DÂNIAH 5 - Mara Bible RV (BSI)

Bei Belsâza nata Babylaw paona

¹ Bei Belsâza ta a beimachâ sâh khazy châta kyhchhi rônahpa tao ta, chyhsa sâh kha hmiakô liana cha kresawhti doh ta.

² Belsâza ta kresawhti cha doh ta, ano nata a beimachâzy, a lapinôzy nata a nôthozy kresawhti do nawpa ta, a paw Nebukaneza ta Zerusale Achhyna o tawhta a lapa ngôh nata tâkâ nyuzy vaw chei awpa ta biepie ta.

³ Chatanachata Achhyna o, Zerusale liata Khazohpa o tawhta ama lapa ngôh nyuzy cha vaw cheih ei ta, cha nyuzy cha hmâpa ta abei nata a beimachâzy, a lapinôzy nata a nôthozy ta kresawhti cha doh ei ta.

⁴ Kresawhti cha doh ei ta, ngôh, tâkâ, dawh, thua, tho nata alô khazohzy reithai ei ta.

⁵ Cha nona tlai chata chyhsapa kuparozy a vaw luah ta, meiôh sona dady liata abei o pâhchhô pamihpa liata châ vaw roh ta. Abei ta châ a roh ngâpa ku cha hmô ta.

⁶ Abei cha a hmia vaw hlâh khai ha ta, a palôh thata a tymâ ta, a pheizy a chalyupa ta a pakhuzy a chakhyh ta.

⁷ Dyuthaipazy, awhsithaipazy nata pachaothaipazy ano lâ a vaw chhi awpa ta abei cha a paro ngaitapa ta awh ta. Abei ta Babylaw chyhsa sopazy hnohta, “Ahy rai he châropa he reih ta, a chhopasiana nâ chho theipa cha, poh saihlawpa pabupa châ aw ta, a rao liata ngôh pachhih paaopa châ aw ta, khinarâh liata ryureituhpa a sâh chaipa a pathôhna a châ aw,” tah ta.

⁸ Chatanachata abei chyhsa sopa zydua cha a zâ ngia ei ta, châhrasala châropa a reih theipa y leipa ei ta, a chhopasiana abei a pahnosa theipa y hra veih ei.

⁹ Chavâta Bei Belsâza cha a pachârôh ngaita ta, a hmia hlâh khai ha ta, a beimachâzy chhao ama nôpo ngaita ta.

¹⁰ Abei nata beimachâzy biereipazy vâna chata abeinô cha kyhchhina o chhôh lâ a vaw ngia ta, abei hnohta, “Hy abei y, hroh kôzaw mah y! Na pachâpa ta cha patypamâ leipa sala, na hmia chhao hlâh hra khah sy.

¹¹ Na khinarâh liana heta chyhsa pakha, ano liata khazoh pathaihpazy thlahpa a ypa a y mâh tâh. Na paw daihti liana kha, khaihna nata pahnona nata khazohzy sona hawhpa sona ano liata hmôpa a châ. Chavâta na paw Bei Nebukaneza, na paw abei kha ta, ano cha moliethaipazy, dyuthaipazy, awhsithaipazy nata pachaothaipazy hyutuh chaipa ta a tao.

¹² Ano cha Dâniah châ ta, abei ta a moh Beltesâza a bi. Ano cha palôh pha ngaitapa, pahnona nata novâhna a hneipa chyhsa châ ta, mâzy chhopasia thei ta, bienyupazy reihpasia thei ta, biepeipazy chhao a pathlâ thei. Tahmâ Dâniah cha paawsa la, a chhopasiana a cha chho thlâh ha aw,” tah ta.

Pâhchhô châropa

¹³ Chatanachata Dâniah cha abei hmiakô liata a vaw chhi ei ta. Abei ta Dâniah hnohta, “Nâma he ma, sei ta a ypa Zudâh chyhsa, abei ei paw ta Zudâh râh tawhta â kaw chhipa, Dâniah ama tahpa cha a châ chi?

¹⁴ Khazohzy thlahpa cha nâma liata y ta, khaihna nata novâhna nata so patluana zy na hnei tahpa ei vaw thei.

