BIESOZY 8 - Mara Bible RV (BSI)

Sona byhnâzy

¹ Sona ta awh ta, Novâhna ta a ao ki a pasâh.

² Lâthlôh kiah su a sâhpa liata zy, Lâpi atyhna su liata zy,

³ Khih thokhy chhikao kiah liata zy, Hawka liata zy a duah ta, Hetana heta ao paro ngaitapa ta a awh tyh:

⁴ “Hy nâmo, chyhsazy saih u, ei cha aw ei hih, Ei awna he chyhsa sawzy lâta a châ.

⁵ Hy nâmo, sona a phahlapazy saih u, Sona a chu u la; Nâmo, ahrupazy saih u, Pahnona a chu teh u.

⁶ Nathlie teh u, bie phapazy reih aw na ta, Ei hmao tawhta bie dopa a vaw pua aw.

⁷ Ei pakah ta biehmeiseihpa reih aw ta, Paraona cha ei hmao châta pasichhihpa a châ.

⁸ Ei pakah bie zydua asiapa châ khai ta, Bie akopa tlyma, bie hloh hneipa tlyma y tlâ vei.

⁹ Chyhsa novâhpa châta cha sia khai ei ta, Pahnona a hmôpazy châta chhao amâ do khai.

¹⁰ Tâkâ vyuhpa ta ei pachuna a la u la, Ngôh phapa vyuhpa ta pahnona tlao a la teh u.

¹¹ Sona cha lôsôhpazy hlâta pha via ta, Na tlaichhai kawpa khâpa nata hmah Pakhopâ theipa châ vei.

¹² “Sona ta hetana heta a tah: Kei, sona he pahnona nata pahrâ khoh na ta, Novâhna nata pachâhpady thaina ei hnei.

¹³ Abeipa china cha moleina a haopa a châ. Apalaina nata apasâhsana a hao na ta, Moleina hro zy ei hao; Phichhyhpa bie chhao ei hao.

¹⁴ Ryhrao thaina nata sona dopa zy cha kei eih châ ta, Novâhna hnei na ta, thatlôna ei hnei.

¹⁵ Keima baona ta beizy ryureih ei ta, Ryureituhpazy ta ryureina dopa ama siekhei.

¹⁶ Keima baona ta beimachâzy ryureih ei ta, Nôpawpa zydua ta â dopa ta ryu ama reih tyh.

¹⁷ Kyh nâ pachâtuhpazy cha ama kyh pachâ na ta, Palôh hmeiseihpa ta nâ tluapazy ta eina hmô ei.

¹⁸ Hneirôna nata zachhihna zy ei hnohta y ta, Hneirôna nata siana tlyuhpa chhao ei hnohta a y.

¹⁹ Keima thei cha ngôh hlâta pha via ta, Ngôh suapa hlâ chhao ta a pha via; Ei kôvei chhao tâkâ suapa hlâta a pha via.

²⁰ Siana lâpi a chhih na ta, Adona lâthlôh ei chhih.

²¹ Kyh nâ pachâtuhpazy hnohta ryuto pie ei na ta, Ama ryubyhzy ei pabiepa ei.

²² “Abeipa ta hmo a tao tua nota na tao ta, Hlâno ta a tao tuachaipa ei châ.

²³ Tlyzaw ta a ypa châ na ta, Leilô y hlâta taopa châ na ta, Tao tuachaipa ei châ.

²⁴ Ti athupa y hlâta y ha na ta, Ti hluhpi a palipa tihnawhzy y hlâta ei y haw.

²⁵ Tlâhpizy yzie a hnei hlâta pih ha na ta, Tlâhthlôhzy ama y hlâta ei pih haw.

²⁶ Leilô nata lyurâhpazy a tao hlâta pih ha na ta, Khizaw dohlei hmiatuachaipa a y hlâta ei pih haw.

²⁷ Avâzy a padua nota y ha na ta, Ti athupa chô liata vâphuh a chhôh nota ei y haw.

²⁸ Chô lâ avâzy a pa-i nota y ha na ta, Ti athupa tihnawhzy a tao nota ei y haw.

²⁹ Tizy ta a biepiepa ama parao lei nawpa ta, Tilaipi râhrizy taopa ta leilô abôna a tao no khata ei y haw.

³⁰ Rai a thaipa hawhta Abeipa kiapâh liata y na ta, A noh chareih ta â lyna châ na ta, A hmiakô liata khâ ei ly tyh.

³¹ A pahrâna khizaw liata thaphapa ta y na ta, Chyhsa sawzy chô liata ei ly kaw tyh.

³² “Chavâta sawchapawzy saih u, Tahmâ na nathlie teh u: Ei lâpi a chhihpazy cha ama hu â hieh aw.

³³ Pachuna nathliepa ta so u la, Dytha khuh vy.

³⁴ Noh chareih ta ei chhikaozy lâ a vypa ta, Ei dôhpachhôh ochhizy liata hâ tyh ta, Ei bie a nathlie tyhpa cha a nohlao na.

³⁵ Nâ hmôpa maih hrona a hmôpa châ ei ta, Abeipa khokheina ama to aw.

³⁶ Nâ hmô leipa deikua cha anosasyh ta hmah a paphao ta, Nâ haopa zydua chhao thina kyh a pachâpa ama châ.”