DÂNIAH 2 - Mara Bible RV (BSI)

Nebukaneza mâsapa eikhana

¹ Nebukaneza abeina kô nona liata, Nebukaneza ta mâ sa ta; a palôrupa pachârôh ngaita ta, amô thei khao leipa ta.

² Abei ta a mâsapazy cha ano chho awpa ta moliethaipazy, dyuthaipazy, pachaothaipazy nata awhsithaipazy awpakhy awpa ta biepie ta. Âmo cha a vy ei ta abei hmiakô liata a duah ei ta.

³ Abei ta ama hnohta, “Mâ sa na ta, ei mâsapa cha pahno khohpa ta ei pachârôh ngaita ta,” tah ta.

⁴ Kaldia mo chata abei hnohta Aramia reih ta, “Hy abei y, hroh kôzaw mah y! Na mâsapa cha châ chakaotuhpazy he chho la, eima chhopasia aw,” tah ei ta.

⁵ Abei ta Kaldia mo cha a chhy ta, ama hnohta, “Keima tawhta bie a puapa cha â i: Ei mâsapa nata a chhopasiana eina pahnosa leipa khiah ei chi ta cha, pachhaih pazaoh khaipa châ aw ei chi ta, nama ozy hnaihny thyna su ta taopa a châ aw.

⁶ Châhrasala ei mâsapa nata a chhopasiana nama rei thei khiahta cha, hmosaipazy, lymâzy nata palyupalihna rônahpazy keima tawhta nama hmô aw. Chavâta ei mâsapa nata a yzie cha na chho teh u,” tah ta.

⁷ A einona ta a chhy ei ta, a hnohta, “Abei ta a mâsapa cha ano a chakaotuhpazy he chho sala, a chhopasiana cha eima phuah aw,” tah ei ta.

⁸ Abei ta a chhy ta, ama hnohta, “Daihti pahawh pasâh namâ chhuahpa dei a châ tahpa a siapa ta ei pahno haw, keima tawhta bie a puapa cha â i tahpa nama pahnopa vâta.

⁹ Khâpa mâ ma ei sa tahpa eina chho leipa khiah ei chi ta cha, hriena dei leipa ta cha nama to hro awpa y vei. Hmo â vaw nano laih awpa hnabeiseihpa ta, ei hmiakô liata haipa nata moleina biezy rei awpa namâ paraohpa a châpa ei pahno haw. Ei mâsapa cha na chho teh u, chatanachata a chhopasiana eina chho thei aw ei chi tahpa ei pahno aw,” tah ta.

¹⁰ Kaldia mo ta abei cha a chhy ei ta, a hnohta, “Abei hmo reipa a tao thei awpa he alei chô liata chyhsa ahy hmah y veih ei! Ahy bei rônahpa nata hmotaotheipa hmahta he hawhpa hmo he moliethaipa tlyma, dyuthaipa tlyma, awhsithaipa tlyma hiahri beih vei.

¹¹ Abei hmo a hnawpa he a ru tu ha na; khazohzy na tah leipa ta cha ahy hmahta he hmo he abei a chhopasia thei awpa y aw veih ei, khazohzy hra cha chyhsazy hry liata pahrâ tlôh ei vâ,” tah ei ta.

¹² Ama biereipa vâna chata abei cha a pathi iapa ta thata a hrâh ta, Babylaw chyhsa sopa zydua cha pahleipadia khai awpa ta biepie ta.

¹³ Biepiepa cha papuapa châ ta, chyhsa sopazy cha thie awpa châ ha ei ta; Dâniah nata a viasazy chhao cha thie awpa ta tluapa ama châ hra.

¹⁴ Dâniah ta Babylaw chyhsa sopazy thie awpa ta a puapa, bei vaituhpazy hyutuhpa Ariôka cha so ngaitapa nata ryhpaohna pahno ngaitapa ta bie a chho ta.

¹⁵ Bei vaituhpazy hyutuhpa Ariôka hnohta, “Khazia ma bei biepiepa cha, cha tlatlu ta â para tly?” tah ta. Ariôka ta Dâniah cha hmo yzie chho ta.

¹⁶ Chatawhcha Dâniah cha abei lâ a ngia ta, a mâsapa a chhopasia thei nawpa ta daihti pie awpa ta a haw ta.

Khazohpa ta Dâniah hnohta Nebukaneza mâsapa a palâhâh

¹⁷ Dâniah cha o lâ a di ta, cha hmo cha a viasa Hânaniah, Misela nata Azariah zy chho ta.