¹⁵ He châropa he reih ta, a yzie na chhopasia awpa ta chyhsa sopazy nata pachaothaipazy ei hmiakô liata a vaw chhi ei ta, châhrasala he hmo chhopasiana he na chho thei veih ei.

¹⁶ Nâ deikua cha chhopasianazy reih thei chi ta, bie rupazy na pathlâ thei tahpa ei thei. Tahmâ châropa he reih thaipa ta, a chhopasiana eina pahnosa thei khiah chi ta cha, poh saihlawpa pabupa châ aw chi ta, na rao liata ngôh pachhih paaopa châ aw chi ta, ei râh liata ryureituhpa a sâh chaipa a pathôhna na châ aw,” tah ta.

¹⁷ Dâniah ta abei cha a chhy ta, a hnohta, “Na hmosaipazy cha nâma châta châ sala, na lymâzy cha mohropa pie mah y. Chatahrasala châropa cha abei reipa aw na ta, a chhopasiana chhao ei pahnosa aw.

¹⁸ Hy abei y, Khazohpa Chônôchaipa ta na paw Nebukaneza hnohta khinarâh zy, laina zy, rônahna zy, abeina zy pie ta.

¹⁹ Laina a piepa vâna chata, phopi to, râh to nata reih to ta a hmiakô liata a chalyu ei ta, ama chi ngaita. A khopa maih thie ta, a khopa maih a pahro; a khopa maih pasâhsa ta, a khopa maih a panawh.

²⁰ Châhrasala a palôh a pasâhsa ta, a pachâna pachyupa ta, â vaw palai nahta cha, â beina beidyuchhai tawhta pathlapa ta y ta, a rônahna pahluhpa a châ.

²¹ Khazohpa Chônôchaipa ta chyhsazy khinarâh chô liata ryureih ta, a khopa maih khinarâh chô liata a pabeisa tyh tahpa a pahno hlâlei cha, chyhsazy hry tawhtapa papuapa ta y ta, râhsa palôh paphaosapa châ ta, râh alâzy hry liata pahrâ ta, viahchaozy hawhta sibiepa pabâsapa châ ta, a pôhpa avâ diati ta padâpa ta a y.

²² Nâ a sawchapawpa Belsâza heta, cha zydua cha na pahno thlâh hana chôta, na palôh a panawh khoh va chi.

²³ Avâ Beipa cha tlao a palai thlu chi ta, a o liata nyuzy cha na hmiakô liata vaw cheih ei ta, nâma nata na beimachâzy, na lapinôzy nata na nôthozy ta kresawhti dona ta hmâh ei chi ta, a hmô thei leipa, a thei thei leipa nata pahnona a hnei leipa tâkâ khazohzy, ngôh khazohzy, dawh khazohzy, thua khazohzy, tho khazohzy nata alô khazohzy cha tlao reithai chi ta, na husona a ku liata a ypa nata na lâpi zydua a vaotuhpa Khazohpa hmâchhâh palyupalih va chi.

²⁴ Chavâta ano ta ku vaw tuah ta, he châropa he a vaw ropa a châ hih.

²⁵ He he châropa cha a châ: MENE, MENE, TEKEL, UPHARSIN.

²⁶ He he a chhopasiana a châ: MENE, Khazohpa ta na khinarâh nohzy reipati ha ta, a chhâna a patlôsa haw.

²⁷ TEKEL, khopathliahpa châ chi ta, tloh khao va chi.

²⁸ UPHARSIN, na khinarâh cha pachhaihpa châ ta, Media mo nata Persia mozy hnohta piepa a châ haw,” tah ta.

²⁹ Chatawhcha Belsâza ta biepie ta, Dâniah cha poh saihlawpa pabupa châ ta, a rao liata ngôh pachhih paao ei ta, khinarâh liata ryureituhpa a sâh chaipa a pathôhna ta phuahpa a châ.

³⁰ Cha zâ liana tlai chata Kaldia bei Belsâza cha thiepa châ ta,

³¹ Media Dâria ta khinarâh cha to ta, ano he kô sycharu nata kô no rachhôhpa a châ.