DÂNIAH 7 - Mara Bible RV (BSI)

Dâniah aluahna eikhana Sahrâhpa pô palih

¹ Babylaw bei Belsâza abeina kô khana liata, Dâniah cha a rakhô liata â zia thlâh ha nota, mâsapa nata a luh liata aluahnazy hmô ta. Chatanachata a mâsapa cha roh ta, a hmo hmôpazy cha reih ta.

² Dâniah ta hetana heta phuah ta, “Zâ ta aluahna liata hmôpa hnei na ta, moh teh u, avâ thlih miapalihpazy ta tilaipi rônahpa cha thata vaw chatlao ei ta.

³ Tilaipi tawhta sahrâhpa laipa pô palih kaw pua ei ta, anano khai ei ta.

⁴ A miakhana cha chakeibarôhneipa lyu ta, pahmôhpi mathlaw a hnei. Ei mo thlâh ha nota a mathlawzy cha phiapa châ ta, alei tawhta chalopa ta y ta, chyhsapa hawhta a phei miano ta paduasapa châ ta, chyhsapa pathipalôh piepa a châ.

⁵ Sahrâhpa mianona cha chavyh lyu ta. Kârakha ta a duah ta, a pakah chhôh a hâhzy likawh liata kâru miathôh y ta, a hnohta, ‘Thyu la, sa thata nie teh,’ tahpa ta chhopa a châ.

⁶ He khai tawhta moh na ta, sahrâhpa hropa cha keihchhoh lyu ta, a ky liata pavaw mathlaw miapalih hnei ta. Cha sahrâhpa cha luh miapalih hnei ta, a hnohta ryureina piepa a châ.

⁷ He khai tawhta, zâ ta aluahna liana chata, sahrâhpa miapalihna, rarôh y ngaitapa, chichhih ngaitapa nata thatlô ngaitapa hmô na ta. Thua hâh lai ngaitapazy hnei ta, a baw ta bawh ta, a tlawh ta hriechheih ta, a laibâhpazy cha a phei ta a tlybai lymâ. Sahrâhpa hmiatuapa zydua nah khata anano ta, ki hrawh a hnei.

⁸ Kizy thâtih ei pachâ hai nota, ama hry tawhta ki hropa miakha, ki chyhpata kaw thao ta, ki hmiatuapa miathôhpazy kha ama tharizy chhaota a hmiakô liata thlopa ta y ei ta. Cha ki cha chyhsapa mozy hawhta mozy hnei ta, a palai ngaitapa ta bie a reihpa pakah a hnei.”

Hlôthlâhpa ta ryu a reih

⁹ “Ei moh thlâh ha nota, Beidyuchhaizy vaw patyu ei ta, Hlôthlâhpa cha a dyuchhai liata a vaw tyuh ta; A chysia dâhaw hawhta ngyuh ta, A luh sâ chhao sahmi naipa hawhta a châ. A beidyuchhai cha meipaleih châ ta, A tiakizy chhao mei kâ ngâpa a châ.

¹⁰ Mei chavah vaw loh ta, A hmiakô tawhta a vaw pua; A sâh a sâh ta ano cha chakao ei ta, A thy a thy ta a hmiakô liata amâ duah; Pachiana y ta, Châbuzy pahypa a châ.

¹¹ “Ki ta a palaina biezy thata a reipa vâta kaw moh na ta, ei mo ngâ no tlai ta, sahrâhpa cha thiepa châ ta, a pôhpa paraopa châ ta, mei ta rao awpa ta piepa a châ.

¹² Sahrâhpa hropazy chhao, ama ryureina chhupa châ ta, ama hrona deikua daihti raopa chhôh châta pahlôh chypa a châ.”

Chyhsa Sawchapawpa hnohta ryureina piepa a châ

¹³ “Zâ ta aluahna liata hmô na ta, Moh teh u, avâ meihdo hry liata, Chyhsa sawchapaw a lyupa a vy ta; Hlôthlâhpa hnohta a vy ta, A hmiakô liata amâ vaw chhi.

