BIESOZY 5 - Mara Bible RV (BSI)

Apheina kyh zikyurâna

¹ Ei sawchapawpa y, ei sona he nathlie la, Ei novâhna lâ he na nah pachôh mah y.

² Chatanachata novâhna hnei aw chi ta, Na hmaozy ta pahnona â vao aw.

³ Chanô ngâchhih leipa hmao cha kheihti hawhta a thlaoh ta, A pakah chhao sathaw hlâta a pahnia via.

⁴ Achhâna lâ deikua cha hmo khapa hawhta kha ta, Zaozi hâh nopa hawhta a châ.

⁵ A pheizy thina lâ zu ei ta, A pheizy ta Athihkhih lâpi amâ chhih.

⁶ Hrona lâpi kyh pachâ leipa ta, A lâthlôhzy pavia ta, Khataih lâ ma a sie tahpa pahno vei.

⁷ Chavâta ei sawchapawzy saih u, Tahmâ na nathlie u la, Ei pakah biezy he a heihsai khuh vy.

⁸ Cha hawhpa chanô cha a heihsai u la, A o chhikao chhao a hnia khuh vy.

⁹ Chataleipatala na zachhihna mohropazy pie pathlei aw chi ta, Na hro chhôh kôzy chhao nôchhiepazy na pie pathlei aw.

¹⁰ Khichhaipazy ta na thatlôna hmâpa ta lôhrâ a patlô pathlei aw ei ta, Na hriapasana chhao chihropa o lâ a sie pathlei aw.

¹¹ Na hro chhâna liata cha a hrô aw chi ta, Na sapa nata na pôhpa a rao khai tita cha,

¹² “Kheihtazieta ma chhoreina a hao na ta, Ei palôh ta rana kha a vaw papeisa vei tly!

¹³ Nâ pachutuhpazy ao vaw nathlie leipa na ta, Nâ chhihthatuhpazy lâ ei nah ei vaw pachôh vei tly?

¹⁴ Zawpi ahmaohpakhyna liata, Maophyuh chhie ta ei maophyuh daihmâ hih,” na tah aw.

¹⁵ Nâma tikhaoh tawhta ti doh la, Nâma tihnawh tawhta ti a lohpa doh mah y.

¹⁶ Na tihnawhzy su to liata loh pathlahpa ta, Lâlaizy liata chavah tizy a loh awpa a châ ma?

¹⁷ Na tihnawhzy cha nâma châ dei châ sala, Na hnohta a ypa khichhaipazy châta châ khah sy.

¹⁸ Na tihnawh cha byhnâ to sala, Na thyutlia no lapinô liata a ly mah y.

¹⁹ Ano cha sakhi chanôpa khochhih ngaitapa châ ta, Sathawh chanôpa pha ngaitapa a châ. A sâhpizy ta lôhrâ khâ cha patlôsa sala, A kyhpachâna iahzaipa ta khâ y mah y.

²⁰ Ei sawchapawpa y, khazia chanô ngâchhih leipa iahzaipa ta y aw chi ta, Apheinô hnôbia cha nâ pyhpahly aw?

²¹ Chyhsapa lâpizy cha Abeipa hmiakô liata y ta, A siena lâ maih Abeipa ta a moh tyh.

²² Hmoparaopa cha a paraona khoheih liata a ao aw ta, A moleina chaori ta â ipa ta a chahry aw.

²³ Pachuna a phahlapa vâta thi aw ta, A hru tupa vâta a leidia aw.