DÂNIAH 1 - Mara Bible RV (BSI)

Zudâh chyhsazy Babylaw lâ sei ta amâ chhi

¹ Zudâh bei Zehôki ryureina kô thôhna liata, Babylaw bei Nebukaneza Zerusale lâ a vy ta, Zerusale khihpi cha dôh ta.

² Abeipa ta Zudâh bei Zehôki nata Khazohpa o hmobaoh thokhazy cha a ku liata pie ta. Chazy cha Sinâ râh liata a khazoh o lâta siekhei ta, a khazoh sôh o liata soh ta.

³ Abei ta ano a chakaotuhpazy hyutuhpa Aspenâza hnohta, Izarei sawzy hry liata abei pathlazy nata nôpawpa sawzy a vaw chhi awpa ta biepie ta.

⁴ Âmo cha pizie liata seina hnei leipa satlia, hmiphapa, sona zydua a chu thei awpa duahmo liata â duahpa, hmo a pahno thaipa, pachâna pasohpa a hmâh thaipa nata abei o liata rai hria awpa ta a tlâh a châpazy ama châ awpa a châ. Aspenâza ta âmo cha Kaldia reih nata thainazy a pachu aw ei.

⁵ Chatawhcha abei ta abei pati nata a kresawhti doh tyhpa zy cha noh chareih ta ama niedo awpa ta rao ta, cha hawhna chata kô thôh chhôh mohôhpa châ aw ei ta, cha khai tawhta abei chakaona rai liata amâ ngia awpa a châ.

⁶ Chazy hry liata Zudâh pathla liatapa Dâniah zy, Hânaniah zy, Misela zy, Azariah zy amâ hlao hra.

⁷ Bei chakaotuhpazy hyutuhpa chata Dâniah cha Beltesâza, Hânaniah cha Sâdarâka, Misela cha Mesâka, Azariah cha Abenekô tahpa ta ama moh a bi ei.

Dâniah nata a viasazy ngâchhihna

⁸ Châhrasala Dâniah cha abei pati nata a kresawhti dopa zy ta a papuapalei lei awpa ta a palôh ta khâchâ a chhuah ha ta. Â papuapalei lei nawpa ta bei chakaotuhpazy hyutuhpa cha hiah ta.

⁹ Khazohpa ta Dâniah cha bei chakaotuhpazy hyutuhpa mohmô liata khokheina nata ngiachhiena patosa ta.

¹⁰ Bei chakaotuhpazy hyutuhpa ta Dâniah hnohta, “Abei, ei zibeipa cha ei chi ngaita, ano tlai ta nama nie awpa nata do awpa rao ha tlôh ta, khazia nama richâhkha satliazy hlâta chhie viapa ta a cha hmô aw ei? Chata a châ khiahta cha ei luh châta chichhihpa abei chô liata nama taopa a châ aw mâh tâh,” tah ta.

¹¹ Bei chakaotuhpazy hyutuhpa ta Dâniah, Hânaniah, Misela nata Azariah zy a vaih awpa chyhsa pakha rao ta, cha vaituhpa hnohna chata Dâniah ta,

¹² “Ei châ haw na, châ chakaotuhpazy he noh hrawh chhôh miah pasia la, nie awpa âhnalasi nata do awpa ti deita miah pie mah y.

¹³ Chatawhcha na hmia liata keimo alânazie nata abei pati a niepa satliazy a lânazie cha pakhopa châ sala, na hmônazie hawhta châ chakaotuhpazy chô liana heta tao mah y,” tah ta.

¹⁴ Cha bie cha vaituhpa ta paryhsa ta, âmo cha noh hrawh chhôh pasia ta.

¹⁵ Noh hrawh khai tawhta abei pati a niepa satliazy hlâta amâ lânazie pha viapa ta, ama sabia chhao thawh via ta.

¹⁶ Chatanachata vaituhpa ta âmo cha abei pati ama nie awpa nata ama do awpa kresawhti zy pie khao leipa ta, âhnalasi tlao pie tyh ta.

Ngâchhihpa hnohta maophaohna laipa piepa a châ

¹⁷ He satlia papalihpazy he achuna nata thaina kyh to liata Khazohpa ta sona nata novâhna pie ta. Dâniah chhochhi cha aluahna nata mâ zydua taih chhao chhopasia thei ta.

¹⁸ Abei ta a hnohta amâ vaw chhi nawpa daihti a raopa a tlô nahta, bei chakaotuhpazy hyutuhpa ta âmo cha Nebukaneza hmiakô liata a vaw chhi ta.

¹⁹ Abei ta âmo cha bie a chho ta, ama hry liata Dâniah, Hânaniah, Misela nata Azariah hawhpa rai y veih ei. Chatanachata abei chakaona rai liata a ngia ha ei ta.

²⁰ Sona nata novâhna kyh abei ta a hiahripa maih liata, a khinarâh chhôh zydua liata moliethaipa nata dyuthaipa zydua hlâta a lie hrawh ta ama pha via tahpa hmô ta.

²¹ Dâniah cha Bei Kôresâ â beina kô khana taihta chakao lymâ ta.