DÂNIAH 3 - Mara Bible RV (BSI)

Dâniah viasazy nothlahpa a chhy khoh veih ei

¹ Bei Nebukaneza ta ngôh nothlahpa, a doh lâ dy sycharu a sâhpa nata a hâ dy charu a kawhpa tao ta, Babylaw râh Durâ bypi liata padua ta.

² Bei Nebukaneza ta bia avaotuhpazy, râh avaotuhpa zy, râh ryureituhpazy, ryhraotuhpazy, sôh avaotuhpazy, dâhthaipazy nata pachiatuhpazy nata râh liata sawhkhâ molaipa zydua cha Nebukaneza ta nothlahpa a paduapa hlâna apakhyna liata a hlao awpa ta awpakhy ta.

³ Chatanachata bia avaotuhpazy, râh avaotuhpa zy, râh ryureituhpazy, ryhraokheituhpazy, sôh avaotuhpazy, dâhthaipazy nata pachiatuhpazy nata râh liata sawhkhâ molaipa zydua cha Bei Nebukaneza paduapa nothlahpa hlâna pakhyna hnei awpa ta a hmaohpakhy ei ta, Nebukaneza paduapa nothlahpa hmiakô liana cha a duah ei ta.

⁴ Chatawhcha tlâh awhtuhpa ta ao paro ngaitapa ta awh ta, “Hy phopizy, râhzy nata reihzy saih u,

⁵ chiahmie zy, ramo zy, totâ zy, tlaipih zy, totâ laipa zy, bâzâ zy nata paropasyupa chi to pyu nama theipa nahta, âkhu lâta pao aw ei chi ta, Bei Nebukaneza paduapa ngôh nothlahpa he a chhy awpa ta biepiepa nama châ.

⁶ Ahy rai âkhu lâta pao ta a chhy leipa cha, cha nona tlai chata patina meihô liata thypa a châ aw,” tah ta.

⁷ Chatanachata phopi zydua ta chiahmie zy, ramo zy, totâ zy, tlaipih zy, totâ laipazy nata paropasyu theipa pyu to ama theipa nahta, phopi zydua, râh zydua nata reih zydua ta âkhu lâta paopa ta, Bei Nebukaneza paduapa ngôh nothlahpa a chhy ei ta.

Patina meihô liata pachhana

⁸ Cha nona chata Kaldia chyhsa ahyzy tlyma hmialâ vaw pua ei ta, Zu chyhsazy vaw leih ei ta.

⁹ Bei Nebukaneza hnohta, “Hy abei y, hroh kôzaw mah y!

¹⁰ Hy abei y, nâma tlai ta, chyhsa ahy rai chiahmie zy, ramo zy, totâ zy, tlaipih zy, totâ laipa zy, bâzâ nata paropasyu theipa chi to pyu a theipa maihta âkhu lâta paopa ta ngôh nothlahpa a chhy awpa ta biepiepa papua chi ta.

¹¹ Ahy rai âkhu lâta paopa ta a chhy leipa maih cha patina meihô liata thypa a châ aw, tah chi ta.

¹² Châhrasala Zu chyhsa thokha, Babylaw râh bia hyutuhpazy ta na taopa Sâdarâka, Mesâka nata Abenekô zy kha y ei ta. Hy abei y, he chyhsazy heta châ papeisa veih ei. Na khazohzy chakao leipa ei ta, ngôh nothlahpa na paduapa chhao a chhy veih ei,” tah ei ta.

¹³ Nebukaneza cha a hiehâh ngaita ta, Sâdarâka, Mesâka nata Abenekô zy cha a vaw chhi awpa ta biepie ta. Cha chyhsazy cha abei hmiakô liata a vaw chhi ei ta.

¹⁴ Nebukaneza ta âmo cha bie a chho ta, ama hnohta, “Hy Sâdarâka, Mesâka, Abenekô, ei khazohzy chakao leipa ei chi ta, ngôh nothlahpa ei paduapa chhao a chhy veih ei chi, tahpa he â do ma?

¹⁵ Tahmâ chiahmie zy, ramo zy, totâ zy, tlaipih zy, totâ laipa zy, bâzâ nata paropasyu theipa chi to pyu nama theipa nahta, âkhu lâta paopa ta nothlahpa ei taopa namâ chhy khiahta cha a pha. Namâ chhy leipa khiahta deikua cha, patina meihô ru ngaitapa liata thlai thypa nama châ aw. Keima ku tawhta châ pachha thei awpa khazoh ahy ma a y?” tah ta.