¹⁴ Phopi to, râh to, reih to ta ano cha ama chakao thei nawpa ta, A hnohta ryureina piepa châ ta, Rônahna nata khinarâh chhao piepa a châ. A ryureina cha chhâzaw ryureina châ ta, Tleih beih aw vei; A khinarâh chhao parao theipa châ aw vei.”

Aluahna chhopasiana

¹⁵ “Kei, Dâniah cha ei pôhpa chhôh liata ei thlahpa a pachârôh ngaita ta, ei luh liata aluahnazy ta na patypamâ kaw ta.

¹⁶ Cha liata a duahpazy hry liata pakha a kei hnia na ta, aluahna zydua yzie dopa kyh hiahri na ta. Ano ta, cha hmozy chhopasiana cha na chho ta, eina pahnosa.

¹⁷ ‘Sahrâhpa rarôh ypa pô palihpazy kha, alei tawhta bei papalih a vaw pua awpazy ama châ.

¹⁸ Châhrasala Chônôchaipa mopathaihpazy ta khinarâh cha chhâzaw ta to aw ei ta, chhâzaw nata tlyzaw ta ama hnei aw.’

¹⁹ “Chatawhcha sahrâhpa pô palihna, ahropa zydua hlâta â nano viapa nata chichhih ngaitapa, a hâhzy thua châ ta, a patozy dawh châ ta, a baw ta bawh ta, a tlawh ta hriechheih khai ta, a laibâhpazy a phei ta a tlybaipa kyh chhao kha â dopa ta pahno khoh kaw na ta.

²⁰ A luh liata ki miahrawhpazy kyh nata, ki hropa kaw thao ta, a hmiakô liata ki thôhpazy ama tlo hapa kyh zy, mo a hneipa ki nata a palaina bie a reihpa pakah kyh nata ki hropazy hlâta lai viapa ta â lâpa ki kyh chhao kha pahno khoh kaw na ta.

²¹ Ei mo thlâh ha nota, cha ki chata mopathaihpazy a dyuh ta, âmo cha pahnie ha ta;

²² Hlôthlâhpa a vypa ta, Chônôchaipa mopathaihpazy chhâh a châhpa ta pachiana bie phuahpa ta, mopathaihpazy ta khinarâh ama hnei hlâlei cha, âmo cha a pahnie lymâ.

²³ “Sahrâhpa pô palihna kyh liata hetana heta a tah: ‘Alei chô liata khinarâh miapalihna vaw y aw ta, Khinarâh hropa zydua nata â nano aw; Alei pôhpalôhpa palâ khai aw ta, Tlybai aw ta a pakeichheih khai aw.

²⁴ “‘Ki hrawhpazy kyh liata hetana heta a tah: He khinarâh tawhta bei hrawh vaw pua aw ei ta, Âmo hnôh lâta bei hropa a vaw pua aw; Bei tuapazy nata a nano aw ta, Bei pathôhpazy cha a panawh aw ei.

²⁵ Chônôchaipa chakhiana biezy reih aw ta, Chônôchaipa mopathaihpazy cha ama rie a pathei aw; Daihtizy nata ryhpazy panano a chhuah aw ta, Daihti miakha, daihtizy nata daihti khophie chhôh cha, A ku liata mopathaihpazy piepa a châ aw.

²⁶ Châhrasala pachiana y aw ta, A ryureina chhupa a châ aw; Pamua khaipa châ aw ta, Parao khaipa a châ aw.

²⁷ Chatawhcha khinarâh nata ryureina cha, Chônôchaipa phopi mopathaihpazy hnohta piepa châ aw ta; Avâ ry zydua liata khinarâhzy rônahna chhao, Ama hnohta piepa a châ aw. A khinarâh cha tlyzaw khinarâh a châ aw; Ryureituhpa zydua ta ano cha chakao aw ei ta, A rei amâ ngiah aw.’”

²⁸ “Kha kha hmo chhâna cha a châ. Kei, Dâniah cha, ei pachâpazy chata thata na patypamâ ta, ei hmia hlâh khai ha ta, châhrasala cha hmo cha ei palôh liata a vao thlâh ha na ta.”