hmô na ta. Ki miano hnei ta, cha ki mianopazy cha seih kaw ei ta, châhrasala ki khapa cha ki hropa hlâta seih via ta, ki seih viapa he a thao hawh viapa tlao a châ.

⁴ Mietaku tôhpa chata notla lâ zy, maw lâ zy, chho lâ zy a tôh laihpa hmô na ta, a hmiakô liata a duah theipa sa rai y leipa ei ta, a ku tawhtapa a pachha theipa y hra veih ei. A khozie hawhta tao ta, a rônah via lymâ.

⁵ He kyh he ei pachâ hai nota, moh teh u, notla lâ tawhta mie tôhpa pô kha kaw pua ta, alei rai tly leipa ta alei chô zydua chahryh ta. Cha mie cha a mozy likawh liata ki a lâluah ngaitapa hnei ta.

⁶ Mie chata mietaku tôhpa, ki miano a hneipa, chavah kiah liata â duah thlâh hapa ei hmôpa kha vaw pangai ta, thata a hrâhpa ta vâ râhnao ta.

⁷ Mie tôhpa ta mietaku tôhpa cha â kei hniapa hmô na ta, a chô liata a hiehâh ngaita ta, chatanachata mietaku tôhpa cha kei daih ta, a ki mianopazy cha thliepa ha ta. A hmiakô liata a duah thei awpa ta mietaku tôhpa ta thatlôna rai hnei vei. Chavâta alei liata papao ta, tlypâ ta, mie tôhpa hmotaotheina tawhtapa cha mietaku tôhpa a pachha theipa y veih ei.

⁸ Mie tôhpa cha thata vaw lai ta, châhrasala a thatlô lichih ta, a ki laipa cha thliepa châ ta, a su liata ki a lâluah kawpa ki palih, avâ thlih miapalihpazy lâ a heipa ta kaw thao ei ta.

⁹ Ki palih hry liata ki kha tawhta ki chyhpata vaw pachiah ta, chho lâ, nochhi lâ nata Râh Ngiapa lâzy a heipa ta thata kaw seih ta.

¹⁰ Avâ liata a ypazy tlôna taihta seih ta, avâ liata a ypa thokha nata awhsi thokhazy cha alei lâ za thy ta, âmo cha tlypâ ta.

¹¹ Anosasyh ta a kaw parônahsapa ta, avâ Bei tlu ta a parônahsa ta, avâ Bei hnohta raopa hlâna hlâ tyhpazy pachhâsapa châ ta, a supathaihpa yna su chhao paraopa a châ.

¹² Mopathaihpa sahlao nata raopa hlâna khâ hlâ tyhpazy cha, paraona a ypa vâta ano hnohta piepa châ ta, biedopa alei lâ za pazaw ta, a hmotaopa maih liata a hlao a tloh lymâ.

¹³ Chatawhcha mopathaihpa pakha bie reipa thei na ta, mopathaihpa hropa ta bie a reihpa mopathaihpa hnohna chata, “Raopa hlâna hlâ tyhpa kyh, roryhrana patlôsatuhpa paraona kyh nata phei ry liata tlypâ awpa ta su pathaihpa nata sahlaozy hlâpa ta ama yna kyh aluahnazy he khati taih ma a châ aw?” tah ta.

¹⁴ Ano ta ei hnohta, “My nata zâlâ ei 2,300 taih a châ aw. Cha khai tawhta su pathaihpa cha a châ nawpa duahmo liata paduapathipa a châ aw,” tah ta.

Aluahna chhopasiana

¹⁵ Kei, Dâniah ta aluahna cha hmô na ta, a yzie pahno a chhuah na ta. Moh teh u, ei hmiakô liata chyhsapa a lyupa pakha a vaw duah ta.

¹⁶ Ulai chavah haosâ nata heisâ likawh tawhta chyhsapa ao thei na ta, ano chata, “Kabriel y, he chyhsa he aluahna yzie pahnosa teh,” tah ta.

¹⁷ Chatanachata Kabriel cha ei duana kiapâh lâ a vy ta. Â vy nahta, chi ngaita na ta, ei hmia alei lâ a khupa ta pao na ta. Ano ta ei hnohta, “Hy chyhsa sawchapawpa y, aluahna he daihti chhâna kyh a châ tahpa pahno mah y,” tah ta.

¹⁸ Ei hnohta bie a rei hai no tlai chata, ei hmia alei lâ a khupa ta mokuh pahâh ngaitapa ta a vaw mô ha na ta. Châhrasala na vaw hria ta, na padua ta.

¹⁹ Ei hnohta, “Moh teh, hiehâhna hnôh lâta hmo a vaw tlô awpa ei cha pahnosa aw, aluahna he chhâna daihti raopa kyh a châ.

²⁰ Mietaku tôhpa ki miano a hneipa na hmôpa kha Media nata Persia beizy ama châ.

²¹ Mie tôhpa hmi rôhpa kha Krikâh bei châ ta, a mozy likawh liata ki laipa kha abei tua chaipa a châ.

²² Ki a tlie hapa nata a su liata ki palih a kaw thaopazy kha, a râh tawhta khinarâh miapalih a vaw duah awpazy pamosa ta, ano hawhta hmotaotheipa deikua châ aw veih ei.

²³ Amâ beinarâh chhâna lâ liata, hmoparaopazy paraona kih a tlô tita, abei hmia chichhih ngaitapa, bie khiakhipazy yzie a pahnopa a vaw pua aw.

²⁴ A thatlô ngaita aw ta, châhrasala ano thatlôna vâta châ aw vei. Raona chichhihpa patlôsa aw ta, a hmotaopa maih liata a hlao a tloh aw. Chyhsa thatlôpazy nata chyhsa pathaihpazy a pahleipadia aw.

²⁵ A piehpiena ta a ku ry liata dôveina palaiseihsa aw ta, a palôh liata anosasyh ta a chaipa ta a pachâ aw ta, chyhsa hluhpi a bohpa ta amâ pachâ nota âmo cha pahleipadia aw ta, beizy Beipa chhao â dyuh aw. Châhrasala ano cha pahleipadiapa a châ aw, chyhsapa ku ta deikua châ aw vei.

²⁶ Zâlâ nata my aluahna reipazy kha â do. Châhrasala aluahna kha chhiehruh ha teh, noh hluhpi tawhta a vaw y awpa kyh a châ,” tah ta.

²⁷ Kei, Dâniah cha thachhâpa ta y na ta, noh khazie tlyma pasapa ta a zia na ta. Chatawhcha thyu na ta, abei rai cha hria heih na ta, châhrasala aluahna ta ei thlah thata na pazo ta, a yzie rai pahno leipa na ta.