BIESOZY 6 - Mara Bible RV (BSI)

Thathina nata haiphiana kyh zikyurâna

¹ Ei sawchapawpa y, na vaih châta sôhkâ sopa la, Khichhaipa vyuhpa ta nâ dua khiahta cha,

² Na pakah biezy liata a ao chi ta, Na pakah biezy ta a cha patu hapa a châ.

³ Ei sawchapawpa y, Na vaih ku liata y ha chi ta, Chavâta he he tao la, Nâmasasyh ta a pachha mah y. A chatliepa ta vawh la, A panawh la, Na vaih cha a haw mah y.

⁴ Na mo a mô leipa sala, Na mo vo tla-uah hra khah sy.

⁵ Sakathaipa tawhta sakhi â bohpa hawhta, Nâmasasyh ta a pachha la; Khoheih chôtuhpa ku tawhta pavaw â bohpa hawhta, Nâmasasyh ta a pachha mah y.

⁶ Nâ thathipa, hloia lâ vawh la, A hroziezy moh la, so ha mah y.

⁷ Hloia ta abei hnei leipa ta, Hyutuhpa nata ryureituhpa hnei hra vei.

⁸ Nopi daihti ta nie awpa pachô ta, Sâh hria daihti ta nie awpa a pahmaoh tyh

⁹ Hy thathipa, khachâ ma a zia aw chi ta, Khati ta ma nâ môpa tawhta na thyu aw?

¹⁰ Buakha a môpa ta, Buakha tla-uah chi ta, Buakha ku chakhipa ta nâ pahâ chhôh ta;

¹¹ Dyhchhiena ta hraotuhpa hawhta cha vaw tlô thlu aw ta, Phahlana ta chaihrai chhaopa chyhsa hawhta a cha vaw tlô thlu aw.

¹² Chyhsa dyutlai leipa, chyhsa moleipa cha, Pakah hloh chhaota â khie tyh.

¹³ A mo ta mopasihpa ta, A phei ta hria ta, A kudy ta a dy tyh.

¹⁴ Chyhsa parao khohna palôh phaopa ta, Hmo chhiepa tao a chhuah ta, Achhaihna chi a tu lymâ.

¹⁵ Chavâta chhiena ta eikhapi ta vaw tlô thlupa ta, Sôkha ta paraopa châ aw ta, Taopathi heih theipa châ khao aw vei.

¹⁶ Abeipa â haopa hmo miacharu y ta, A châta pasichhihpa miasari a y.

¹⁷ Chazy cha, â khotlâhpa mokhaohzy, Paleih haihthaipa, Paraona a hnei leipa thisaih a palopa kuzy,

¹⁸ Hmo pha leipa tao a chhuahpa palôh, Paraona lâ a râpa ngiahly thatlôpa,

¹⁹ Haipa hu a sopa pahnokheituh pakheipa nata Unawhzy achhaihna chi tutuhpazy ama châ.

Apheina kyh zikyurâna

²⁰ Ei sawchapawpa y, na paw biepiepa a ngiah la, Na nô pachuna a heihsai khah y.

²¹ Na palôh liata khâ châh sala, Na rao liata khâ a ao mah y.

²² Na sie nota cha chhihthapa ta, Nâ zia tita cha vaih aw ei ta, Na thyu tita bie ama châ chho aw.

²³ Biepiepa cha meiôh châ ta, Pachuna cha khaihna châ ta, Chhoreina rana cha hrona lâpi a châ.

²⁴ Chanô moleipa tawhta cha vaih aw ta, Apheinô paleih pahniapa tawhta a cha vaih aw.

²⁵ A chhithaina cha na palôh ta tlaichhai leipa sala, A mopadei ta a cha patu awpa a pasaih khah y.

²⁶ Viahchhâ tlâ kha ta âzuahnô chalei theipa châ ta, Vahpa chhaopa chanô a châna a hro zachhihna deikua a pahlei aw.

²⁷ Chyhsa ta a chachôhna liata mei soh sala, A chysiazy kâ leipa ta a y aw ma?

²⁸ Chyhsa ta meihei iapa chô liata sie sala, A pheizy u leipa ta a y aw ma?

²⁹ A vaih lapinô lâ a ngiapa chhao, cha hawhta y hra aw ta, Cha chanô a hriapa maih cha hrie leipa ta pua aw veih ei.

³⁰ Parutuhpa ta a nodipa papai nawpa ta a paru khiahta cha, Chyhsazy ta parutuhpa cha mohnao hlei veih ei;

³¹ Patupa a châ khiahta deikua cha, A lie sari ta a thô awpa châ ta, A hneipa zydua a pie khai awpa a châ.

³² Chanô liata a pheipa cha, Hmo a pahno thai leipa châ ta; Cha hawhpa hmo a taopa cha, Anosasyh â paraopa a châ.

³³ Hmaphaohpa nata maophyuhpa ta y aw ta, A nohzaona a hnao pathaih theipa châ aw vei.

³⁴ Chanô vahpa cha hiatliana vâta a hie thata hâ aw ta, Phuh a lana noh liata ngiachhiena hnei aw vei.

³⁵ Achatlaina sôh a pyh leipa aw ta, Kuhria hluhpi pie hra la, A palôh châ hlei aw vei.