BIESOZY 7 - Mara Bible RV (BSI)

Chanô sihryhpa tawhta zikyurâna

¹ Ei sawchapawpa y, ei biezy zyh la, Ei biepiepazy a vao thlâh ha mah y.

² Ei biepiepazy zyhpa ta hroh la, Ei pachuna cha na mosawpa hawhta a vao mah y.

³ Na kuparozy liata a ky la, Na palôh lôphiapa liata roh mah y.

⁴ Sonô hnohta, “Ei sietanô na châ,” tah la, Pahnona hnohta, “Ei viasa phapa,” tah mah y.

⁵ Sona ta chanô sihryhpa tawhta cha vaih aw ta, Apheinô reikah pahniapa tawhta a cha vaih aw.

⁶ Ei o opy samokaw tawhta, Khôtho lâ sai na ta,

⁷ Hmo a pahno thai leipa satlia pakha tlai cha, Sona a phahlapazy hry liata hmô na ta, Thyutliapazy hry liata a hmia ei siah.

⁸ Chanô yna kiapâh khiliah liata a khie laih ta, A o lâpi a chhihpa ta,

⁹ Zâlâ azo hrahri ta, Zâ zohna ry liata chanô cha a pangai.

¹⁰ Moh teh u, âzuahnô hawhta a tobi ta, Achhuahna a hneipa chanô ta thlai a vaw dy.

¹¹ Reih hluhpa nata lieluh pâpaw a zohpa châ ta, O liata a phei ngia a ryh leipa a châ.

¹² Thiapawh khiliah liata y ta, Tahmâ sôdaohna su liata y heih ta, Su to liata a byh ta a hâ tyhpa a châ.

¹³ Satliapa cha thlai patupa ta sy ta, Hmia kai kawpa ta a hnohta,

¹⁴ “Aryhna hlâna atheihnazy ei hlâ awpa châ ta, Tanoh kha ei bietai ei patlô haw.

¹⁵ Chavâta nâma a tyh awpa ta vaw pua na ta, Cha tlua chaimâh na ta, Tahmâ ei cha hmô ha hih.

¹⁶ Ei hmohphaw chhao khuna pohzy ta khu ha na ta, Izi pala rih dipa poh chapaipa tlai ta ei khu haw.

¹⁷ Deiryh ropahâhpa ta ei rakhô roh pahâhsa na ta, Lilipaw nata lôiasoh ropahâhpazy ei hry haw.

¹⁸ A vy teh, azozâkhihdei kyhpachâna ti doh sih la, Kyhpachâna ta khiahlôh a patlâh tua ei si.

¹⁹ Ei vahpa lâhlapi lâ khitlyh ha ta, O liata y vei.

²⁰ Tâkâ sykhao kha a phao ta, Thla pôlô hlâlei cha vaw tlô aw vei,” a tah.

²¹ A reikah thaina ta satliapa cha pahnie ta, A reih pahniana ta a sydie haw.

²² Viahchao tôhpa thiena su lâ a siepa hawhta, Ahrupa cha thlai ama patupa hawhta, Satliapa ta chanô cha thlai a pazi haw.

²³ Pavaw ta khoheih liata thlai â chohpa hawhta, Châtai ta a pathi a papyu hlâlei cha, A hmotaopa chata a hrona a pahlei aw tahpa pahno vei.

²⁴ Chavâta sawchapawzy saih u, Tahmâ na nathlie u la, Ei biereipazy he a phapa ta pachâ teh u.

²⁵ Chanô hrozie lâ cha nama palôh a heih leipa sala, A lâpi lâ tlei khuh vy.

²⁶ Chyhsa hluhpi hmah paphao ha ta, Zasâh manôh a thie ha ei.

²⁷ A o cha Athihkhih lâpi châ ta, Thina chhôhpadâhpa lâ a zupa a châ.