DÂNIAH 11 - Mara Bible RV (BSI)

¹ “Kei deikua cha, Media chyhsa Dâria â beina kô khana liana kha ta, ano pa-i awpa nata thapatlô awpa ta a duah na ta.

Persia nata Krikâh abeinarâhzy kyh chhochhieliena

² “Tahmâ biedopa ei cha chho aw. Moh teh, Persia liata abei pathôh vaw pua via aw ei ta, a papalihna cha ahropa zydua hlâta a hneirôh via chai aw. A hneirônazy vâta a tha a kaw tlô tita, Krikâh khinarâh a dyuh awpa ta chyhsa zydua a pathyu aw.

³ Chatawhcha bei thatlô ngaitapa vaw pua aw ta, biehneina lai ngaitapa ta ryureih aw ta, ano rei sai ta a tao aw.

⁴ Â vaw bei tawhta, a khinarâh cha kei chheih aw ta, avâ thlih miapalihzy lâta pachhaihpa ta y aw ta, a pathlazy hnohta piepa châ leipa aw ta, biehneina ta ryu a rei tyhnazie hawhta châ hra aw vei; a khinarâh cha chakhia pathlapa châ aw ta, mohropazy hnohta piepa a châ aw.

Maw bei nata chho bei adyuhna kyh chhochhieliena

⁵ “Chho bei cha a thatlô ngaita aw ta, châhrasala ano ry liata ryureituhpa pakha cha ano hlâta a tha vaw tlô via aw ta, a biehneina cha biehneina lai ngaitapa a châ aw.

⁶ Kô khazie tlyma a khô tawhta, azaona tao aw ei ta, chho bei sawchanô cha aryhna tao awpa ta maw bei lâ a khy aw. Châhrasala chho bei sawchanô ta a bâh thatlôna pabohsa thei leipa aw ta, maw bei chhao a duah thei leipa aw ta, a bâh thatlôna a duah thei hra aw vei. Bei sawchanô nata ano a chakaotuhpazy, a paw nata cha daihtizy liata ano a baotuhpazy chhao a paphasai khaipa ama châ aw.

⁷ “Chho bei su liata a duah awpa ta, chho bei sawchanô thari pachiahpazy tawhta pakha vaw pua aw ta, maw bei pheisaih siehnao aw ta, a thokhy tlahnao aw ta, âmo a dyuh aw ta, a pahnie aw.

⁸ Ama khazoh zy, ama khazoh nothlahpa thua ta leihpa zy, tâkâ nata ngôh ta taopa ama hmobaoh sôhpazy Izi râh lâ siekhei aw ta, kô khazie chhôh ma cha maw bei a dyuh khao aw vei.

⁹ Chatawhcha maw bei ta chho bei siehnao aw ta, châhrasala a râh lâ â lie heih aw.

¹⁰ “Maw bei sawchapawzy ta a dyuh awpa ta a pachhuahpanoh aw ei ta, pheisaih hri hluh ngaitapa awpakhy aw ei ta, tisaih toh thei leipa hawhta vaw pua via ngâ thlâh ha aw ei ta, chho bei thokhy tlôna taihta amâ dyuh laih lymâ aw.

¹¹ Chatawhcha chho bei cha, pathi ia ngaitapa ta vaw pua aw ta, maw bei cha â dyuh aw. Maw bei ta pheisaih hluhpi pathyu aw ta, châhrasala âmo cha chho bei ku liata hlâpa ama châ aw.

¹² Pheisaihzy cha chho lâ a chhipa ta ama y nahta, chho bei palôh cha thata a kaw palai aw ta, sâh hluhpi a thie aw ei. Châhrasala a duah patlô aw vei.

¹³ Maw bei ta pheisaih hluhpi, a hmiatuapa hlâta hluh viapa padua heih aw ta, kô khazie tlyma a khô tawhta, pheisaih hluh ngaitapa nata chariah chhaichhi a kipa ta hrâ a za sie heih aw.

¹⁴ “Cha daihtizy liata, chho bei a dyuh awpa ta chyhsa hluhpi thyu aw ei ta, na chiheihzy hry liata chyhsa thachahra a hmâhpazy ta aluahna pakisa nawpa ta âmosasyh ta amâ cheihchalo aw. Châhrasala ama hlaotloh aw vei.

