DÂNIAH 4 - Mara Bible RV (BSI)

Nebukaneza ta Khazohpa a reithai

¹ Bei Nebukaneza ta, khizaw zydua liata a pahrâpa phopi to, râh to nata reih to hnohta hetana heta tah ta: Thlalôhna nama chô liata pôh lymâ mawh sy!

² Chônôchai Khazohpa ta ei chô liata a taopa ngiana nata hmo noâhpazy phuah awpa he kei châta a phapa ta ei pahno.

³ A ngiana hmozy rônah ta, A hmonoâhpazy a thatlô ngaita! A khinarâh cha tlyzaw khinarâh châ ta, A ryureina chhâ zydua ta â duah aw.

Nebukaneza mâsapa einona

⁴ Kei, Nebukaneza cha ei o liata thadâhpa ta a pahâ na ta, ei abei o liata phasapa ta y thlâh ha na ta.

⁵ Mâ sa na ta, cha chata na pachisa ngaita ta. Ei rakhô liata ei zia thlâh ha nota, ei pachâhpadypa nata ei luh liata aluahna ei hmôpazy ta na patypamâ ta.

⁶ Chavâta ei mâsapa na chhopasia awpa ta, Babylaw râh liata chyhsa sopa zydua ei hmiakô liata a vaw chhi awpa ta biepie na ta.

⁷ Moliethaipazy, dyuthaipazy, awhsithaipazy nata pachaothaipazy a vy ei ta, ei mâsapa cha âmo chho ei na ta, châhrasala a chhopasiana na chho thei veih ei.

⁸ A chhâna lâta Dâniah, ei khazoh moh paphaopa ta a moh Beltesâza bipa, ano liata khazoh pathaihpazy thlahpa a ypa cha, ei hmiakô liata a vy ta, ei mâsapa cha chho na ta.

⁹ “Hy Beltesâza, moliethaipazy hyutuh chaipa y, khazoh pathaihpazy thlahpa na hnohta y ta, chavâta nâma châta la bienyupa ru tupa y vei, tahpa ei pahno; ei mâ lâta ei hmôpa aluahna nata a chhopasiana na chho teh.

¹⁰ Hezy he rakhô liata ei zia thlâh ha nota ei luh liata aluahna ei hmôpazy cha a châ. “Mohmia pasaih na ta, moh teh, alei liah liata thokô vaw y ta, thokô a sâh ngaitapa châ ta.

¹¹ Thokô cha kaw lai ta, pachyu ta, a kihthlao avâ daih ta, alei chhâna zydua tawhta hmô thei khaipa ta a y.

¹² A hnazy a ngia kaw ta, a theizy hluh ta, hro hnei to zydua châta nie awpa ano liata a y. Râhsazy ta a nohdi a chhai ei ta, avâ pavawzy ta a chiahzy liata pahrâ ei ta, sapa zydua ano tawhta pasapa ta ama y.

¹³ “Ei rakhô liata ei zia thlâh ha nota ei luh liata aluahnazy hmô na ta, moh teh, vaituhpa pakha, mo pathaihpa, avâ tawhta za chô ta.

¹⁴ A paro ngaitapa ta hetana heta awh ta, ‘Thokô kha thlu la, a chiahzy thlâ la, a hnazy pahrie la, a theizy hiepatla khai teh. A ry tawhta râhsazy pai ei sala, a chiah tawhta pavawzy a zaw khai mawh ei sy.

¹⁵ A chuahmi nata alei ry lâta a tharizy deikua cha pahlôh la, thua ri nata dawh ri ta chahry la, râh sibie panyupazy hry liata y thlâh ha mawh sy. Avâ diati ta padâ sala, a tovyuh awpa cha râhsazy hnohta alei sibiepa hry liata pahrâpa châ mawh sy.

¹⁶ A palôh cha chyhsapa palôh tawhta pananopa châ sala, râhsa palôh paphaosapa châ sala, ano châta daihti mia sari khô mawh sy.

¹⁷ He pachiana bie he vaituhpazy biepiepa ta taopa châ ta, biepathlupa he mo pathaihpazy bie ta taopa a châ. Chônôchaipa cha chyhsazy khinarâh chô liata ryu a reihpa châ ta, a pie khohpa hnohta khinarâh pie ta, chyhsa nawh chaipazy chhao a pabeisa thei ei tahpa chyhsazy ta ama pahno thei nawpa ta,’ tah ta.

¹⁸ He mâ he, kei, Bei Nebukaneza ta sa na ta, nâ, Hy Beltesâza y, a chhopasiana cha phuah teh. Ei beinarâh liata chyhsa sopa zydua ta a chhopasiana na chho thei veih ei. Nâ deikua cha na tao thei aw, khazoh pathaihpazy thlahpa nâma liata a ypa vâta,” tah na ta.

Dâniah ta Nebukaneza mâsapa a chhopasia

¹⁹ Dâniah, Beltesâza ama tahpa cha, buakha chhôh chihuhpa ta vaw y ta, a pachâpazy ta patypamâ ta. Abei ta a chhy ta, a hnohta, “Beltesâza y, mâsapa tlyma, a chhopasiana tlyma ta cha patypamâ khah se,” tah ta. Beltesâza ta a chhy ta, a hnohta, “Ei zibeipa, na mâsapa he châ haotuhpazy châta châ sala, a chhopasiana he na chariahpazy châta châ mawh sy!

