CHAPHÔHTUNA 5 - Mara Bible RV (BSI)

Paduapathi awpa ta thlahchhâna

¹ Hy Abeipa y, eima chô liata a vaw tlôpa he a thei la, Eima maophyuhna he moh la, hmô mah y!

² Eima ryuto râhzy cha chihropazy hnohta piepa châ ta, Eima ozy râh hropazy hnohta piepa a châ ha hih.

³ Hârapazy nata paw hnei leipazy châ ha pi ta, Eima nôzy chhao nôhmei hawhta ama châ haw.

⁴ Keimo ti tlai cha a mâ piepa ta do awpa byuh ha ta, Keimo tho tlai cha a mâ hneipa ta miah ama zua hnao.

⁵ Miah chadaituhpazy ta raopaky miah paky ei ta, Eima thachhâ ta, apahâna rai miah pie veih ei.

⁶ Rihbiena khi viahchhâ hnei awpa ta, Izi lâ ku dao pi ta, Asuria lâ ku eima dao.

⁷ Miah pathlatuhpazy ta vaw molei ei ta, Âmo cha y khao veih ei; Keimo ta ama paraonazy eima phaoh.

⁸ Seizy ta eima chô liata ryureih bâ ei ta, Ama ku tawhta miah a pachha awpa y veih ei.

⁹ Râhchawhpa liata zaozi vâta, Eima hrona sokhâhpa ta viahchhâ eima hmô tyh.

¹⁰ Eima vozy cha chakâh noh lopa vâta, Lômathu hawhta a saih khai haw.

¹¹ Zaio liata chanôzy patupakhi ei ta, Zudâh khihpizy liata laihsazy ama patupakhi.

¹² Beimachâzy cha ama ku liata buhpa ta bangieh ei ta, Machâzy chô liata zana palâsa khao veih ei.

¹³ Satliazy sâh chariehsa raruah ei ta, Chapaw hawtizy tho a hripa a piapa ta ama pao chheichhâ.

¹⁴ Machâzy khihpi thokhy chhikao siesai ha ei ta, Satliazy ta ama pyungiapa ama siesai haw.

¹⁵ Eima palôh alynazy pai ha ta, Eima lâpa mâchhiesana lâta â lie haw.

¹⁶ Eima luh tawhta lakho tla ha ta, Molei ha pi ta, eima hu a po kaw dia!

¹⁷ He vâna heta eima palôhzy panao ta, Hezy vâna heta eima mozy a zoh haw,

¹⁸ Zaio Tlâh roryhrapa ta y ta, Changiezy tlaihna tlâh a châ hapa vâta.

¹⁹ Châhrasala Hy Abeipa, nâ cha chhâzaw ta ryureih chi ta, Chhâ zydua taihta na beidyuchhai â duah lymâ.

²⁰ Khazia ma chhâzaw ta miah my chi ta, Cha ti cha sâ miah na siesai tly?

²¹ Hy Abeipa, paduapathipa ta eima y thei nawpa ta, Nâ lâ miah pakuasa heih la, Hlâno daihti hawhna khata eima nohzy pathieh heih mah y.

²² Miah na thy pathlah hapa châ leipa sala, Eima chô liata na hie a hâh ngâsâ hapa a châ leipa khiahta cha, Nâ lâ miah pakuasa heih la, Hlâno daihti hawhna khata eima nohzy pathieh heih mah y!