¹⁸ Dâniah nata a viasazy cha Babylaw chyhsa sopazy chhao ta pahleipadiapa ama châ lei nawpa ta, cha bienyupa kyh liata avâ Khazohpa ngiachhiena a haw awpa ta a viasazy cha chho ta.

¹⁹ Chatanachata bienyupa cha zâ ta aluahna liata Dâniah hnohta palâhâhpa châ ta. Dâniah ta avâ Khazohpa cha reithai ta.

²⁰ Dâniah ta, “Sona nata thatlôna cha, Khazohpa eih châ ta; Khazohpa moh cha, Chhâzaw nata tlyzaw ta reithaipa ta y mawh sy!

²¹ Daihti nata khihchâh zy panano ta, Abeizy pabâ ta, abeizy a padua; Asopazy hnohta sona pie ta, Pahno thaipazy hnohta novâhna a pie.

²² Hmo a thupa nata a nyupazy palâhâh ta, Zohna liata a ypa pahno ta, A hnohta khaihna a pahrâ.

²³ Châ ly na ta, ei cha reithai, Hy pathlatuhzy Khazohpa y; Sona nata hmotaotheina na pie chi ta, Eima cha hiapa eina pahnosa ha chi; Abei mâsapa cha miah na pahnosa haw,” tah ta.

²⁴ Chatawhcha Dâniah cha Babylaw chyhsa sopazy thie awpa ta abei ta a raopa Ariôka lâ a ngia ta, a hnohta, “Babylaw chyhsa sopazy cha pahleipadia khah y; abei lâ nâ chhi la, abei hnohta a chhopasiana ei chho aw,” tah ta.

²⁵ Ariôka ta Dâniah cha abei lâ thlai a chhi ta, a hnohta, “Abei mâsapa a chhopasia thei awpa chyhsa Zudâh râh tawhta sei ta â khypazy hry liata pakha ei hmô haw,” tah ta.

²⁶ Abei ta Dâniah, Beltesâza ama tahpa hnohna chata, “Ei mâ lâta ei hmôpa nata a chhopasiana cha eina chho thei aw chi ma?” tah ta.

²⁷ Dâniah ta a chhy ta, a hnohta, “Abei ta bienyupa a hiahripa he chyhsa sopazy, dyuthaipazy, moliethaipazy nata, pachaothaipazy ahy ta hmahta abei chho thei aw veih ei.

²⁸ Châhrasala bienyupa a palâhâhtuhpa Khazohpa avâ liata y ta, ano ta hmialâ ta hmo a vaw y awpazy Nebukaneza hnohta a pahnosapa a châ hih. Hezy he rakhô liata nâ zia thlâh ha nota na luh liata mâ na sapa nata aluahnazy cha a châ.

²⁹ “Hy abei y, rakhô liata nâ zia thlâh ha nota, hmo a vaw tlô awpazy pachâ chi ta, bienyupa a palâhâhtuhpa ta hmo a vaw tlô awpazy cha a cha pahnosa.

³⁰ Kei deikua cha chyhsa hropa zydua hlâta ei so viapa vâta he bienyupa he ei hnohta palâhâhpa châ leipa ta, a chhopasiana cha abei ta na pahno thei nawpa nata na palôh pachâpazy na pahno thei nawpa ta tlao a châ.

³¹ “Hy abei y, mohmia pasaih chi ta, moh teh, na hmiakô liata nothlahpa lai ngaitapa miakha y ta, cha nothlahpa, thatlô ngaitapa nata khaih ngaitapa cha na hmiakô liata a duah ta, â lânazie chhao chichhih ngaitapa a châ.

³² Cha nothlahpa cha a luh ngôh suapa ta taopa châ ta, a chachôhna nata a bâhzy cha tâkâ ta taopa châ ta, a py nata a byhpizy cha dawh ta taopa a châ.

³³ A pheizy thua ta taopa châ ta, a pheipazahzy cha thokha thua, thokha beihlei ta taopa a châ.

³⁴ Na mo thlâh ha nota, alô miakha cha chyhsa ku ta chakhiapa châ leipa ta ano kho tlai ta zâ chakhia ta, cha chata thua nata beihlei ta taopa nothlahpa phei cha za vi ta, a pazao khai haw.