¹⁶ Sâdarâka, Mesâka nata Abenekô zy ta abei cha a chhy ei ta, a hnohta, “Hy Nebukaneza, he kyh liata eima châ chhy awpa chhao byuh vei.

¹⁷ Patina meihô liata thypa eima châpa chhao ta, eima chakaopa eima Khazohpa ta patina meihô ru ngaitapa tawhta miah pachha thei ta, Hy abei y, nâma ku tawhta chhao miah a pachha thei.

¹⁸ Maniah a pachha leipa chhao ta, Hy abei y, he he pahno mah y; na khazohzy cha chakao leipa aw pi ta, ngôh nothlahpa na paduapa chhao a chhy aw ma pi,” tah ei ta.

¹⁹ Nebukaneza cha a hiehâh ngaita ta, Sâdarâka, Mesâka nata Abenekô zy chô liata a hmiaphao a nano khai ha ta. Patina mei cha a sah tyhpa hlâta a lie sari ta pasah awpa ta biepie ta.

²⁰ A pheisaihzy hry liata chyhsa thatlôpa thokhazy cha, Sâdarâka, Mesâka nata Abenekô zy chahry ta, patina meihô liata thy awpa ta biepie ta.

²¹ Chatanachata Sâdarâka, Mesâka nata Abenekô zy cha ama viahkao pasipazy, ama chaopasyzy, ama khuthozy nata ama chysia hropazy chhao ta chahry ei ta, patina meihô liana cha thy ei ta.

²² Abei biepiepa cha a para kaw ta, patina mei cha a sah ngaitapa vâta, Sâdarâka, Mesâka nata Abenekô zy a chalotuhpazy cha meipaleih ta a kâsao khai ha ei.

²³ Chatanachata cha chyhsa pathôh, Sâdarâka, Mesâka nata Abenekô zy cha chahryna chôta patina meihô chhôh liata tla ha ei ta.

²⁴ Châhrasala Bei Nebukaneza cha noâh tah ngaita ta, thlai thyu ta, a ryhraokheituhpazy hnohta, “Chyhsa pathôh vei ma chahrypa ta mei liata eima thy vei?” tah ta. Âmo ta abei cha a chhy ei ta, a hnohta, “Hy, abei y, â do na,” tah ei ta.

²⁵ Ano ta ama hnohta, “Moh teh u, chyhsa papalih chahry leipa ta mei hry liata a hlaihlâ ngâpa ei hmô ei, pasana chhao hnei veih ei; a papalihna a lâzie chhochhi cha khazohzy sawchapawpa hawhta a châ,” tah ta.

²⁶ Chatawhcha Nebukaneza cha patina meihô chhikao kiapâh lâ vâ hnia ta, awh ta, “Sâdarâka, Mesâka, Abenekô, Khazohpa Chônôchaipa chakaotuhpa saih u, vaw pua u la, he lâ a vy teh u,” tah ta. Sâdarâka, Mesâka nata Abenekô zy cha mei tawhta vaw pua ei ta.

²⁷ Bia avaotuhpazy, râh avaotuhpazy, râh ryureituhpazy nata abei ryhraokheituhpazy a pahmaohpakhy ei ta, cha chyhsazy pôhpa chô liata mei ta hmotaotheina a hnei leizie hmô ei ta. Ama luh sâ mei ta hlih leipa ta, ama viahkao pasipazy kâ leipa ta, mei roh rai pahnâh veih ei.

²⁸ Chatawhcha Nebukaneza ta hetana heta tah ta, “Sâdarâka, Mesâka nata Abenekô zy Khazohpa cha reithaipa ta y mawh sy! A vâlyuhchâpazy za tuah ta, ano ngâpa ta a chakaotuhpazy cha a pachha ha ei. He chyhsazy heta âmo Khazohpa dei leipa ta cha khazoh hropa rai a chhy lei awpa ta ama pôhpa amâ hlâ hapa vâta abei biepiepa chhao zyh leipa ta ama y.

²⁹ Chavâta he biepiepa he ei tao: Phopi nata râh nata reih kheihawhpa hmahta, Sâdarâka, Mesâka nata Abenekô zy Khazohpa chô liata bie pha leipa kheihawhpa rai a reihpa maih cha, a tlawpoh ta pachhaih khaipa châ aw ei ta, ama ozy cha hnaihny thyna ta taopa a châ aw; he hawhta a pachha theipa khazoh hropa rai y veih ei,” tahpa ta.

³⁰ Chatanachata abei ta Sâdarâka, Mesâka nata Abenekô zy cha Babylaw bia liata ama rai pakiasâhsa ta.