BIESOZY 4 - Mara Bible RV (BSI)

Paw pachuna

¹ Ei sawchapawzy saih u, paw pachuna bie thei u la, Novâhna nama hnei thei nawpa ta nathlie teh u.

² Pachuna phapa ei cha pie ei hih, Ei ryhpa bie a heihsai khuh vy.

³ Ei paw sawchapaw hâtipa ei châ nota, Ei nô ta a hmô chhôhpa nata a dao kawpa ei châ nota,

⁴ Ei paw ta na pachu ta ei hnohta, “Na palôh ta ei biezy he khâchâ a vao sala, Ei biepiepazy he zyh la, hroh mah y.

⁵ Sona tlua la, Novâhna tlua mah y; Ei pakah tawhta bie a puapazy my leipa la, Tleisai khah y.

⁶ Sona cha siesai khah y, A cha hrôbieh lymâ aw; A kyh pachâ mah y, A cha vaih lymâ aw.

⁷ Sona thabypa cha he he a châ: Sona cha tlua la, Khâpa zydua hlâta novâhna tlua chai mah y.

⁸ Sona cha pasâhsa la, A cha cheihchalo aw; A pyhpahly la, A cha palyupalih aw.

⁹ Ngiachhiena pawpi na luh liata tawh aw ta, Lakho rônahpa a cha pakho aw.

¹⁰ Ei sawchapawpa y, nathlie la, ei biezy a pyh mah y; Chatanachata na chhâ a pasi aw.

¹¹ Sona lâpi cha pachu na ta, Lâpi dopa liata ei cha chhihtha.

¹² Na sie nota châ pakhâpa y leipa aw ta, Nâ râ tita a chapia aw va chi.

¹³ Pachuna cha khâchâ patu la, Papua khao khah y; Na hrona châ ta, Liahsa a vao ha mah y.

¹⁴ Hmoparaopa lâpi liata a ngia leipa la, Moleipa lâthlôh a chhih khah y.

¹⁵ Cha lâpi liata sie leipa la, Khôkhâh ha mah y; Tleisai la, Sie lymâ mah y.

¹⁶ Hmo ama parao ha tua leipa ta cha, A mô thei leipa ei ta; Chyhsa ama chapiasa ha tua leipa ta cha, Ama mo ku thei vei.

¹⁷ Paraona viahchhâ nie ei ta, Nôchhiena kresawhti ama doh tyh.

¹⁸ Mosiapazy lâpi deikua cha khihdei khaihpa hawh châ ta, Nohchhô locho a tlô hlâlei a khaih via lymâ.

¹⁹ Hmoparaopazy lâpi cha zoh kaluh ha ta, Khâpa ma amâ chapia tahpa chhao pahno veih ei.

²⁰ Ei sawchapawpa y, ei biezy nathlie la, Ei biereipazy lâta na nah pachôh mah y.

²¹ Na mohmô tawhta pua leipa ei sala, Na palôh liata khâchâ a vao ha mah y.

²² Sona nata novâhna cha a hmôtuhpazy châta hrona châ ta, Ama sapa zydua châta tlâhna a châ.

²³ Na palôh pakhâta ta vaih mah y, Hrona tihnawh vaw puana châ tlôh ta.

²⁴ Bie hloh hneipa na pakah tawhta thy la, Dôveina bie chhao na hmao tawhta thy ha mah y.

²⁵ Na mo ta hmia lâ moh lymâ sala, Na mo vo chhao â dypa ta hmia lâ sai lymâ mawh sy.

²⁶ Na phei tlyna lâpi paraih la, Na lâsie a patlâ lymâ aw.

²⁷ Chachâh lâ tlyma chavei lâ tlyma tlei leipa la, Moleina hmo tawhta na phei pasie ha mah y.”