CHAPHÔHTUNA 3 - Mara Bible RV (BSI)

Hriena, rona nata paduapathina

¹ A hiehâhna sômasi ry liata Pasataona a hmôtuhpa chyhsa ei châ.

² Khaihna rai y leina zohna lâ Na to ta, einâ chhi;

³ Ei chô liata a ku hy ta, Noh y ta a hy chanei ngâ thlâh haw.

⁴ Ei sapa nata ei vo pazaosa ta, Ei ruzy a thlie khai haw.

⁵ Na dôhpa ta na chadô ta, Palôh pasana nata rietheina ei chô liata a patlôsa.

⁶ Hlâno ta a thi hapazy hawhta, Zohna liata eina paysa.

⁷ Ei pua thei lei nawpa ta na dôhkhâh ta, Bâlia a hripazy ta eina buh.

⁸ Baona hiapa ta ei awsaopa chhao ta, Ei thlahchhâna a khaw haw.

⁹ Alô khaipazy ta ei lâpizy papo ta, Ei lâthlôhzy a pakosa haw.

¹⁰ Ano cha chavyh nâ byhpa hawhta châ ta, Chakeibarôhneipa nâ nyukhâhpa hawhta a châ;

¹¹ Ei lâpizy tawhta nâ daophipa ta na hriechheih ta, Roryhrapa ta eina paysa.

¹² A libaw a kei ta, A châtai anuana châta eina tawh.

¹³ A lavâ liata châtaizy ta Ei lôpo a ka pahlie haw.

¹⁴ Phopi zydua châta pahneisaopa châ na ta, Pasipasawhna hla noh y ta ama sa thlupa ei vaw châ haw.

¹⁵ Sihnâ khapazy ta ei rih na pabie ta, Thohna khapa ti eina parisa.

¹⁶ Alô châpa liata na chhuhpa ta ei hâhzy palaosa ta, Dohlei liata eina pahluasa;

¹⁷ Hro thlalôhna ta nâ hneisai ha ta, Alyna cha kheihta ma a y tahpa ei my haw.

¹⁸ Chavâta hetana heta ei tah: “Ei rônahna lei ha ta, Abeipa tawhta ei hnabeiseihna a lei haw.”

¹⁹ Ei pasataona nata ei viavinazy a thei la, Thohna khapa ti nata châmaih ti ei dopazy a thei thlâh ha mah y.

²⁰ Chazy cha ei theina maihta, Ei hro a thazei ta â bôh tyh.

²¹ Châhrasala he he a thei heih na ta, Chavâta hnabeiseihna ei hnei.

²² Chhawh pathlahpa ta eima y leipa he Abeipa kyhpachâna vâta châ ta, A zawngiahna a chhâ beih leipa vâta a châ.

²³ Na kyhpachâna nata zawngiahna cha my chareih thieh lymâ ei ta, Na ngâchhihna a rônah ngaita.

²⁴ Chavâta ei hro ta, “Abeipa cha ei tovyuh châ ta, Chavâta ano liata ei hnabei a seih aw,” a tah.

²⁵ Abeipa cha ano a hâtuhpazy châta pha ta, Ano a tluatuhpa hro châta a pha.

²⁶ Abeipa pachhana hmô awpa ta, A chalihpa ta hâpa cha hmo phapa a châ.

²⁷ A thyutlia daihti liata raopaky a kypa chyhsa cha, Ano châta hmopha a taopa a châ.

²⁸ Raopaky pakypa a châ nota, Ano dei ta a thlih thlâh hapa ta a tyuh mawh sy;

²⁹ A pakah dohlei liata ny mawh sy, Hnabeiseihna a y thei thlâh ha ngyu aw;

³⁰ A baih a chabaihtuhpa châta a baih dao sala, Reipachhiena ta bie mawh sy.

³¹ Abeipa ta a chyhsazy cha, Chhâzaw ta thy pathlah aw vei.

³² Ama pachâ parôhsa ha hra sala, A kyhpachâna tleih beih leipa vâta zawh â ngiah heih aw ei.

³³ A palôh hmeiseihpa ta âmo cha pasa pataosa vei, Chyhsa sawzy pachâ parôhsa awpa cha a kho chaipa châ hlei vei.

