DÂNIAH 10 - Mara Bible RV (BSI)

Thlahpa chariah adyuhna

¹ Persia bei Kôresâ kô thôh â bei kô ta, Dâniah, a moh Beltesâza bipa hnohta bie vaw tlô ta. Bie cha a do ta, adyuhna rarôh ypa kyh a châ. Bie cha pahno thai ta, aluahna chhao cha a pahno thai hra.

² Cha nohzy liata, kei, Dâniah cha hâta ei thôh chhôh mâchhiesapa ta y na ta.

³ Hâta ei thôh bohloh a tloh hlâlei cha, nie pahâhpa rai nie leipa na ta, sa tlyma, kresawhti tlyma, ei pakah liata a ngia leipa ta, sathaw chhao a thu va na.

⁴ Thla khana noh kih nata noh palih noh ta, chavah laipa ngiahkâ liata a duah thlâh ha na ta, cha chavah cha Tikari chavah a châ.

⁵ Avâ kaw ua na ta, kaw moh na ta, pala rih dipa chysia ta a tobi ta, Upha râh ngôh suapa chaisaihna ta a chai â saihpa chyhsa pakha hmô na ta.

⁶ A pôhpa beri lôsôhpa lyu ta, a hmia dôhla pathliepa hawhta khaih ta, a mozy meipaleih hawhta châ ta, a bâhzy nata a pheizy dawh hawhta patlie ta, a biereipa ao cha zawpi hluhpi ao hawhta a châ.

⁷ Cha aluahna cha kei, Dâniah deita ta hmô na ta, ei hnohta a ypa chyhsazy ta aluahna cha hmô veih ei. Châhrasala thata a chalyu ei ta, a nyu awpa ta a râ khai ha ei ta.

⁸ Chavâta keima deita ypa ta aluahna rônahpa cha hmô na ta, tha rai hnei khao leipa na ta; ei hmiazy cha athihpa hmia hawhta hlâh khai ha ta, tha rai hnei khao va na.

⁹ Chatawhcha a biereipa ao thei na ta, a biereipa ao ei thei nahta, ei hmia lâta pao na ta, ei hmia alei liata a khupa ta, mokuh pahâh ngaitapa ta a vaw mô ha na ta.

¹⁰ Chatawhcha moh teh u, ku ta na vaw hria ta, ei ku nata ei pakhuzy thata a chalyu ta, pakhu paneihpa ta na paysa ta.

¹¹ Ano ta ei hnohta, “Hy Dâniah, chyhsa pasâhsa a chhih ngaitapa y, na hnohta bie ei rei awpazy he pakhâta ta pachâ mah y; a kaw duah teh, na hnohta tuapa ei châ hih,” tah ta. He bie he ei hnohta a reih khai nahta, a chalyuna chôta a kaw duah na ta.

¹² Ano ta ei hnohta, “Chi kha, Dâniah, pahnona hnei awpa ta na pathipalôh pie chi ta, na biezy theipa châ ta, na biezy vâta â vypa ei châ.

¹³ Persia khinarâh ryureituhpa ta noh kih nata noh kha chhôh na pakhâ ta, châhrasala ryureituhpa lai chaipazy hry liatapa Mikaila cha keima na bao awpa ta a vy ta. Cha liata kei cha Persia beizy hnohta siesaipa châ na ta.

¹⁴ Noh hro ta na chyhsazy chô liata hmo a vaw tlô awpazy cha pahnosa awpa ta tahmâ ei vy, aluahna he noh a vaw tlô awpazy châta a châ,” tah ta.

¹⁵ He biezy lymâ hawhta ei hnohta bie a rei khai nahta, ei hmia alei lâ a khu na ta, reih pathlie thei khao leipa ta vaw y ha na ta.

¹⁶ Moh teh u, chyhsapa a lyupa pakha ta ei hmaozy na vaw hria ta, chatanachata ei pakah âpa ta bie reih thei ha heih na ta. Chatawhcha ei hmiakô liata a duahpa hnohta, “Hy ei zibeipa y, aluahna vâta pachârôhna ta thata na vi ta, tha rai hnei khao va na.

¹⁷ Ei zibeipa châ chakaotuhpa heta ei zibeipa he kheihta ma bie â chho thei aw? Tha rai hnei khao leipa na ta, huso awpa chhao hnei khao va na,” tah na ta.

¹⁸ Chyhsapa a lyupa chata na vaw hria heih ta, tha na patlô heih ta.

¹⁹ Ano ta ei hnohta, “Hy chyhsa pasâhsa a chhih ngaitapa y, chi kha, thlalôhna na hnohta y mawh sy. Thatlôpa ta y la, riahphapa ta y teh,” na tah ta. Ei hnohta bie a rei khai nahta, thapatlôpa ta vaw y ha na ta, a hnohta, “Ei zibeipa ta bie reih mawh sy, tha eina patlô ha chi,” tah na ta.

²⁰ Chatawhcha ano ta, “Khâpa vâta nâ lâ a vypa ma ei châ tahpa na pahno ma? Tahmâ Persia ryureituhpa a dyuh awpa ta kua aw na ta, kei ei pua tita, moh teh, Krikâh ryureituhpa â vy aw.

²¹ Châhrasala biedopa rona châbu liata ropa ei cha chho aw: Nâmo ryureituhpa Mikaila tah leipa ta cha, he sahlaozy adyuhna liata nâ dyuhkheipa pakha hmah y veih ei.