²⁰ Thokô na hmôpa, kaw lai ta, a kaw pachyu ta, a kihthlao avâ a daihpa, alei chhâna zydua tawhta hmô theipa ta a ypa,

²¹ a hnazy a ngia kawpa nata a thei a hluh ngaitapa, hmohrohneipa to châta nie awpa a hneipa, râhsazy ta a nohdi amâ chhaipa nata avâ pavawzy ta a chiahzy liata ama pahrâpa thokô kha,

²² Hy abei y, kha thokô kha nâma he na châ. Kaw lai chi ta, na tha kaw tlô ta, na rônahna a sâh via rilipa ta avâ daih ta, nâ beinarâh chhao alei chhâna taihta a châ.

²³ Avâ tawhta vaituhpa, mo pathaihpa a zâ chôpa ta na hnohta, ‘Thokô kha thlu la, pahleipadia teh; a chuahmi nata alei ry liata a tharizy deikua cha râh sibie panyupazy hry liata pahlôh la, ano cha avâ diati ta padâ sala, a tovyuh cha râhsazy hnohta châ mawh sy, ano châta daihti mia sari a khôna taihta,’ tahpa ta a reipa bie kha,

²⁴ Hy abei y, he he a chhopasiana cha a châ: He he Chônôchaipa biepiepa châ ta, ei zibeipa, abei nâma chô liata a vaw tlôpa a châ.

²⁵ Chyhsa hry tawhtapa papuapa ta y aw chi ta, na pahrâna cha râhsazy hry liata a châ aw. Viahchao hawhta sibiepa pabâsapa châ aw chi ta, avâ diati ta padâpa na châ aw. Chônôchaipa ta chyhsa khinarâhzy chô liata ryureih ta, a pie khohpa hnohta khinarâh a pie tyh, tahpa na pahno hlâlei cha na châta daihti mia sari a khô aw.

²⁶ Tho chuahmi nata a tharizy pahlôh awpa ta biepiepa a châpa hawhta, Avâ ta ryu a reih tahpa na pahno tawhta na khinarâh cha na châta pa-ipa a châ aw.

²⁷ Chavâta Hy abei y, pachâna ei cha piepa he a py tlâhpa ta rao mah y: na moleinazy siesaipa ta siana hrokhei la, na paraonazy siesaipa ta sipasapazy chô liata zawngiahna palâsa mah y. Cha hawhta na tao khiahta cha byhnâ na to heih aw,” tah ta.

Nebukaneza panawhna

²⁸ He zydua he Bei Nebukaneza chô liata vaw tlô ta.

²⁹ Thla hrawh hleino chhâna liata Babylaw bei o vâphuh liata â hlaihlâ ngâ nota,

³⁰ abei cha patuapalua ta, hetana heta tah ta, “He Babylaw rônahpa he keima hmotaotheina nata thatlôna tlai ta abei pahrâna o châta nata ei beina rônahna châta ei paduapa châ vei mâ?” tah ta.

³¹ Cha biezy cha abei pakah liata a y thlâh ha chy nota, avâ tawhta ao za pua ta, “Hy Bei Nebukaneza y, he bie he nâma châta a vaw tlôpa a châ: Khinarâh ta a cha puasai haw.

³² Chyhsazy hry tawhtapa papuapa ta y aw chi ta, na pahrâna cha râhsazy hry ta a châ aw. Viahchao hawhta sibiepa pabâsapa châ aw chi ta, na châta daihti mia sari a khô aw, Chônôchaipa ta chyhsazy khinarâh chô liata ryureih ta, a pie khohpa hnohta khinarâh cha a pie tyh, tahpa na pahno hlâlei cha,” tahpa ta.

³³ Cha nona tlai chata ao ta a reipa bie cha Nebukaneza chô liata thlai vaw tlô ta. Chyhsazy hry tawhtapa papuapa ta y ta, pahmôhpi hmi hawhta a sâ a seihna taihta nata pavaw patozy hawhta a patozy a seih khai hana taihta viahchao hawhta sibiepa bâ ta, a pôhpa cha avâ diati ta padâ ta.

Nebukaneza paduapathina

³⁴ Cha nohzy chhâna liata, kei, Nebukaneza cha avâ lâ ei mo kaw khaih na ta, chatanachata ei pahnona cha kei lâta vaw kua heih ta, Chônôchaipa cha reithai na ta, tlyzaw ta a hrohpa cha reithaipa ta ei palyupalih. A ryureina cha tlyzaw ryureina châ ta, A khinarâh chhâ zydua ta â duah.

³⁵ Lei chyhsa zydua cha, Hraoleipa ta pachâpa châ ei ta; A khozie hawhta vâmozy hry liata tao ta, Lei chyhsazy hry liata chhao a tao tyh; A ku a chalihsa theipa y leipa ei ta, “Khâpa hmo ma na tao haw?” A tah theipa y hra veih ei.

³⁶ Ei pahnona kei lâ a vaw kua heihna daihti liata, ei beinarâh rônahna nata ei beina nata ei khaih ngianazy cha kei lâ vaw kua heih ei ta. Ei ryhraokheituhpazy nata ei beimachâzy ta na vaw pangai ei ta, ei beidyuchhai liata na patyusa heih ei ta, hmialâ tahpa hlâta thata rônah viapa ta y na ta.

³⁷ Chavâta tahmâ, kei, Nebukaneza ta avâ Beipa cha reithai na ta, palyupalihpa ta, ei parônahsa. Avâ Beipa cha a hmotaopa zydua a do ta, a lâpizy sia ta, a palaipazy a panawh theipa a châ.