CHAPHÔHTUNA 4 - Mara Bible RV (BSI)

Zaio hriena â ki haw

¹ Kheihtazieta ma ngôh khaih khao leipa ta, Ngôh suapa â nano ha tly! Lôsôhpa pathaihpazy chhao, Khiliah su to liata hiezâhpa ta ama y.

² Zaio sawchapawzy cha, Ngôh suapa hawhta a sôhpazy ama châ; Tahmâ deikua cha alei beih hawhta pachâpa châ ei ta, Beihvituhpa ku ta taopa hawhta pachâpa ama châ ha bâ!

³ Changiezy hmahta ama tawzy sâhpi pie ei ta, Pazysana châh ama pahno; Ei phopi sawchanô deikua cha nôchhiepa lâta pua ha ta, Râhchawhpa liata pavawpizy a lyu bâ.

⁴ Hawsaih sâhpi a ngiehpa paleih cha, A dâhphi tupa vâta a dâh liata â bai. Hawtizy ta niedo a haw ei ta, Châhrasala a piepa y veih ei.

⁵ Niedo pahâh chaipa a nie tyhpazy kha, Khiliah liata ama leidia haw; Poh saihlawpa a bupa ta a laiseihpazy chhao, Hnaihny a pathlupa amâ pyhpahly bâ.

⁶ Ei phopi sawchanô paraona cha, Sawdawmâ moleina hlâta a ru via; Sawdawmâ cha ku ta hria byuh leipa ta, Movi hlâta paraopa a châ hapa kha.

⁷ A Nâzaraizy dâhaw hlâta pa­thaih via ei ta, Sâhpiti hlâta ama ngyuh via; Ama sapatie rubi lôsôhpa hlâta a noh thyu via ta, Ama pizie cha saphai lôsôhpa hawhta â ngiapa ama châ.

⁸ Tahmâ deikua cha ama hmia chôchoh hlâta vyh via ha ta, Khiliahzy liata ama hmia siah thei awpa châ khao vei; Ama vo ama ruzy liata a bai ta, Tho raohpa hawhta a raoh haw.

⁹ Lyu kôvei y leipa vâta, Nodi thachhâpa ta y ta; Nodipa ta thipa hlâta la, Zaozi ta thipa a pha via.

¹⁰ Ngiachhiena ta a biepa chanôzy ta Âmo ku tlai ta ama sawzy chhoh ei ta; Ei phopi sawchanô raona â tyhna daihti liata Ama nie awpa lâta amâ lie haw.

¹¹ Abeipa ta a pathiiana papua ta, A hiehâhna ru ngaitapa a patlai haw; Zaio liata mei patih ta, Â bônazy a kâ khai haw.

¹² Khakhaipa nata chariahpa ta Zerusale thokhy chhikao â ngia thei awpa cha, Lei beizy ta zo leipa ei ta, Khizaw chyhsa ahy hmahta zo veih ei.

¹³ A hrohsopazy moleina vâta châ ta, A theihthaipazy paraona vâta a châ; A chhôh liata thisaih palo ei ta, Chyhsa siapa thisaih a palotuhpazy vâta a châ.

¹⁴ Tahmâ cha mochaopazy hawhta pathâpazi ei ta, Khiliah liata ama viavi; Thisaih kiahpa ta thata pua ei ta, Ama chysia dâhdei chhao chyhsa ta hria ngâh khao veih ei.

¹⁵ Chyhsazy ta, “Sie syulyu ha teh u! Pathaih leipa nama châ! Sie syulyu ha teh u! Sie syulyu ha teh u! Miah hria khah u!” tah ei ta; Phopizy ta, “Eima hry liata pahrâ khao aw veih ei” Ama tah hapa vâta, Arâpaipa nata viavipazy lâta amâ lie haw.

¹⁶ Abeipa ano tlai ta âmo cha hiepatla ha ta, Uasa khao aw veih ei; Theihthaipazy ta zana hlao khao leipa ei ta, Machâzy ta khokheina hlao khao veih ei.

¹⁷ Hraoleipa ta baona eima mokhâhna liata Eima mozy a bâ khai haw; A pachha thei lei awpa phopi tlai cha, Hâ chaimâh pi ta eima mokhâh.

¹⁸ Chariahpazy ta eima hnie chathô ei ta, Chavâta eima khiliah liata chhao charei thei khao ma pi; Eima chhâna a hniapa ta eima nohzy reipati hapa châ ta, Eima chhâna a vaw tlô haw.

¹⁹ Miah a chadaituhpazy cha Avâ pahmôhpizy hlâta ama chatlie via; Tlâhpizy liata miah a chadai ei ta, Râhchawhpazy liata miah amâ byh.

²⁰ Eima hnapasu liata husona Abeipa sathawthupa cha, Ama khaohtlôzy liata patu ha ei ta; “A nohdi ry liata phopizy hry liata eima pahrâ aw,” Eima tah tyhpa chyhsa cha ama patu haw.

²¹ Hy Edômâ sawchanô y, thaphapa ta a ly la, Uzi râh liata a pahrâpa y, thaphapa ta a ly mah y; Châhrasala na hnohta chhao nyu vaw tlô aw ta, Pari aw chi ta, nâmasasyh ta thluahruapa ta nâ tao aw.

²² Hy Zaio sawchanô y, Na paraona vâta hriena cha a ki ha ta, Abeipa ta seichâna râh liata cha paysa khao aw vei; Hy Edômâ sawchanô y, Nâ deikua cha na paraona vâta Abeipa ta cha hrie aw ta, Na moleinazy a palâhâh khai aw.