³⁵ Thua zy, beihlei zy, dawh zy, tâkâ zy, ngôh zy cha a tlawh ta zao khai ha ei ta, nopi noh sawhri sâh sihpa hawhta vaw châ ei ta, thlih ta âmo cha phaoh ta, ama hniehnôh chhao hmô awpa y khao vei. Cha nona chata nothlahpa a vituhpa alô cha tlâh lai ngaitapa lâta a vaw lie ta, alei chô zydua a bie haw.

Dâniah ta Nebukaneza mâsapa a chhopasia

³⁶ “Kha kha na mâsapa cha a châ. Tahmâ a chhopasiana abei eima chho aw.

³⁷ Hy abei y, nâ cha beizy bei châ chi ta,

³⁸ avâ Khazohpa ta beinarâh, biehneina, thatlôna nata rônahna zy cha pie ta; chyhsa sawzy, râhsazy nata avâ liata pavawzy pahrâna su zydua cha pie ta, âmo chô liata ryureituhpa ta a cha tao. Ngôh luh kha nâma na châ.

³⁹ Nâma khai tawhta khinarâh hropa, nâma hlâta a nawh viapa a vaw duah aw ta, cha khai tawhta khinarâh miathôhna, alei chô zydua liata ryu a reih awpa dawh khinarâh â vaw duah aw.

⁴⁰ Chatawhcha khinarâh miapalihna, thua hawhta thatlôpa a vaw duah aw ta, thua cha hmo zydua pakeichheih khai thei ta, a padipazao khai theipa a châ. Thua ta hmo zydua a pakeichheih theipa hawhta, khinarâh miapalihna ta khinarâh hropa zydua pakeichheihpa ta a padipazao khai aw.

⁴¹ A pheipazahzy nata pheiparozy cha thokha beihvituhpa beihlei ta taopa nata thokha thua ta taopa na hmôpa hawhta, cha khinarâh cha pachhaih pazaoh khaipa khinarâh châ aw ta, thua nata beihlei naipa a pahlaopa na hmôpa hawhta, thua hawhta pachyupazy ama y aw.

⁴² A pheiparozy cha thokha thua, thokha beihlei a châpa hawhta, cha khinarâh cha su thokha liata a thatlô aw ta, su thokha liata cha a dadieh aw.

⁴³ Thua nata beihlei naipa â pahlaopa na hmôpa hawh tlai ta, âmo cha chi â pathla pahlaopa châ aw ei ta, châhrasala thua cha beihlei nata â pahlao thai leipa hawhta, a pôhkha hlei aw veih ei.

⁴⁴ “Cha abeizy daihti liana cha, parao thei lei awpa khinarâh avâ Khazohpa ta padua aw ta, cha khinarâh cha phopi hropa châta siesaipa châ aw vei. Khinarâh hropa zydua cha pakeichheih khai aw ta, ano khinarâh deikua cha tlyzaw ta â duah aw.

⁴⁵ Chyhsa ku ta châ leipa ta, tlâh tawhta ano kho ta zâ chakhiapa alô na hmôpa hawhta nata, cha chata thua zy, dawh zy, beihlei zy, tâkâ zy, ngôh zy a pakeichheih khaipa na hmôpa hawhna khata a châ aw. Khazohpa rônahpa ta he tawhta hmo a vaw tlô awpa abei hnohta a pahnosapa a châ. Mâsapa he a hmeiseihpa châ ta, a chhopasiana chhao â dopa a châ,” tahpa ta chho ta.

A mâsapa ta Nebukaneza palôh a panano

⁴⁶ Chatawhcha Bei Nebukaneza cha â khu lâta pao ta, Dâniah cha a naoh ta, hmohlâpa nata ropahâhpazy Dâniah hnohta hlâ awpa ta biepie ta.

⁴⁷ Abei ta Dâniah cha a chhy ta, a hnohta, “Hmeiseihta ta, nâmo Khazohpa he khazohzy Khazohpa châ ta, beizy Beipa a châ; bienyupa a palâhâh theipa chhao a châ, chavâta bienyupa na palâhâh thei ha hih,” tah ta.

⁴⁸ Chatanachata abei ta Dâniah cha thata palyupalih ta, hmosaipa rônahpa hluhpi pie ta, Babylaw râh zydua chô liata ryureituhpa nata Babylaw chyhsa sopazy chô liata hyutuh chaipa ta tao ta.

⁴⁹ Dâniah ta abei cha a haw ta, chatanachata abei ta Sâdarâka, Mesâka nata Abenekô zy cha Babylaw râh bia liata hyutuhpazy ta a rao hra ei. Dâniah deikua cha abei o liata a chakao lymâ.