¹⁵ Maw bei a zu aw ta, khihpi dôh aw ta, thokhy alei pacho thlu aw ta, chatanachata thokhy ta a phapa ta dôhpa khihpi cha a la aw. Chho pheisaihzy ta toh thei aw veih ei, a pheisaih pha chaipazy chhao ta toh theina thatlôna hnei aw veih ei.

¹⁶ Chho bei a dyuhtuhpa ta a khozie hawhta tao aw ta, a hmiakô liata ahy hmah a duah thei aw veih ei. Râh Ngiapa liata a duah aw ta, a ku liata parao theina a y aw.

¹⁷ Chatawhcha maw bei cha a khinarâh pôhpalôhpa thatlôna chhaota chho lâ a heihpa ta zu aw ta, chho bei nata azaona a tao aw. Chho khinarâh a parao thei nawpa ta, chanôzy sawchanô pakha a lapinô châta a pie aw. Châhrasala â chhuahnazy a hlaotloh leipa aw ta, ano châta phahnai aw vei.

¹⁸ Cha khai tawhta, tilaipi kiah râhzy lâta a heih aw ta, râh hluhpi a la aw. Châhrasala â palaina cha pheisaih hyutuhpa pakha ta panawhsa aw ta, â palaina chata ano chô liata â lie thlu aw.

¹⁹ Chatawhcha a râh thokhyzy lâta kua heih aw ta, châhrasala a chapiapa ta pao aw ta, hmôpa châ khao aw vei.

Beidyuchhai a chhutuhpa kyh chhochhieliena

²⁰ “Beinarâh rônahna châta chhie kheituhpa a tuah awpa chyhsa pakha ano su liata a vaw duah aw ta, châhrasala noh chyhta chhôh ta pahleipadiapa a châ aw, pathiiana vâta tlyma, adyuhna vâta tlyma deikua châ aw vei.

²¹ A su liata chyhsa reipachhie tlâhpa, abei châna pie leipa a vaw duah aw ta, thlalôh kawpa ta ama y daihti liata a vy aw ta, reikah thaina ta khinarâh cha a la aw.

²² Pheisaih hluhpi a hmiakô liata tlokhuh chadai paipa ta y aw ei ta, pachhaih pazaoh khaipa ama châ aw, biehrai hyutuhpa chhao taih ta.

²³ Ano nata azaona tao khaipa a châ tawhta, dôveipa ta rai hria aw ta, chyhsa chyhta chhao ta thatlôpa ta a vaw y aw.

²⁴ Râh hneirôh chaina suzy cha thlalôh kawpa ta ama y nota siehnao aw ta, a pawzy nata ano pathlatuhpazy ta ama tao thei leipazy tao aw ta, hraona nata hraona hmozy nata sôhzy a chyhsazy a rai aw ei. Thokhyzy tlahnao awpa ta a chhuanoh aw ta, châhrasala daihti buakha chhôh châ dei a châ aw.

²⁵ Pheisaih hluhpi chhao ta chho bei siehnao a chhuahpa ta, maw bei cha a thatlôna nata a riahphanazy papua aw ta, chho bei chhao ta pheisaih hluh ngaitapa nata thatlô ngaitapa chhao ta â vaw dyuh hra aw; châhrasala chho bei cha a duah thei aw vei, ano pahnie nawpa ta pachhuahpanohpa a châ hapa vâta.

²⁶ A pati a niepazy tlai ta ano cha parao aw ei ta, a pheisaihzy chadai paipa ta y aw ei ta, a hluhpi thiepa châ aw ei ta ama pao aw.

²⁷ He bei panozy he hmo pha leipa taona lâta ama palôh pahei aw ei ta, tlâhkhai miakha liata dôhna chôta a dôvei raihrie aw ei ta, châhrasala phahnai aw vei, chhâna cha daihti raopa liata a vaw tlô thlyu awpa vâta.

²⁸ Maw bei cha sôh nata thih hluhpi chhao ta ano râh lâ â lie aw. Châhrasala biehrai pathaihpa adyuhna lâta a palôh pahei aw ta, cha cha a hria khai tawhta a râh lâ â lie aw.

²⁹ “Daihti raopa liata chho lâ kuapa ta a siehnao heih aw. Châhrasala he daihti liata la hmiatuapa hawhna khata châ khao aw vei.

³⁰ Notla tilaipi ngiahkâ balyhzy ta ano a vaw dyuh aw ei ta, palôh chhâpa ta hnôh a sy aw ta, kua aw ta, biehrai pathaihpa chô liata ruchhôpa ta hmo a tao aw. Kua aw ta, biehrai pathaihpa a heihsaipazy chô liata khokheina a palâsa aw.

