CHAPHÔHTUNA 2 - Mara Bible RV (BSI)

Abeipa ta Zaio a hrie

¹ Abeipa ta a pathiiana ta Zaio sawchanô cha meihdo ta a khu ha he zaw! Izarei chhithaina chhao, Avâ tawhta alei lâ a za thy ha hih; A hiehâhna noh liata la, A pheitlyna chhao a thei khao vei.

² Abeipa ta zawngiahna rai hnei leipa ta palâ ta, Zakaw pahrâna su zydua a palâ khai haw; A pathiiana ta parao ta, Zudâh sawchanô thokhyzy a parao khai haw; Khinarâh nata a beimachâzy chhao, Nohzaopa ta a panawh khai ha ei.

³ Hiehâhna rupa ta Izarei ki zydua chhawh pachhô ta; Chariah hmia liata, Âmo tawhta a ku chachâh lâ â dao haw; Meipaleih hawhta Zakaw pathlazy hry liata kâ ta, A chheipâh zydua a kâ khai haw.

⁴ Chariahpa hawhta a libaw a kei ta, Khakhaipa hawhta a ku chachâh lâ â pachyh haw; Zaio sawchanô poh o liata, Eima modypa zydua a thie khai haw; A hiehâhna cha, Mei hawhta a lei thlu haw.

⁵ Abeipa cha chariahpa hawhta châ ha ta, Izarei a palâ khai haw; A bei ozy palâ khai ha ta, A thokhyzy a parao khai haw; Zudâh sawchanô chhôh liata, Mâchhiesana nata chaphôhtuna a papôh haw.

⁶ A byureih cha sadô ruapa hawhta parua ta, A poh o a parao haw; Abeipa ta Zaio cha, Kyhchhi nata Pahânoh zy pamysa ta; A ruchhôna ru ngaitapa ta Abei nata theihthaipa zy a thy ha ei.

⁷ Abeipa ta a maisâh thy ta, A supathaihpa a dytha haw; A bei o thokhyzy chhao, A chariahpa ku liata a hlâ haw; Kyhchhi noh ta taopa hawhta, Abeipa o liata thata ama awh.

⁸ Abeipa ta Zaio sawchanô thokhy cha, Parao khâchâ â chhuah haw; Thliena ri parai ta, Parao awpa tawhta a ku pako vei; Thokhy nata a dôh pachhuahnazy mâchhie pasasa ta, Thazeipa ta ama y khoh.

⁹ A thokhy chhikaozy alei liata pao ei ta, A chhikao lâhreizy parao ta a thlie khai haw; Abei nata beimachâzy cha phopi hropazy hry liata y ei ta, Ryhpa y khao vei; A hrohsopazy chhao ta, Abeipa tawhta aluahna hmô khao veih ei.

¹⁰ Zaio khihpi machâzy cha, A chalihpa ta alei liata a tyuh ei ta; Ama luh liata buchâh a mia ei ta, Latho poh amâ bu; Zerusale laihsa kôpazy chhao, Alei lâ a khu ei ta amâ bôh.

¹¹ Ei chana ta ei mo zoh ha ta, Ei pavyhpi thata â tlao; Ei phopi sawchanô leidiana vâta, Ei hmôkhaw alei liata a sa ta; Hawsaih nata sâhpi a ngiehpazy khiliah liata panaona vâta, Ei hmôkhaw alei liata â sa.

¹² Ama nôzy padopa ta cha ei ta, “Viahchhâ nata kresawhti khataih liata a y?” ama tah. Hmaphaohpa hawhta, Khiliah liata panaopa ta ama y; Ama nôzy byhpi chô liata, Ama hrona a lei.

¹³ Hy Zerusale sawchanô y, Na châta khâpa bie reih aw na ta, khâpa nata ma ei cha pakhopâ aw? Hy Zaio sawchanô laihsa kôpa y, Thlah ei cha palôh thei nawpa ta khâpa ma ei cha palyusa aw? Na raona tilaipi hawhta kawh ta, Ahy châ patlâh thei aw?

¹⁴ Na hrohsopazy ta na châta Aluahna phichhyhpa nata dôveina zy ama hmô; Vânoh na to heih thei nawpa ta, Na moleina palâhâh veih ei; Aluahna phichhyhpa nata paviana zy Na châta tlao ama hmô tyh.

¹⁵ Lâpi liata châ chapiapa zydua ta Ama ku ama cha chabaih chie; Zerusale sawchanô cha hmaotô chiepa ta ama luh chahuah chie ei ta, “He he khihpi chhithai pakipa, Khizaw zydua a palysapa khihpi, Ama tah tyhpa kha châ vei ma?” ama tah.

¹⁶ Na chariahpa zydua ta ama pakah cha pakawh chie ei ta, Ama hmao ama cha tô chie; Ama hâh cha charieh chie ei ta, “Eima palâ haw! He noh he eima mokhâh tyhpa tlai kha châ ta, Eima hro chhôh ta eima hmô ha hih!” ama tah.

¹⁷ Abeipa ta â chhuahpa tao ha ta, A bie a patlô haw; Hlâno tawhta parao awpa ta a vaw rao hapa cha, Ngiachhiena hnei leipa ta a parao haw; Chariahpa a ly awpa ta cha parao ta, Na khakhaipazy ki a pasisa.

¹⁸ Ama palôh ta Abeipa a pado. Hy Zaio sawchanô thokhy y, Vah ti hawhta mothlihzy loh sala, A chhô zâ ta loh mawh sy! A pahâ leipa la, Na mo paso khah sy!

¹⁹ Thyu la, zâ ta awh la, Zâ vaina athaona maihta awh tyh mah y! Abeipa ypâna hmiakô liata, Na palôh ti hawhta patlai mah y! Khiliah su to liata nodipa ta a panaopa na sawzy châta, Ano lâ na ku pazawh mah y!

²⁰ Hy Abeipa, moh la, pachâ tua! Ahy chô liata ma he hawhta na tao tly? Chanôzy ta ama chhi thei niepa ta, Ama chhôh tawhta a puapazy ama nie aw ma? Theihthaipa nata hrohsopa taihta, Khazia Abeipa supathaihpa liata thiepa ama châ aw?

²¹ Khiliah dohlei hry liata, Hawti machâ amâ zawh; Ei satlia laihsa zy Zaozi ta ama pao haw; Na hiehâhna noh liata thie ei ta, Ngiachhiena rai hnei leipa ta ama thie khai haw.

²² Kyhchhi noh hawhta awpakhy chi ta, Chichhihpazy su tawhta eina vaw tlô thlu ei; Abeipa hiehâhna noh liata la, Arâpa nata ahrohpa rai y veih ei; Ei sawzy nata ei mohôhpazy cha, Ei chariahpa ta a pahleipadia khai ha ei.