³⁴ Khizaw sei ta â tâhpa zydua tlysao khai awpa cha, Abeipa ta paryhsa hlei vei;

³⁵ Chônôchaipa hmiakô liata chyhsa adona thypa chhao, Abeipa ta paryhsa vei;

³⁶ Ryureina liata chyhsa bie pakosapa chhao, Abeipa ta paryhsa hra vei.

³⁷ Abeipa ta bie a pie leipa khiahta cha, Ahy ma a bie reipa a patlôsa thei tly?

³⁸ Hmo phapa chhao hmo chhiepa chhao, Chônôchaipa pakah tawhta a puapa châ vei ma?

³⁹ Khazia chyhsa hrohpa ta paphôhpa ta, A moleinazy vâta hriena kyh liata a paphôh tly?

⁴⁰ Eima lâpizy pasiapa ta pakhâta ta moh sih la, Abeipa lâ kua heih suh u!

⁴¹ Eima palôh nata eima kuzy chaluah sih la, Avâ Khazohpa lâ chaluah suh u:

⁴² “Hmoparao pi ta eima châ dyuh, Chavâta miah a ngiahthai va chi.

⁴³ “Hiehâhna poh a bupa ta miah a chadai chi ta, Ngiachhiena rai hnei leipa ta miah na thie haw.

⁴⁴ Meihdo poh a bu chi ta, Thlahchhâna ta meihdo sie pahlie thei vei.

⁴⁵ Apuapa nata hnaihny ta miah tao chi ta, Cha hawhta phopizy hry liata miah na tao haw.

⁴⁶ “Eima chariahpa zydua ta Ama pakah miah ama pakawh chie;

⁴⁷ Apahlawna nata khaohtlô ta miah tlô thlu ta, Chhiena nata raona ta miah a tlô thlu.

⁴⁸ Ei phopi sawchanô raona vâta, Chavah hawhta ei mothlih a loh.

⁴⁹ “Mo hi leipa ta ei mothlih loh aw ta, A chalih leipa ta ei mothlih a loh lymâ aw;

⁵⁰ Abeipa ta vârâh tawhta za moh sala, A hmô hlâlei cha ei mothlih a loh lymâ aw;

⁵¹ Ei khihpi sawchanô zydua vâchhiena ei hmôpa ta, Ei pachâ thata a parôhsa.

⁵² “Ei chariahzy ta a chhâpa y leipa ta Pavaw hawhta einâ byh ei;

⁵³ Ahrohpa ta khaohtlô liata na pathla ei ta, Alô ta eina vawh ei;

⁵⁴ Ti ta ei luh na vao ta, ‘Ei leidia ha na!’ ei tah.

⁵⁵ “Hy Abeipa, na moh pado na ta, Khaohtlô athupa chaopahrâ tawhta na moh ei pado;

⁵⁶ Ei ao thei chi ta, Baona hiapa ta ei awna liata na nah rie a chahu khah y;

⁵⁷ Ei cha aw tita nâ vaw hnia chi ta, ‘Chi khah y!’ eina tah chi.

⁵⁸ “Hy Abeipa, nâ duakhei chi ta, Ei hrona na chatlai haw;

⁵⁹ Hy Abeipa, ei chô liata hmo doleipa ama taopa hmô chi ta, Nâ ta ei thâtih pachia mah y;

⁶⁰ Ama phuh lana zydua hmô khai chi ta, Eina teina zydua ei na hmô khai.

⁶¹ “Hy Abeipa, pasipasawhna bie ama reipazy thei khai chi ta, Eina teina zydua ei na thei khai;

⁶² Nâ siehnaopazy hmao nata pachânazy ta Noh y ta eina chakhia;

⁶³ Moh tua, amâ tyuduana maih liata Pasipasawhna hla ama sa thlupa ei châ bâ.

⁶⁴ “Hy Abeipa, âmo cha viari thô la, Ama ku hmotaopa lymâ hawhta viari thô mah y;

⁶⁵ Ama palôh kuh pachhasa la, Ama chô liata na chhiesana patlôsa mah y;

⁶⁶ Hy Abeipa, hiehâhpa ta âmo cha a chadai la, Na avâzy ry tawhta âmo cha pahleipadia mah y.”