³¹ A pheisaihzy vaw pua aw ei ta, Achhyna o nata thokhyzy papuapalei aw ei ta, raopa hlâna hlâ tyhpazy ama pachhâsa aw. Chatanachata roryhrana a patlôsatuhpa hmo pasichhihpa cha ama padua aw.

³² Reithai pakheina reikah ta biehrai a paraotuhpazy cha pahnie aw ta, châhrasala ama Khazohpa a pahnopazy cha â ipa ta a duah aw ei ta, amâ duah patlô aw.

³³ Zawpi hry liata chyhsa sopazy ta, chyhsa hluhpi pachu aw ei ta, châhrasala noh hluhpi chhôh cha zaozi ta tlyma, meipaleih ta tlyma, sei châna ta tlyma, hraona ta tlyma chyhsa hluhpi ama pao aw.

³⁴ Ama pao tita baona chyhta hmô aw ei ta, chyhsa hluhpi ta chôpho ta âmo cha amâ pazao aw.

³⁵ Daihti raopa a vaw tlô hlâ via cha, chyhsa sopa thokha chhao amâ chapia hra aw, daihti chhâna taihta pasiapa ta nata pathaisapa nata pangyuhpa ta ama y thei nawpa ta.

Mesia dyuhtuhpa kyh chhochhieliena

³⁶ “Chatawhcha abei cha a khopa hawhta tao aw ta, anosasyh ta a pasâhsapa ta, khazoh to hlâta rônah viapa ta a tao aw ta, khazohzy Khazohpa a dyuhpa ta hmo anano ngaitapazy reih aw ta, hiehâhna daihti pakipa a châ hlâlei cha hmotaotheina a hnei aw, rao chiehpa hmo cha a tlô tlai awpa a châpa vâta.

³⁷ Ano pathlatuhzy khazohzy uasa leipa aw ta, chanôzy ta ama tlaichhai kawpa khazoh chhao uasa hra aw vei. Khazoh kheihawhpa hmah uasa aw vei, âmo zydua hlâta rônah viapa ta â tao awpa vâta.

³⁸ He khazohzy palyupalih châpa ta thokhyzy khazoh tlao palyupalih hri aw ta, ano pathlatuhzy ta ama pahno beih leipa khazoh cha ngôh nata tâkâ, lôsôhpa nata hmosaipa mâ rupazy ta a palyupalih aw.

³⁹ Râh hropa khazoh baona ta thokhy a i chaipazy chhao a dyuh aw ta, ano â châhpa maih cha thata a palyupalih aw ei. Âmo cha chyhsa hluhpi chô liata ryureituhpazy ta tao aw ta, a mâ hneipa ta râh a rai aw ei.

⁴⁰ “Chhâna daihti liata, chho bei ta maw bei cha a dyuh aw ta, châhrasala maw bei ta talailihzy, arâ pheisaihzy nata balyh hluhpi chhao ta, chho bei chô liata khiesô hawhta za pathli thlu aw ta, râhzy liata a ngia aw ta, tisaih hawhta âmo cha phaoh aw ta, a sie lymâ aw.

⁴¹ Râh Ngiapa liata chhao â ngia aw. Râh hluhpi pao aw ei ta, châhrasala Edôma, Môabâ nata Amawna pathla chhituhpazy cha a ku tawhta pachhapa ta ama y aw.

⁴² Râhzy chô liata a ku hy aw ta, Izi râh chhao khôkhâh aw vei.

⁴³ Ngôh nata tâkâ hneirônazy chô liata biehnei aw ta, Izi hmo sôhpa zydua chô liata chhao biehnei aw ta, Libia mo nata Kusi mozy cha ano liata a ngiarihpa ta ano ama pazi aw.

⁴⁴ Châhrasala nochhi lâ nata maw lâ tawhta bie a vaw tlôpazy ta ano cha patypamâ aw ta, chyhsa hluhpi pahleipadia ta, pamua ha awpa ta hiehâh ngaitapa ta a pua aw.

⁴⁵ Tlâh pathaihpa ngia ngaitapa nata tilaipi likawh liata â bei poh ozy rai aw ta, châhrasala a chhâna tlô aw ta, ano a bao awpa ahy hmah y aw veih ei.